नवदिल्ली, 08 जुलाईमासः (हि.स.)।

भारतीयजनतापक्षस्य राष्ट्रियमहामन्त्री राज्यसभासांसद् च तरुणचुगः पण्डितदीनदयालोपाध्यायप्रशिक्षणमहाभियानस्य अन्तर्गतं प्रचलतः अङ्कीयप्रशिक्षणाभियानस्य सफलतायां प्रसन्नतां प्रकटयन् एतत् मतदानकेन्द्रस्तरीयकार्यकर्तॄणाम् अङ्कीयसशक्तीकरणस्य महती उपलब्धिः इति उक्तवान्।

तरुणचुगः बुधवासरे एकस्मिन् वक्तव्ये उक्तवान् यत् देशव्यापिरूपेण अधुना पर्यन्तं ११,०१,६१८ कार्यकर्तारः अनुप्रयोगाधारितेन अङ्कीयाध्ययनमञ्चेन सह सम्बद्धाः सन्ति यस्मिन् १२ भाषासु अध्ययनसामग्री दृश्यश्रव्यसामग्री प्रश्नोत्तरी अङ्कीयप्रमाणपत्रस्य च सुविधा उपलब्धा अस्ति। प्रशिक्षणे भारतीयजनतापक्षस्य परिचयः पक्षस्य इतिहासः पञ्चनिष्ठाः डाक्टरश्यामाप्रसादमुखर्जिणः पण्डितदीनदयालोपाध्यायस्य च शिक्षाः मोदिसर्वकारस्य योजनाः नमोअनुप्रयोगः मनकीबात इत्येतत् सहितं सङ्गठनस्य प्रमुखकार्यक्रमाः समाविष्टाः आसन्।

सः उक्तवान् यत् राष्ट्रियाध्यक्षः नितिननवीनः राष्ट्रियसङ्गठनमहामन्त्री बी एल सन्तोषः राष्ट्रियसहसङ्गठनमहामन्त्री शिवप्रकाशः च ६ अप्रैल २०२६ दिनाङ्के भारतीयजनतापक्षस्य स्थापनादिवसे अङ्कीयाध्ययनमञ्चस्य शुभारम्भं कृतवन्तः। शिवप्रकाशस्य नेतृत्वे गठिता प्रशिक्षणटोली मण्डलजनपदसंरचनया सह मिलित्वा अस्मै अभियानाय गतिं दत्तवती। २३ जून दिनाङ्कात् डाक्टरमुखर्जीबलिदानदिवसात् ६ जुलाई दिनाङ्कं जन्मदिवसं यावत् दशलक्षकार्यकर्तॄणां लक्ष्यं निर्धारितम् आसीत् यत् अतिक्रम्य अभियानं एकादशलक्षाधिककार्यकर्तृसङ्ख्यां प्राप्तवत्। अधुना एतत् मतदानकेन्द्रस्तरं यावत् विस्तारितं क्रियते।

चुगः उक्तवान् यत् प्रधानमन्त्रिणः मोदिनः अङ्कीयभारताभियानात् प्राप्तया प्रेरणया एव भारतीयजनतापक्षेण एतत् सङ्गठनात्मकम् अङ्कीयप्रशिक्षणाभियानं सञ्चालितम् यत् सुशासनस्य सन्देशम् अन्तिमजनं यावत् प्रापयितुं माध्यमं भविष्यति। सः एतत् लक्षशः कार्यकर्तॄणां नेतृत्वस्य प्रशिक्षणटोलीनां च समर्पणस्य परिणामः इति वदन् सर्वेभ्यः अभिनन्दनं दत्तवान्।

राज्यवारप्रदर्शने मध्यप्रदेशः सर्वाधिकैः १,८३,११३ कार्यकर्तृभिः सह अग्रणी अभवत्। त्रिपुराराज्येन प्रतिमतदानकेन्द्रं प्रायः २० कार्यकर्तॄणां सहभागिता तथा ८५ प्रतिशतं पूर्णतादरः प्राप्तः। अरुणाचलप्रदेशे चण्डीगढे च प्रतिमतदानकेन्द्रं ५ अधिककार्यकर्तॄणां सहभागिता अभवत् यदा तु छत्तीसगढेन ९० प्रतिशतं अरुणाचलप्रदेशेन ८९ प्रतिशतं मध्यप्रदेशेन ८७ प्रतिशतं त्रिपुरया ८५ प्रतिशतं हिमाचलप्रदेशेन ८५ प्रतिशतं नागालैण्डेन ८३ प्रतिशतं लद्दाखेन च ८३ प्रतिशतं पूर्णतादरः अभिलेखितः। एतेषु सर्वेषु ८० प्रतिशताधिकः पूर्णतादरः प्राप्तः।

चुगः विश्वासं प्रकटितवान् यत् शीघ्रमेव प्रत्येकस्मिन् मतदानकेन्द्रे न्यूनातिन्यूनं दश पूर्णप्रशिक्षिताः अङ्कीयकार्यकर्तारः सज्जाः भविष्यन्ति ये सङ्गठनस्य महत्तमा शक्तिः भविष्यन्ति। प्रत्येकः कार्यकर्ता प्रशिक्षितः प्रत्येकं मतदानकेन्द्रम् अङ्कीयरीत्या सशक्तम् इत्यनेन सङ्कल्पेन सह अभियानम् अग्रे प्रचलति।

---------------

Hindusthan Samachar / Dheeraj Maithani