जींद, 09 जुलाईमासः (हि.स.)।

हरियाणाराज्यस्य सामाजिकन्यायाधिकारितामन्त्री कृष्णकुमारबेदी अवदत् यत् जुलाईमासस्य १७ दिनाङ्के प्रधानमन्त्रिणा नरेन्द्रमोदिना परियोजनानाम् उद्घाटनैः शिलान्यासैश्च राज्ये नूतनविश्वासस्य विकासस्य भविष्यस्य च सङ्गमः भविष्यति। प्रधानमन्त्रिणः एषः प्रवासः हरियाणाराज्ये सुदृढाधारभूतसंरचनायाः औद्योगिकव्यापारिकगतिविधीनां च नूतनावसराणां विस्तारस्य च प्रोत्साहकः भविष्यति। राज्यस्य जनाः परियोजनानां प्रत्यक्षलाभं प्राप्स्यन्ति, स्वास्थ्यसेवानां सुदृढसम्पर्कसुविधानां च लाभमपि लप्स्यन्ते।

हरियाणाराज्यस्य सामाजिकन्यायाधिकारितामन्त्री कृष्णकुमारबेदी गुरुवासरे विश्रामगृहे पत्रकारैः सह वार्तालापं कुर्वन् आसीत्। बेदी अवदत् यत् जीन्दस्य एकलव्यक्रीडाङ्गणे आयोज्यमाना जनसभा पूर्णतया पर्यावरणानुकूला भविष्यति। जुलाईमासस्य १७ दिनाङ्के राज्ये विकासस्य नूतनयुगस्य श्रीगणेशः भविष्यति। अस्मिन् दिने प्रधानमन्त्री नरेन्द्रमोदी जीन्दतः देशस्य प्रथमां हाइड्रोजनसञ्चालितां रेलयानसेवां हरितध्वजं प्रदर्श्य प्रस्थापयिष्यति।

अनेन सह प्रधानमन्त्री भिवानीनारनौलयोः नवनिर्मितयोः द्वयोः विशालयोः श्रीरामचिकित्सामहाविद्यालययोः उद्घाटनं करिष्यति। सः दश किलोमीटरदीर्घस्य कुरुक्षेत्रोन्नतरेलमार्गस्यापि शुभारम्भं करिष्यति। अस्य रेलमार्गस्य निर्माणेन क्षेत्रवासिनः प्रायः अर्धदर्जनरेलमार्गसमपारस्थलेषु जायमानात् यातायातावरोधात् मुक्तिं प्राप्स्यन्ति।

कृष्णकुमारबेदी अग्रे अवदत् यत् प्रधानमन्त्री अम्बाला कालाअम्ब हरितक्षेत्रीयचतुर्मार्गीयवीथिकायाः विस्तारस्य, दिल्लीकटरा-द्रुतमार्गस्य हरियाणाखण्डस्य उद्घाटनस्य, जीन्दगोहाना राष्ट्रियमार्गस्य ३५२ ए इत्यस्य, हांसीबरवालाचतुर्मार्गस्य तथा बीकानेरसिवानीसोनीपतमार्गपरियोजनानां विस्तारस्य च सम्बन्धितकार्यक्रमेषु भागं ग्रहीष्यति। सः कुरुक्षेत्रे अत्याधुनिकस्य सिखसङ्ग्रहालयस्य शिलान्यासमपि करिष्यति।

तथैव प्रधानमन्त्री आभासीयमाध्यमेन राज्यस्य अन्येषु क्षेत्रेषु अपि विकासपरियोजनानां लोकार्पणं शुभारम्भं च करिष्यति। एतासां सर्वासां परियोजनानाम् उद्घाटनं शिलान्यासश्च जीन्दे प्रस्तावितायाः जनसभायाः स्थलादेव आभासीयमाध्यमेन करिष्यते। एतदतिरिक्तं कोटिरूप्यकमूल्यानाम् अन्यासामपि विकासपरियोजनानाम् उद्घाटनं शिलान्यासं च प्रधानमन्त्री करिष्यति।

प्रधानमन्त्रिणः जीन्दप्रवासः राज्यस्य विकासस्य साक्षी भविष्यति तथा प्रगतेः नूतनम् इतिहासं रचयिष्यति।

---------------

Hindusthan Samachar / Dheeraj Maithani