Enter your Email Address to subscribe to our newsletters
नव दिल्ली, 09 जुलाईमासः(हि.स.)।
अखिलभारतीयविद्यार्थिपरिषदा स्वस्य अष्टसप्ततितमस्य स्थापनादिवसस्य राष्ट्रियविद्यार्थिदिवसस्य च अवसरे गुरुवासरे देशस्य सर्वत्र विश्वविद्यालयेषु महाविद्यालयेषु विविधासु च एककेषु नानाविधकार्यक्रमान् आयोज्य राष्ट्रनिर्माणे छात्रशक्तेः भूमिकां रेखाङ्कितवती। अस्मिन् अवसरे सेवा सङ्गठनं राष्ट्रं प्रथमम् इति सङ्कल्पं पुनरुद्घोष्य आगामिवर्षे सञ्चालयिष्यमाणानां राष्ट्रव्याप्यभियानानामपि सूचना प्रदत्ता।
अखिलभारतीयविद्यार्थिपरिषदः अनुसारं दिल्लीविश्वविद्यालये, जवाहरलालनेहरूविश्वविद्यालये, वाराणसीस्थिते काशीहिन्दूविश्वविद्यालये, दीनदयालोपाध्यायगोरखपुरविश्वविद्यालये, इलाहाबादविश्वविद्यालये, पञ्जाबविश्वविद्यालये, हैदराबादविश्वविद्यालये च सहितं देशस्य सर्वत्र विश्वविद्यालयेषु महाविद्यालयेषु नगरेषु जनपदेषु च सङ्गोष्ठ्यः, युवसंवादाः, रक्तदानशिबिराणि, वृक्षारोपणकार्यक्रमाः, स्वच्छताभियानानि, वृत्तिमार्गदर्शनकार्यक्रमाः, निबन्धप्रतियोगिताः, वादविवादप्रतियोगिताः, सांस्कृतिककार्यक्रमाः विचारगोष्ठ्यश्च आयोजिताः। अनेन सह स्वामिविवेकानन्दस्मारकेषु श्रद्धाञ्जलिकार्यक्रमाः स्वच्छताकार्यक्रमाश्च आयोजिताः। एतेषां कार्यक्रमाणां माध्यमेन विद्यार्थिभिः राष्ट्रहितस्य समाजहितस्य च प्रति स्वप्रतिबद्धता व्यक्ता।
अस्मिन् अवसरे विद्यार्थिनः अखिलभारतीयविद्यार्थिपरिषदो विविधैः रचनात्मकाभियानैः गतिविधिभिश्च परिचिताः कारिताः। एतेषु सेवार्थविद्यार्थी, विकासार्थविद्यार्थी, राष्ट्रियकलामञ्चः, शोधायामः, खेलोभारत, मिशनसाहसी तथा अन्ताराज्यछात्रजीवनदर्शनम् एसईआईएल इत्यादयः प्रमुखाः आसन्।
सङ्गठनेन आगामिवर्षे सञ्चालयिष्यमाणानां प्रमुखराष्ट्रव्याप्यभियानानामपि रूपरेखा प्रस्तुता। एतेषु ‘स्क्रीनटाइम् तः सक्रियतासमयः’, ‘एसईआईएल षष्टिवर्षाणि’, ‘वन्देमातरम् इत्यस्य पञ्चाशदधिकशतवर्षाणि’, आपत्कालविरोधस्य पञ्चाशद्वर्षाणि, श्रीगुरुतेगबहादुरस्य पञ्चाशदधिकत्रिशततमं बलिदानवर्षम् तथा सन्तरविदासस्य पञ्चाशदधिकषट्शततमं प्राकट्योत्सववर्षम् इत्येतेषु विषयेषु सम्बद्धकार्यक्रमाणां योजना अपि प्रकाशितवती।
अखिलभारतीयविद्यार्थिपरिषदा उक्तं यत् स्वस्य अष्टसप्ततिवर्षात्मिकायां यात्रायां सङ्गठनेन छात्रान्दोलनैः सह सेवा, शिक्षासुधारः, सामाजिकदायित्वम्, राष्ट्रियैकात्मता, महिलासशक्तीकरणम्, पर्यावरणसंरक्षणम्, अनुसन्धानम्, क्रीडा, कला व्यक्तित्वनिर्माणं च इत्येतेषु क्षेत्रेषु उल्लेखनीयकार्याणि कृतानि। सङ्गठनेन उक्तं यत् सप्तसप्ततिलक्षाधिकैः सक्रियसदस्यैः सह तत् विश्वस्य बृहत्तमं छात्रसङ्गठनम् अस्ति।
अभाविप इत्यस्य राष्ट्रियमहामन्त्री डॉ. वीरेन्द्रसिंहसोलङ्की काशीहिन्दूविश्वविद्यालये आयोजितं ‘वसुन्धरा’ कार्यक्रमं सम्बोधयन् अवदत् यत् विद्यार्थीपरिषदा स्वस्य अष्टसप्ततिवर्षात्मिकायां यात्रायां विद्यार्थिनां सर्वाङ्गीणविकासः राष्ट्रपुनर्निर्माणस्य लक्ष्येन सह संयोजितः। सः देशस्य सर्वत्र विद्यार्थिनः ज्ञानस्य चरित्रस्य सामाजिकदायित्वस्य राष्ट्रभक्तेश्च मूल्यानि स्वीकृत्य भारतनिर्माणे सक्रियां भूमिकां निर्वोढुम् आहूतवान्। सः अवदत् यत् विद्यार्थिनः केवलं भविष्यस्य नागरिकाः न सन्ति, अपितु वर्तमानस्य राष्ट्रनिर्मातारः सन्ति।
---------------
Hindusthan Samachar / Dheeraj Maithani