हल्द्वानी , 08 जुलाईमासः (हि.स.)।

उत्तराखण्डराज्यस्य अल्पसङ्ख्यकशिक्षाप्राधिकरणस्य अध्यक्षस्य डा सुरजीतसिंहगान्धिनः अध्यक्षतायां नैनीतालजनपदस्य अल्पसङ्ख्यकबालकानाम् उच्चशिक्षायाः कल्याणकारीयोजनानां च क्रियान्वयनविषये समीक्षासभा आयोजिता।

सभायाम् अल्पसङ्ख्यकविभागेन जनपदस्य समस्तमदरसानां प्रबन्धकाः धर्मगुरवः उलेमाश्च आमन्त्रिताः आसन्।

सभायां प्रमुखविषयेषु चर्चा

उच्चशिक्षायाः प्रोत्साहनम्

डा गान्धी उक्तवान् यत् अल्पसङ्ख्यकसमाजस्य बालकान् उच्चशिक्षया संयोजयितुं विशेषप्रयासाः करणीयाः। अस्य कृते छात्रवृत्तेः प्रशिक्षणस्य मार्गदर्शनस्य च योजनानां लाभः प्रत्येकं पात्रं छात्रं यावत् प्रापयितव्यः।

सः निर्देशान् दत्तवान् यत् मध्याह्नभोजनयोजनासहितं केन्द्रसर्वकारस्य राज्यसर्वकारस्य च सर्वासां जनकल्याणकारीयोजनानां लाभः अध्ययनरतं प्रत्येकं बालकं समयबद्धरूपेण प्राप्नुयात् इति सुनिश्चितं करणीयम्।

सभायां धर्मगुरुभिः उलेमाभिश्च मदरसाशिक्षायाः आधारभूतसुविधानां मान्यतायाश्च सम्बद्धाः विविधाः समस्याः प्रस्तुताः। डा गान्धी सर्वेषु विषयेषु गहनं विचारविमर्शं कृत्वा तेषां शीघ्रसमाधानस्य आश्वासनं दत्तवान्। सः उक्तवान् यत् ये विषयाः अद्यापि अवशिष्टाः सन्ति ते अग्रिमसभायां विस्तरेण प्रस्तोष्यन्ते।

सभायाम् ओबीसी आयोगस्य सदस्यः डा जेड ए वारसी उक्तवान् यत् नवीनशिक्षानीतेः माध्यमेन अल्पसङ्ख्यकबालकानां सर्वाङ्गीणविकासः सम्भवः अस्ति। मुख्यधारया संयुज्य एव समाजस्य बालकानां च भविष्यत् उज्ज्वलं भवितुं शक्नोति।

सभायां प्रोफेसर हामिदअली तथा ओबीसी आयोगस्य सदस्या डा एलवाएड्रिनल अपि स्वविचारान् प्रस्तुतवन्तौ।

सभायां मुख्यशिक्षाधिकारी डा रणजीतसिंहनेगी निर्दिष्टः यत् सः मदरसेषु शैक्षिकगुणवत्तायाः शिक्षकाणाम् उपलब्धतायाः आधारभूतसुविधानां च नियमितं निरीक्षणं कुर्यात्। अल्पसङ्ख्यकबालकान् सर्वकारीयोजनाभिः संयोजयितुं विशेषाभियानं सञ्चालनीयम्।

सभायाम् ओबीसी आयोगस्य सदस्यः डा जेड ए वारसी डा एलवाएड्रिनल मुख्यशिक्षाधिकारी डा रणजीतसिंहनेगी मदरसाधर्मगुरुः मौलाना एस राजा सहिताः जनपदस्य विभिन्नमदरसेभ्यः आगताः धर्मगुरवः उलेमाः शिक्षाविभागस्य अधिकारिणश्च उपस्थिताः आसन्।

Hindusthan Samachar / Dheeraj Maithani