देहरादूननगरम्, ०९ जुलाईमासः (हि.स.)। मुख्यमन्त्री पुष्करसिंहधामी राज्ये ऋण-निक्षेपानुपातं वर्धयितुं न्यूनप्रदर्शनयुक्तेषु जनपदेषु नियमितशिविराणाम् आयोजनं तथा पात्रजनानां कृते समयबद्धरीत्या ऋणप्रदानस्य निर्देशान् दत्तवान्।

मुख्यमन्त्री धामी गुरुवासरे सचिवालये आयोजितायां राज्यस्तरीयवित्त-कोषाध्यक्षसमितेः सप्तनवतितमे अधिवेशने वित्तसेवानां, ऋणवितरणस्य, वित्तीयसमावेशनस्य तथा विविध-स्वरोजगार-योजनानां समीक्षां कुर्वन् अवदत् यत् राज्यस्य आर्थिक-विकासे वित्तकोषक्षेत्रस्य महत्त्वपूर्णा भूमिका वर्तते। तेन वित्तसंस्थाभ्यः कृषकेभ्यः, युवभ्यः, महिलाभ्यः, उद्यमिभ्यः तथा सामान्य-जनेभ्यः ऋणप्राप्तिं सुकरां कर्तुम् आह्वानं कृतम्।

मुख्यमन्त्री बागेश्वर-पौडी-अल्मोडा-रुद्रप्रयाग-पिथौरागढ-टिहरी-जनपदेषु न्यूनऋण-निक्षेपानुपातं प्रति चिन्तां प्रकटयन् जनपदप्रशासनस्य, प्रमुखवित्त-कोषस्य तथा सम्बद्धविभागानां समन्वयेन नियमितशिविराणि आयोजयितुं, पात्र-लाभार्थिनां परिचयं कृत्वा तेभ्यः ऋणं प्रदातुं च निर्देशान् दत्तवान्। सः उक्तवान् यत् राज्यस्य ऋण-निक्षेपानुपातः राष्ट्रियमाध्यमपरिमाणं प्राप्तुं लक्ष्यीकृत्य कार्यं क्रियताम्।

सः अवदत् यत् कस्यापि पात्रस्य जनस्य सर्वकारीययोजनानां लाभग्रहणे काचिदपि कठिनता न भवेत्। यदि आवेदनपत्रे काचित् न्यूनता भवति, तर्हि तां केवलं तान्त्रिककारणेन निराकर्तुं न युक्तम्, अपितु सम्बद्धस्य जनस्य मार्गदर्शनं कृत्वा तस्य न्यूनताः परिपूरयितव्याः।

मुख्यमन्त्री अवदत् यत् वित्तीयवर्षे २०२५–२६ वार्षिक-ऋणयोजनायाः अन्तर्गतं प्रायः ९६ प्रतिशतस्य तथा सूक्ष्म-लघु-मध्यमोद्यमक्षेत्रे १११ प्रतिशतस्य उपलब्धिः राज्यस्य आर्थिकप्रगतिम् सूचयति। तेन मुख्यमन्त्री-स्वरोजगार-योजना-२.०, वीरचन्द्रसिंहगढवाली-स्वरोजगार-योजना, गृहावास-योजना, प्रधानमन्त्री-विश्वकर्मा-योजना, प्रधानमन्त्री-मुद्रा-योजना तथा कृषक-ऋणपत्र-योजना इत्यादीनां योजनानां पात्रलाभार्थिभ्यः प्राथमिकतया ऋणप्रदाने बलं दत्तवान्।

तेन कृषिक्षेत्रे, उद्यानिकीक्षेत्रे, पशुपालने, मत्स्यपालने, पर्यटनक्षेत्रे तथा स्थानीयोत्पादाधारितोद्यमेषु वित्तसंस्थानां सहयोगः वर्धनीयः इति निर्देशः प्रदत्तः। अपि च डिजिटल-वित्तसेवाः तथा डिजिटल-प्रदानव्यवस्था ग्रामे ग्रामे प्रसारयितव्या इति निर्दिष्टम्।

अस्मिन् अवसरे मुख्यसचिवः आनन्दवर्द्धनः साइबर-वंचन-निवारणार्थं १९३० सहायता-दूरवाणीसंख्यया भारतीय-स्टेट-बैंक, पंजाब-नेशनल-बैंक, आईसीआईसीआई-बैंक तथा एचडीएफसी-बैंक इत्येतयोः प्रतिनिधीन् संयोजयितुं विचारं दत्तवान्, येन एतादृशेषु प्रकरणेषु शीघ्रकार्यवाहीं कर्तुं शक्येत। तेन एसएलबीसी-समितेः अधिवेशनात् पूर्वं उपसमितेः नियमिताधिवेशनस्य आयोजनं तथा स्वरोजगार-लघूद्योग-एमएसएमई-क्षेत्रेषु ऋणप्रवाहस्य वर्धनम् अपि बलपूर्वकं प्रतिपादितम्।

अस्मिन् अवसरे डॉ.आर.मीनाक्षी-सुन्दरम्, सचिवः दिलीपजावलकरः, नितेशझा, डॉ.बी.वी.आर.सी. पुरुषोत्तमः, विनय-शङ्करपाण्डेयः, एस.एन.पाण्डेयः, श्रीधरबाबू-अदाङ्की, धीराजगर्ब्यालः, भारतीयरिजर्वबैंक इत्यस्य क्षेत्रीयनिदेशकः अरविन्दकुमारः, मुख्यमहाप्रबन्धकः हर्षकुमारगौतमः, नाबार्डस्य महाप्रबन्धकः पङ्कजयादवः, उत्तराखण्ड-उद्योगसङ्घस्य अध्यक्षः पङ्कजगुप्तः, भारतीय-स्टेट-बैंक इत्यस्य नवदिल्लीस्थितः मुख्य-महाप्रबन्धकः प्रभासबोसः, महाप्रबन्धकः शैलेशकुमारः, एसबीआई-देहरादूनस्य उप-महाप्रबन्धकः राजीव-रञ्जनः, एसबीआई-हल्द्वानी इत्यस्य उप-महाप्रबन्धकः राजीवरञ्जनरतनः, एसएलबीसी-उत्तराखण्डस्य सहायक-महाप्रबन्धकः शैलेन्द्रकुमारः उनियालः तथा अन्ये गणमान्याः उपस्थिताः आसन्।

Hindusthan Samachar / Divya Ranjan