लखनऊ, 10 अगस्तमासः (हि.स.)। बहुजनसमाजपार्टी इति राजनैतिकदलस्य राष्ट्रियाध्यक्षा मायावती देशे वर्धमानायां बेरोजगारीसमस्यायां महङ्गतायां च स्वचिन्तां व्यक्तवती। तया केन्द्रसर्वकारेभ्यः राज्यसर्वकारेभ्यश्च आग्रहः कृतः यत् ते सर्वथा मुनाफाखोरीं, लाभार्जनकेन्द्रितां व्यापारिकां चिन्तनपद्धतिं प्रवृत्तिं च परित्यज्य संविधानस्य यथार्थां मानवतावादीं कल्याणकारीं नीतिं सिद्धान्तं च पूर्णेन प्रामाणिकत्वेन निष्ठया च कार्यान्वित्य अग्रे वर्धयेयुः। सा नीतिः ‘प्रत्येकस्मै हस्ताय कार्यम्’ इति भावनां पूरयितुं समर्था, व्यापकदेशहिते जनहिते च सहस्रदुःखनिवारणाय एका औषधिरिव वर्तते। एष एव सर्वकारेभ्यः मम आग्रहः इति तया उक्तम्।

बहुजनसमाजपार्टीप्रमुखा सोमवासरे सामाजिकमाध्यमे लिखितवती यत् बहुजनसमाजपार्टी उत्तरप्रदेशे स्वशासनकाले आरक्षीविभागे पञ्चायतीराजविभागे च प्रायः सार्धद्विलक्षं नवीनानि सर्वकारीयपदानि सृष्टवती। तदतिरिक्तं नियुक्त्यर्थं प्रवर्तमाने प्रतिबन्धेऽपि अपसारिते सर्वसमाजस्य बहूनां लक्षाणां जनानां सर्वकारीयसेवासु नियुक्तिः कृता। ततः परं शासनात् बहिः स्थित्वा सा दीर्घकालतः देशे विशेषतः उत्तरप्रदेशे, उत्तराखण्डे, पञ्जाबे च व्याप्तस्य तीव्रमहङ्गतायाः, अतिदारिद्र्यस्य, बेरोजगारीसमस्यायाः, अशिक्षायाः, दुरवस्थाप्राप्तायाः स्वास्थ्यव्यवस्थायाः, पश्चाद्गतेः, तज्जनितस्य विवशप्रवासस्य, महिलानामसुरक्षायाः, प्रश्नपत्रभेदनस्य, भ्रष्टाचारस्य च इत्यादीनां ज्वलन्तानां विषयाणां गम्भीरसमस्यानां च समाधानाय प्रभावीपदानि ग्रहीतुं केन्द्रसर्वकारं राज्यसर्वकारांश्च पुनः पुनः आग्रहं कुर्वती आगता।

किन्तु सर्वकाराः पूर्वतनानां काङ्ग्रेसशासितसर्वकाराणामिव अधिकांशविषयेषु उदासीनाः लापरवाहाश्च एव वर्तन्ते। देशस्य अवनतिं गच्छतां राजनैतिकानाम्, आर्थिकानां, संसदीयानां, सामाजिकानां च परिस्थितीनां दृष्ट्या एतत् अत्यन्तं दुःखदं चिन्ताजनकं च वर्तते।

अधुना यदा ‘काकरोच जनता पार्टी’ इति नाम्ना विशेषतः बेरोजगारीसमस्यया अन्धकारमयेन भविष्येन च पीडिताः सन्तप्ताश्च शिक्षिताः युवानः विशेषरूपेण दिल्ल्यां जन्तरमन्तरे षट्त्रिंशद्दिनानि यावत् आन्दोलनं कृत्वा एतान् ज्वलन्तान् विषयान् राष्ट्रियमहत्त्वस्य विशेषगम्भीरचर्चायाः विषयत्वेन प्रतिष्ठापितवन्तः, तदा केन्द्रसर्वकारैः राज्यसर्वकारैश्च देशस्य प्रायः सार्धशतकोटि-दरिद्राणां, श्रमिकाणां, युवानां, महिलानां, अन्येषां च परिश्रमजीविनां तथा विशेषतः बेरोजगारीपीडितानां लक्षशः परिवाराणां वास्तविकां चिन्तां कृत्वा अन्यत्सर्वं विस्मृत्य तत्कालं कार्यप्रदानस्य प्रक्रिया प्रारब्धव्या।

सर्वकारीयसेवासु विशेषं ध्यानं दातुं आवश्यकता वर्तते। सर्वेषु सर्वकारीयविभागेषु रिक्तानि स्थितानि लक्षशः पदानि प्रश्नपत्रभेदनभ्रष्टाचाराभ्यां मुक्तया समयबद्धया नियुक्तिप्रक्रियया पूरयितुं तत्कालं प्रक्रिया प्रारब्धव्या। एवं यदि एकस्मिन् परिवारे एकस्यापि सदस्यस्य सर्वकारीयसेवायां नियुक्तिर्भवति तर्हि लक्षशः परिवाराणां प्रत्यक्षरूपेण कल्याणं भविष्यति। सहैव अनेन अनुसूचितजातीनां, अनुसूचितजनजातीनां, अन्यपश्चाद्वर्गाणां च समाजानामपि लाभः प्राप्तुं शक्यते।

मायावती उक्तवती यत् जन्तरमन्तरे आन्दोलनं कुर्वतां छात्राणां छात्राणीनां बेरोजगारयुवानां च विषयान् आधारीकृत्य संसदः वर्तमानसत्रे इदानीमपि निरन्तरं प्रवर्तमानस्य गतिरोधस्य समाप्तिरपि आवश्यकास्ति, येन समुचितचर्चां विना सर्वकारीयविधेयकानां पारितत्वेन विधिरूपेण परिणमनस्य प्रक्रियायामपि विरामः स्थापयितुं शक्येत।-----------

Hindusthan Samachar / Dheeraj Maithani