हरिद्वारनगरम्, ०८ जुलाईमासः (हि.स.)। उत्तराखण्डस्य मुख्यमन्त्री पुष्करसिंहधामी हरिद्वारस्थिते प्रेमनगर-आश्रमे मोरारीबापोः श्रीरामकथायाः समापनसमारोहे सहभागी अभवत्। अस्मिन् अवसरे सः अवदत् यत् हरिद्वारस्य पुण्यभूमौ तस्मै अद्वितीयस्य आध्यात्मिकसुखस्य आनन्दस्य च अनुभूतिः भवति।

मुख्यमन्त्री मोरारीबापूं प्रति कृतज्ञतां व्यक्तीकृत्य अवदत् यत् तस्य उत्तराखण्डागमनं देवभूमेः कृते ईश्वरस्य विशेषानुग्रहः अस्ति। सः अवदत् यत् मोरारीबापू केवलं श्रीरामकथायाः वाचकः न, अपितु भगवान् श्रीरामस्य आदर्शानां, विचाराणां जीवनदर्शनस्य च सजीवः संवाहकः अस्ति। तेन प्रवचनानां माध्यमेन विश्वस्य विविधेषु देशेषु भारतीयसंस्कृतेः, सनातनदर्शनस्य तथा आध्यात्मिकचेतनायाः सन्देशः प्रसारितः।

मुख्यमन्त्री अवदत् यत् अद्य यदा विश्वं युद्धेन, हिंसायाः आतङ्कवादस्य च समस्याभिः सङ्घर्षं करोति, तदा भारतस्य सनातनसंस्कृतेः “वसुधैव कुटुम्बकम्” इति सन्देशः समग्रमानवजातेः कृते मार्गदर्शकरूपेण उद्भवति। प्रधानमन्त्री नरेन्द्रमोदिनः नेतृत्वे देशः सांस्कृतिक-पुनर्जागरणस्य साक्षी भवति तथा उत्तराखण्ड-शासनं देवभूमिं विश्वस्य आध्यात्मिकराजधानीरूपेण प्रतिष्ठापयितुं लक्ष्यं कृत्वा कार्यं करोति।

मुख्यमन्त्री अवदत् यत् अस्यैव उद्देश्यस्य सिद्ध्यर्थं केदारखण्ड-मानसखण्ड-मन्दिरमाला-अभियानम्, हरिद्वार-ऋषिकेश-परिसरः, शारदा-परिसरः तथा प्राचीनमन्दिराणां संरक्षण-सौन्दर्यीकरण-योजनासु तीव्रगत्या कार्यं प्रवर्तते।

चारधामयात्रया नवीनानि कीर्तिमानानि स्थापितानि

मुख्यमन्त्री धामी अवदत् यत् अस्मिन् वर्षे उत्तराखण्डे धार्मिकपर्यटनं तथा आध्यात्मिकयात्राः नूतनानि कीर्तिमानानि स्थापितानि। तेन उक्तं यत् चारधामयात्रायां द्विमासाभ्यन्तरे पञ्चचत्वारिंशल्लक्षाधिकाः श्रद्धालवः दर्शनं कृतवन्तः। हेमकुण्डसाहिब-यात्रायां लक्षाधिक-पञ्चाशत्सहस्रं (१.५ लक्षम्) श्रद्धालवः नतवन्तः, कैलास-मानसरोवर-यात्रायां च पञ्चसहस्र-पञ्चशताधिकाः श्रद्धालवः दर्शनं कृतवन्तः।

सः अवदत् यत् एतत् राज्यस्य उत्कृष्टाधारभूत-संरचनायाः, सुरक्षितयात्रा-प्रबन्धनस्य तथा श्रद्धालूनां वर्धमानायाः श्रद्धायाः प्रमाणम् अस्ति।

कुम्भ-२०२७ दिव्यं, भव्यं सुरक्षितं च भविष्यति

मुख्यमन्त्री अवदत् यत् कुम्भ-२०२७ केवलम् आस्थायाः आयोजनं न, अपितु सामाजिकसमरसतायाः, आध्यात्मिक-चेतनायाः तथा सनातन-संस्कृतेः महापर्व अस्ति। सः पुनरुक्तवान् यत् राज्यशासनं कुम्भ-२०२७ दिव्यं, भव्यं सुरक्षितं च कर्तुं पूर्णप्रतिबद्धतया कार्यं करोति।

सः अवदत् यत् शासनं “विकासोऽपि परम्परा अपि” इति मन्त्रमनुसृत्य देवभूमेः सांस्कृतिकपरिचयस्य, आध्यात्मिक-गरिमायाः तथा सनातन-परम्पराणां संरक्षणार्थं निरन्तरं प्रयतते। मुख्यमन्त्री श्रद्धालून् भगवत: श्रीरामस्य आदर्शान् स्वजीवने अनुसर्तुम् आह्वानं कृत्वा विश्वासं व्यक्तीकृतवान् यत् सन्तानाम् आशीर्वादेन जनसहभागितया च उत्तराखण्डः आध्यात्मिक-सांस्कृतिक-क्षेत्रयोः नूतनाः उन्नतयः प्राप्स्यति।

हरिद्वारागमनसमये गुरुकुल-काङ्गडी-हेलिपैड-स्थले जनपदाधिकारी मयूरदीक्षितः, वरिष्ठ-आरक्षक-अधीक्षकः नवनीतसिंहभुल्लरः तथा भारतीयजनता-पक्षस्य कार्यकर्तारः मुख्यमन्त्रिणः भव्यं स्वागतं कृतवन्तः।

अस्मिन् अवसरे परमार्थ-निकेतनस्य स्वामी चिदानन्दसरस्वती, जनपद-पञ्चायत-अध्यक्षा किरणचौधरी, पूर्व-मन्त्रिमण्डल-मन्त्री स्वामी यतीश्वरानन्दः, राज्यमन्त्री सुनीलसैनी, देशराजकर्णवालः, नितिनगौतमः, अजीतचौधरी, शोभाराम-प्रजापतिः, आदेशसैनी, भारतीयजनता-पक्षस्य जनपदाध्यक्षः आशुतोषशर्मा, विकासतिवारी इत्यादयः उपस्थिताः आसन्।

Hindusthan Samachar / Divya Ranjan