उरई, 09 जुलाईमासः (हि.स.)।

जनपदे हरितवातावरणस्य निर्माणाय व्यापकवृक्षारोपणाभियानस्य गतिवर्धनाय च जिलाधिकारी राजेशकुमारपाण्डेयः गुरुवासरे समाहरणालयसभागारे समीक्षागोष्ठीम् आयोज्य सम्बन्धितविभागानाम् अधिकारिभ्यः आवश्यकान् निर्देशान् दत्तवान्। सः अवदत् यत् वृक्षारोपणं केवलम् औपचारिकता न भवेत्, अपितु जनसहभागितया जनान्दोलनरूपेण प्रवर्तनीयम्।

जिलाधिकारी निर्देशं दत्तवान् यत् जनपदे यासां गोशालानां विलयनं सम्पन्नम् अस्ति तथा ये परिसराः सम्प्रति रिक्ताः सन्ति, तत्र व्यापकस्तरे वृक्षारोपणं कारयितव्यम्। सः अवदत् यत् एतानि स्थलानि हरितक्षेत्ररूपेण विकसितुं कार्ययोजना तत्कालं निर्मातव्या तथा अद्यैव वीबीजी राम जी इत्यस्य अन्तर्गतं गर्तखननकार्यं प्रारम्भणीयम्, येन निर्धारितसमये वृक्षारोपणकार्यं सुव्यवस्थितरूपेण सम्पन्नं भवेत्।

सः अधिकारिभ्यः अवदत् यत् आगामिनः एकसप्ताहस्य अन्तः जनपदस्य सर्वासु ग्रामपञ्चायतेषु विशेषग्रामसभानाम् आयोजनं सुनिश्चितं क्रियताम्। एतासु ग्रामसभासु ‘हरितपञ्चायताभियानम् मम पञ्चायत् हरितपञ्चायत्’ इत्यस्य उद्देश्यस्य, पर्यावरणसंरक्षणस्य महत्त्वस्य तथा अधिकाधिकवृक्षारोपणस्य विषये ग्रामीणजनाः जागरूकाः करणीयाः, जनसहभागिता च सुनिश्चिता करणीया।

जिलाधिकारी अवदत् यत् प्रत्येकं ग्रामपञ्चायत् स्थानीयपरिस्थितीनाम् अनुरूपं वृक्षारोपणलक्ष्यं निर्धारयेत् तथा वृक्षारोपणेन सह रोपितवृक्षाणां संरक्षणस्यापि प्रभावकारिणी व्यवस्था सुनिश्चिता क्रियताम्। सः अधिकारिभ्यः निर्देशं दत्तवान् यत् अभियानस्य नियमितम् अनुश्रवणं कुर्वन्तः वृक्षारोपणसम्बद्धासु सज्जतासु कस्यापि प्रकारस्य प्रमादः न करणीयः।

सम्बन्धितविभागानाम् अधिकारिभ्यः निर्देशः प्रदत्तः यत् सर्वाः सज्जताः समयबद्धरूपेण पूर्णाः कृत्वा जनपदे व्यापकवृक्षारोपणाभियानं सफलं क्रियताम्, येन पर्यावरणसंरक्षणेन सह आगामिपीढीनां कृते हरितं स्वच्छं च वातावरणं सुनिश्चितं कर्तुं शक्येत।

अस्मिन् अवसरे अपरजिलाधिकारी नमामिगङ्गे प्रेमचन्द्रमौर्यः, प्रभागीयवनाधिकारी प्रदीपयादवः, अपरपुलिसाधीक्षकः ईशानसोनी तथा अन्ये सम्बन्धिताधिकारिणः उपस्थिताः आसन्।

हिन्दुस्थान समाचार / Dheeraj Maithani