नवदिल्ली, १० अगस्तमासः (हि.स.)। लोकसभाध्यक्षः ओमबिरला सोमवासरे कार्य-मन्त्रणा-समित्याः सभायां भावुकम् आह्वानं कृतवान्। सः सदने विद्यमानस्य गतिरोधस्य विषये चिन्तां व्यक्तं कुर्वन् सर्वेषां दलानां नेतॄन् अवदत् यत् जनतायाः स्वरः सदने श्रूयेत।

सूत्राणाम् अनुसारं बीएसी-सभायां अध्यक्षः सर्वेषां दलानां नेतॄन् मिलित्वा गतिरोधस्य समाप्तेः मार्गं अन्वेष्टुं कथितवान्। सः अवदत् यत् प्रश्नकाले महत्त्वपूर्णानां विधेयकानां विषये चर्चायै यावद् समयं याचिष्यते, तावान् समयः प्रदास्यते। जनतायाः विषयाः सदनस्य परिसरेषु प्रतीक्षमाणाः न त्यक्तुं शक्यन्ते। एतेषां विषयाणां स्वरः अस्मिन्नेव सदने उत्थापनीयः। तेषु चर्चा भवितव्या तथा तेषां समाधानस्य मार्गः अन्वेष्टव्यः।

लोकसभाध्यक्षः अवदत् यत् सदस्यानां प्रभावी सहभागिता भवेत् तथा सदनस्य सार्थकं रचनात्मकं च विचार-विमर्शं देशः शृणुयात्, अस्मिन् विषये सर्वे विचारं कुर्वन्तु। लोकसभाध्यक्षः सर्वेभ्यः दलाभ्यः सहयोगस्य आह्वानं कृतवान्। सः अवदत् यत् सर्वेषां सहयोगेन सदनस्य कार्यवाही सुचारुरूपेण, सुव्यवस्थितरूपेण गरिमापूर्णरीत्या च सञ्चालिता भवेत्, येन जनहितसम्बद्धेषु महत्त्वपूर्णेषु विषयेषु व्यापकः सार्थकश्च विचार-विमर्शः भवितुं शक्नुयात्।

वर्षा-सत्रस्य प्रारम्भात् द्वाभ्यां सप्ताहाभ्याम् अधिकः कालः व्यतीतः, तथापि उभयोः सदनयोः गतिरोधः निरन्तरं वर्तते। सदने सुचारु-कार्यसञ्चालनाय निर्मितायां बीएसी-समित्याम् अपि सहमतिः न भवति। विपक्षेण सर्वकारात् द्वयोः विधेयकयोः संसदीय-परीक्षणाय प्रेषणस्य याचना कृता अस्ति। तयोः राष्ट्रिय-सहकारी-विकास-निगमस्य विधेयकं, २०२६ तथा खानि-खनिज-विकास-विनियमन-संशोधन-विधेयकं, २०२६ च सम्मिलिते स्तः।

अतिरिक्तं विपक्षेण छात्राणां विरोध-प्रदर्शनस्य तथा कथितस्य ‘राममन्दिर-दानद्रव्य-चौर्यस्य’ विषययोः अपि चर्चायाः याचना कृता अस्ति। विपक्षेण स्पष्टं कृतं यत् यावत् तस्य उभे याचने न स्वीक्रियेते, तावत् सः सदनस्य कार्यवाहीं सञ्चालितुं न दास्यति।

कथ्यते यत् सर्वकारेण छात्राणां प्रदर्शनस्य विषये चर्चायै सैद्धान्तिकरूपेण सहमतिः प्रदर्शिता अस्ति। अस्मिन् विषये गृहमन्त्रिणा उत्तरं प्रदास्यते इति कथ्यते। तथापि विपक्षः उभयोः विषययोः चर्चां कारयितुं स्वकीययाचनायां दृढः अस्ति। अपरतः बीएसी-सभायां एफसीआरए-विधेयकस्य अथवा परिसीमन-विधेयकस्य किमपि उल्लेखः न अभवत्।

Hindusthan Samachar / Divya Ranjan