नवदिल्ली, 08 जुलाईमासः (हि.स.)। राष्ट्रसेविकासमितेः, दिल्लीप्रान्तस्य प्रबुद्धवर्गस्य मेधाविनी-सिन्धु-सृजनेन समितेः संस्थापिकायाः आद्यसंचालिकायाः च वन्दनीयायाः लक्ष्मीबाई-केलकर-महोदयायाः (मौसीजी) अवतरणदिवसे संकल्पदिवसस्य गरिमामयः आयोजनं बुधवासरे सर-शंकरलाल-कॉन्सर्ट्-हॉल् इत्यत्र, विश्वविद्यालयमार्गे, सम्पन्नम् अभवत्। अस्मिन् वर्षे संकल्पदिवसः, राष्ट्रसेविकासमितेः सेवायाः, समर्पणस्य, राष्ट्रनिर्माणस्य च 90 वर्षाणां गौरवपूर्णायै यात्रायै समर्पितः आसीत्। अस्मिन् अवसरे वन्दनीयायाः मौसीजी इत्यस्याः राष्ट्रजीवनस्य, नारीजागरणस्य, समाजसेवायाः च आदर्शान् स्मरन्तः उपस्थिताः जनाः स्वयं समाजस्य राष्ट्रस्य च प्रति स्वदायित्वानां निर्वहणाय पुनः संकल्पितवन्तः।

कार्यक्रमस्य मुख्यवक्त्री अखिलभारतीया सहकार्यवाहिका अलका-इनामदार-महोदया आसीत्। मेधाविनी-प्रान्तसंयोजिका प्रो. निशा-राणा-महोदया विषयस्य प्रस्तावनां दत्तवती। राष्ट्रियमहिलाआयोगस्य अध्यक्षा विजया-रहाटकर-महोदया मुख्यातिथिरूपेण नवदेहल्याः सांसदः बांसुरी-स्वराज-महोदया च कार्यक्रमस्य अध्यक्षारूपेण उपस्थिते आस्ताम्। विशिष्टातिथिरूपेण राष्ट्रीयस्वयंसेवकसंघस्य अखिलभारतीयप्रचारटोल्याः सदस्यः मुकुल-कानिटकर-महोदयः डूटा-संस्थायाः अध्यक्षः प्रो. वी.एस्.नेगी-महोदयः च स्वविचारान् व्यक्तं कुर्वन्तौ राष्ट्रनिर्माणे संगठितनारीशक्तेः भूमिकां रेखांकितवन्तौ। प्रो. चारु-कालरा-महोदया अंजू-आहूजा-महोदया च मञ्चं साझां कृतवत्यौ।

अस्मिन् अवसरे समाजस्य विविधेषु क्षेत्रेषु उत्कृष्टां सेवां सहयोगं च ददतीनां नवानां विशिष्टानां महिलानां सम्मानं कृतम्। कार्यक्रमे उपस्थिताः सेविकाः, शिक्षाविदः, सामाजिककार्यकर्तारः, नागरिकाः च वन्दनीयायाः मौसीजी इत्यस्याः आदर्शान् जनं-जनं प्रति प्रापयितुं सेवायाः, संस्काराणां, राष्ट्रसमर्पणस्य च अस्याः गौरवशालिन्याः परम्परायाः अग्रे नयनाय सामूहिकं संकल्पं गृहीतवन्तः।

कार्यक्रमे मुकुल-कानिटकर-महोदयः अकथयत् यत् भारतीया नारी अद्य सम्पूर्णविश्वे स्वप्रतिभायाः ध्वजम् उत्तोलयति। आगामी शताब्दी मातृशक्तेः भविष्यति। सः अकथयत् यत् आधुनिकां भवितुं स्वप्राचीनां संस्कृतिं त्यक्तुम् आवश्यकता नास्ति। सत्या पूजा सा एव अस्ति, यस्यां वयं स्वाराध्यस्य गुणान् जीवने अवतारयामः।

तत्र विजय-रहाटकर-महोदया अकथयत् यत् यदा देशस्य महिलाः संकल्पं गृह्णन्ति तदा सम्पूर्णं राष्ट्रं परिवर्तते। सा अकथयत् यत् विश्वं भारतस्य शक्तेः आकलनं केवलम् अर्थव्यवस्थया न, अपितु मातृशक्त्या करिष्यति। विकसितभारतः 2047 सम्पूर्णस्य देशस्य संकल्पः अस्ति, भारतीयाः महिलाः च विज्ञाने, अन्तरिक्षे, प्रौद्योगिक्यां, चिकित्सायां च सर्वेषु क्षेत्रेषु अग्रण्यः सन्ति।

सांसदः बांसुरी-स्वराज-महोदया अकथयत् यत् यः जनः स्वकीयेन वास्तविकपरिचयेन मूलैः च परिचितः भवति, तं कोऽपि विचालयितुं न शक्नोति। सा अकथयत् यत् नारीवादः समानता च उधारगृहीते संकल्पने न स्तः। मातृत्वस्य, कर्तृत्वस्य, नेतृत्वस्य च बलेन महिलाः राष्ट्रनिर्माणस्य आधारशिला भवन्ति, गुरोः मार्गदर्शकस्य च भूमिकां च निर्वहन्ति।

तत्र अलका-इनामदार-महोदया अकथयत् यत् राष्ट्रसेविकासमितिः अद्य विश्वस्य सर्वबृहत् महिलासंगठनम् अस्ति, यस्याः 5,000 शाखाः संचालिताः सन्ति। सा अकथयत् यत् हिन्दुत्वम् अस्माकं राष्ट्रस्य च परिचयः अस्ति। तस्याः मतानुसारं महिलायाः प्रथमं कर्तव्यम् अस्ति अग्रिमां सन्ततिं श्रेष्ठान् संस्कारान् दत्त्वा सशक्तस्य जागरूकस्य च समाजस्य निर्माणं कर्तुम् इति ।

----------

Hindusthan Samachar / अंशु गुप्ता