उरई, 08 जुलाईमासः (हि.स.)।

उत्तरप्रदेशस्य जालौनजनपदे बुधवासरे महिलानां बालिकानां च सशक्तीकरणस्य शिक्षायाः आत्मनिर्भरतायाश्च प्रोत्साहनस्य उद्देश्येन सञ्चालितायाः बेटीबचाओ बेटीपढाओ योजनायाः अन्तर्गतं शैक्षिकसत्रे २०२५ २६ उत्तरप्रदेशमाध्यमिकशिक्षापरिषदः यूपीबोर्ड इत्यस्य उच्चविद्यालयीयायाम् इण्टरमीडिएटपरीक्षायां च सर्वाधिकान् अङ्कान् प्राप्तवत्यः मेधाविन्यः छात्राः सम्मानिताः।

सम्मानसमारोहे जिलापञ्चायताध्यक्षः डा घनश्यामअनुरागी तथा जिलाधिकारी राजेशकुमारपाण्डेयः छात्राभ्यः प्रशस्तिपत्राणि प्रदाय तासाम् उज्ज्वलभविष्याय शुभकामनाः दत्तवन्तौ।

अस्मिन् अवसरे मेधाविनीछात्राणाम् उत्साहवर्धनाय प्रत्येकस्याः छात्रायाः बैङ्कलेखे ५००० रूप्यकाणां प्रोत्साहनराशेः अन्तरणप्रक्रिया अपि आरब्धा। समारोहे छात्राभिः सह तासाम् अभिभावकाः अपि बहुसङ्ख्यया उपस्थिताः आसन्।

जिलापञ्चायताध्यक्षः डा घनश्यामअनुरागी उक्तवान् यत् बालिकाः अद्य प्रत्येकस्मिन् क्षेत्रे स्वप्रतिभां प्रमाणयन्ति। यदि ताभ्यः समुचिताः अवसराः गुणवत्तापूर्णा शिक्षा परिवारस्य सहयोगश्च प्राप्यन्ते तर्हि ताः समाजस्य देशस्य च गौरववर्धने महत्त्वपूर्णां भूमिकां निर्वहन्ति।

जिलाधिकारी राजेशकुमारपाण्डेयः उक्तवान् यत् बेटीबचाओ बेटीपढाओ केवलं सर्वकारीया योजना नास्ति अपितु समाजे बालिकानां प्रति सकारात्मकदृष्टेः विकासाय जनान्दोलनम् अस्ति।

समारोहस्य उद्देश्यं बालिकानाम् उत्कृष्टशैक्षणिकप्रदर्शनस्य सम्माननेन सह समाजे बालिकाशिक्षायाः प्रति सकारात्मकवातावरणस्य निर्माणम् आसीत्।

---------------

Hindusthan Samachar / Dheeraj Maithani