Enter your Email Address to subscribe to our newsletters
मन्दसौरः, ०९ जुलाईमासः (हि.स.)। केन्द्रीय-मार्ग-परिवहन-राजमार्गमन्त्री नितिनगडकरी दिल्ली-मुम्बई-वेगमार्गस्य निरीक्षणं कुर्वन् बुधवासरे रात्रौ मध्यप्रदेशस्य मन्दसौर-जनपदस्य गरोठ-नगरम् अगच्छत्। अस्मिन् अवसरे स्थानीयजनाः तस्मै क्षेत्रे निरन्तरं वर्धमानानां मार्गदुर्घटनानां तथा वेगमार्ग-निर्माणकारणेन कृषिक्षेत्रेषु जलसञ्चयम् इव गम्भीरसमस्यासु ध्यानं दातुम् अनुरोधम् अकुर्वन्।
वस्तुतः केन्द्रीयमन्त्री गडकरी देशस्य दीर्घतमस्य दिल्ली-मुम्बई अष्टपङ्क्तीय-वेगमार्गस्य प्रगतिनिरीक्षणार्थं द्विदिवसीयं भ्रमणं बुधवासरे प्रातःकाले देहल्याः आरब्धवान्। ततः सः राजस्थानस्य कोटानगरं मार्गेण गत्वा रात्रौ मध्यप्रदेशस्य मन्दसौर-जनपदस्य गरोठम् अगच्छत् तथा तत्र रूपरा-परिपथ-विश्रामगृहे रात्रिविश्रामम् अकरोत्।
केन्द्रीयमन्त्रिणः आगमनस्य दृष्ट्या सम्पूर्णे जनपदे सुदृढाः सुरक्षाव्यवस्थाः कृताः आसन्। वरिष्ठाधिकारिणां निरीक्षणे सम्पूर्णमार्गे बहुसंख्यकः आरक्षकबलं नियुक्तम् आसीत्। गरोठनगरात् प्रायः त्रिकिलोमीटरपूर्वं रूपराग्रामस्थिते एनएचएआई-विश्रामक्षेत्रे तस्य वाहनसमूहः किञ्चित्कालं स्थितवान्। तत्र प्रशासनिकाधिकारिणः स्थानीयजन-प्रतिनिधयश्च तस्य स्वागतं कृतवन्तः।
स्वागतकर्तृषु जनपदपञ्चायताध्यक्षा दुर्गापाटीदार:, सुवासरा-विधानसभाक्षेत्रस्य विधायकः हरदीपसिंहडङ्ग:, गरोठ-विधायकः चन्द्रसिंहसिसौदिया, नगर-पालिकाध्यक्षः राजेशसेठिया, जनपदाधीशा अदितिगर्ग:, आरक्षक-विभागस्य तथा एनएचएआई-संस्थायाः वरिष्ठाधिकारिणश्च उपस्थिताः आसन्। अस्मिन्नवसरे जनप्रतिनिधिभिः प्रसिद्धायाः दूधाखेड़ी-मातु: चित्रं केन्द्रीयमन्त्रिणे उपायनरूपेण समर्पितम्।
दीर्घयात्रायाः श्रमकारणात् केन्द्रीयमन्त्री केनापि सह विस्तृतवार्तालापं न कृतवान्, सः तु भोजनार्थं प्रत्यक्षमेव गतवान्। विश्रामकाले सुवासरा-विधायकः हरदीपसिंहडङ्गः केन्द्रीयमन्त्रिणा सह मिलित्वा क्षेत्रस्य सम्पर्कसुविधासम्बद्धं निवेदनपत्रं तस्मै समर्पितवान्। तेन सुवासरा-विधानसभाक्षेत्रस्य हरिपुर तथा खेताखेड़ा ग्रामयोः वेगमार्ग-संयोजनस्य व्यवस्था करणीयेति प्रमुखतया निवेदितम्। अस्मिन् विषये केन्द्रीयमन्त्री सकारात्मककार्यवाह्याः आश्वासनम् अददात्।
उल्लेखनीयम् अस्ति यत् देहलीतः मुम्बईपर्यन्तं निर्मीयमाणः अयं १३५० किलोमीटर-दीर्घः अष्टपङ्क्तीय-वेगमार्गः प्रायः १ लक्षं १० सहस्रकोटि-रूप्यकाणां व्ययेन निर्मीयते। तस्य प्रायः २४४ किलोमीटर-दीर्घः भागः मध्यप्रदेशात् गच्छति। अयं भागः मुख्यतया रतलाम, मन्दसौर तथा झाबुआ-जनपदैः गच्छन् एतेषां क्षेत्राणां विकासे महत्त्वपूर्णं योगदानं दास्यति।
केन्द्रीयमन्त्री नितिनगडकरी रूपरा-विश्रामगृहे रात्रिविश्रामानन्तरम् अद्य गुरुवासरे रतलाममार्गेण गुजरातस्य बडोदानगरं गमिष्यति। अस्मिन् भ्रमणे सः थान्दला तथा दाहोद-नगरयोः मध्ये अपूर्णं निर्माणकार्यं अपि निरीक्षिष्यति।
Hindusthan Samachar / Divya Ranjan