जम्मूः, 09 जुलाईमासः (हि.स.)।

कठोरसुरक्षाव्यवस्थायाः मध्ये गुरुवासरे अष्टसहस्राधिकानाम् अमरनाथतीर्थयात्रिणाम् अष्टमः समूहः जम्मूनगरस्य भगवतीनगरस्थितात् यात्रिनिवासमूलशिबिरात् दक्षिणकाश्मीरस्य हिमालयक्षेत्रे स्थितस्य गुहामन्दिरस्य द्वयोः मूलशिबिरयोः कृते प्रस्थितः।

अधिकारिभिः कथितं यत् अष्टसहस्रं शतं पञ्चाशत् तीर्थयात्रिणः प्रातःकाले एव जम्मूमूलशिबिरात् लघुभारवाहनानि महाभारवाहनानि च समाविश्य त्रिशतचतुस्त्रिंशद्वाहनानां समूहैः प्रस्थिताः। अस्मिन् यात्रिसमूहे बालटालस्य कृते त्रिसहस्रं चतुश्शतं पञ्चचत्वारिंशत् तथा पहलगामस्य कृते चतुःसहस्रं सप्तशतं पञ्च तीर्थयात्रिणः समाविष्टाः आसन्। ते बहुस्तरीयसुरक्षाव्यवस्थायाः मध्ये यात्रायै प्रस्थिताः।

यात्रा सुरक्षिता निर्विघ्ना च सम्पन्ना भवेत् इति सुनिश्चित्य नागरिकप्रशासनेन आरक्षिदलेन सुरक्षाबलैः श्रीअमरनाथश्राइनबोर्डेन च संयुक्तरूपेण व्यवस्थाः कृताः आसन्।

जम्मूकाश्मीरप्रशासनेन तीर्थयात्रिभ्यः अनुरोधः कृतः यत् ते सुनिश्चितपञ्जीकरणानन्तरमेव यात्रायाः निर्धारिततिथौ च यात्रां कुर्युः, यतः अपञ्जीकृतस्य कस्यापि तीर्थयात्रिणः मूलशिबिरपर्यन्तं गमनाय अनुमतिः न प्रदास्यते।

जम्मूकाश्मीरस्य उपराज्यपालेन मनोजसिन्हावर्येण द्वितीये जुलाईदिने जम्मूनगरात् यात्रायाः प्रथमः समूहः हरितध्वजं प्रदर्श्य प्रेषितः आसीत्।

---------------

Hindusthan Samachar / Dheeraj Maithani