नव दिल्ली, 09 जुलाईमासः (हि.स.)।

देशे सर्वत्र जुलाईमासस्य नवमदिनाङ्कः राष्ट्रियविद्यार्थिदिवसरूपेण आचर्यते। अस्मिन्नेव दिने १९४९ तमे वर्षे अखिलभारतीयविद्यार्थिपरिषदः स्थापना अभवत्। अस्मिन् अवसरे छात्रसङ्गठनेन देशस्य सर्वत्र विविधकार्यक्रमाः आयोजिताः।

अस्यैव क्रमस्य अन्तर्गतं राष्ट्रियविद्यार्थिदिवसस्य अखिलभारतीयविद्यार्थिपरिषदः अष्टसप्ततितमस्थापनादिवसस्य च अवसरे मुम्बईस्थिते अभाविप इत्यस्याः केन्द्रीयकार्यालये ध्वजारोहणं कृतम्। अस्मिन् अवसरे केन्द्रीयसचिवालयसचिवः गौरवसिंहराजावतः पश्चिमक्षेत्रीयसङ्गठनमन्त्री गीतेशचव्हाणश्च प्रमुखरूपेण उपस्थितौ आस्ताम्।

राष्ट्रियविद्यार्थिदिवसस्य अवसरे प्रसारिते सन्देशे छात्रसङ्गठनेन उक्तं यत् अभाविप इत्यस्याः उद्देश्यम् केवलं छात्रराजनीतिपर्यन्तं सीमितं नास्ति, अपितु विद्यार्थिषु राष्ट्रभक्तेः, अनुशासनस्य, नेतृत्वक्षमतायाः सामाजिकोत्तरदायित्वभावनायाश्च विकासोऽपि अस्याः उद्देश्यम् अस्ति। सङ्गठनस्य मतानुसारं छात्रशक्तिः राष्ट्रस्य महत्तमा ऊर्जा अस्ति तथा तस्यै सकारात्मकदिशां प्रदाय देशस्य विकासे महत्त्वपूर्णं योगदानं दातुं शक्यते।

सङ्गठनेन सम्बद्धाः वरिष्ठकार्यकर्तारः स्वछात्रजीवनस्य अनुभवान् विनिमयं कुर्वन्तः अवदन् यत् अभाविप इत्यनया ते सेवा, समर्पणं, राष्ट्रं प्रथमम् इति भावं च शिक्षिताः। तेषाम् अनुसारं परिषदा छात्रसमस्यानां समाधानस्य सहैव सांस्कृतिकचेतनायाः, राष्ट्रियैकतायाः चरित्रनिर्माणस्य च कृते निरन्तरं कार्यं कृतम् अस्ति।

अखिलभारतीयविद्यार्थिपरिषदा स्वकार्यकाले शिक्षासम्बद्धेषु विविधविषयेषु यथा शुल्कवृद्धिः, परीक्षाप्रणाल्यां पारदर्शिता, शिक्षायाः वाणिज्यीकरणं गुणवत्तापूर्णशिक्षा च इत्यादिषु समये समये आन्दोलनानि कृतानि। सङ्गठनेन १९७५ तमे वर्षे आपत्कालस्य समये लोकतन्त्ररक्षणार्थम् आयोजिते आन्दोलने सहभागिता कृता। एतदतिरिक्तं पूर्वोत्तरभारते, सीमावर्तिक्षेत्रेषु जम्मूकश्मीरप्रदेशे च राष्ट्रियैकात्मतासम्बद्धेषु अभियानेषु अपि सक्रियभूमिका निर्व्यूढा। १९९० तमे वर्षे ‘कश्मीरं रक्षत अभियानम्’ तथा असमप्रदेशे अवैधप्रवेशस्य विरोधेऽपि परिषदा व्यापकाभियानानि सञ्चालितानि।

सामाजिकसरोकारक्षेत्रेऽपि अभाविप इत्यनया वृक्षारोपणम्, रक्तदानम्, आपद्सहायता, पर्यावरणसंरक्षणं तथा ‘विकासार्थविद्यार्थी’ इत्याद्यभियानानां माध्यमेन विद्यार्थिनः समाजसेवया सह संयोजयितुं प्रयासः कृतः। सङ्गठनस्य मतम् अस्ति यत् आधुनिकविज्ञानस्य भारतस्य प्राचीनज्ञानपरम्परायाश्च समन्वयः देशस्य समग्रविकासस्य आधारः भवितुं शक्नोति।

अभाविप इत्यस्याः कथनानुसारं राष्ट्रवादः तस्याः कृते भारतस्य सांस्कृतिकचेतनायाः प्रतीकः अस्ति। सङ्गठनं लोकतान्त्रिकसंवादस्य, अध्ययनस्य वैचारिकविमर्शस्य च माध्यमेन राष्ट्रियैकताम् अखण्डतां च सुदृढीकर्तुं बलं ददाति।

सङ्गठनस्य अनुसारं स्वस्य सप्तसप्ततिवर्षात्मिकायां यात्रायाम् अभाविप इत्यनया शिक्षा, विज्ञानम्, प्रशासनम्, न्यायपालिका, सेना, पत्रकारिता, उद्योगः, राजनीतिः सामाजिकजीवनं च सहितेषु अनेकेषु क्षेत्रेषु नेतृत्वं प्रदातुं समर्थाः कार्यकर्तारः निर्मिताः। परिषदः कथनानुसारं तस्याः महत्तमा उपलब्धिः एतादृशानां युवानां निर्माणम् अस्ति, ये राष्ट्रहितं सर्वोपरि मन्यमानाः समाजस्य देशस्य च सेवायै समर्पितभावेन कार्यं कुर्वन्ति।

---------------

Hindusthan Samachar / Dheeraj Maithani