काठमांडूः, 10 अगस्तमासः (हि.स.)।

नेपालस्य सत्तारूढदलम् राष्ट्रियस्वतन्त्रपार्टी इति दलं स्वमन्त्रिणः नागरिकाणां प्रति उत्तरदायिनः कर्तुं केन्द्रीयकार्यालये घण्टाघरे प्रत्येकं मन्त्रिणं मासे एकवारं न्यूनातिन्यूनं द्विहोराकालं अनिवार्यरूपेण उपस्थितिं दातुम् निर्देशं प्रदत्तवान्।

दलस्य सहमहामन्त्री आसिमशाहः उक्तवान्, “लोकतन्त्रस्य मूलभावना एषा अस्ति यत् निर्वाचितनेतृत्वं निरन्तरं नागरिकानां निरीक्षणे, सुझावेषु सम्पर्के च वर्तेत। एताम् वास्तविकतां ध्याने निधाय जनोत्तरदायित्वपूर्णं, पारदर्शकं परिणामोन्मुखं च राजनीतिकसंस्कारं विकसितुं मन्त्रिणः मासे न्यूनातिन्यूनम् एकवारं अनिवार्यरूपेण केन्द्रीयदलीयकार्यालये उपस्थित्वा नागरिकैः दलस्य पङ्क्तिभिः च सह प्रत्यक्षं संवादं करिष्यन्ति।”

तेन उक्तं यत् अयं कार्यक्रमः सामान्यजनानां स्वरं प्रत्यक्षरूपेण राज्यस्य नीतिनिर्माणस्य कार्यान्वयनस्य च स्तरं प्रति प्रापयन् सेतुरूपेण कार्यं करिष्यति।

शाहस्य अनुसारम् एकस्मिन् एव दिने द्विषु चरणेषु कार्यक्रमः सञ्चालितः भविष्यति। प्रथमचरणे ‘नागरिकसंवादः’ भविष्यति। सायं पञ्चवादनतः षड्वादनपर्यन्तम् एकहोराकालः पूर्णतया सामान्यनागरिकेभ्यः उद्घाटितः भविष्यति। अस्मिन् काले मन्त्री प्रत्यक्षरूपेण सामान्यनागरिकाणां परिवेदनाः, समस्याः, अपेक्षाः सुझावांश्च श्रोष्यति।

तथैव द्वितीयचरणे सायं षड्वादनानन्तरम् एकहोरापर्यन्तं ‘नेतृत्वसंवादः’ कार्यक्रमः चलिष्यति। अस्मिन् चरणे मन्त्री, दलस्य केन्द्रीयसमित्याः सदस्याः प्रतिनिधिसभायाः सदस्याश्च संयुक्तरूपेण उपवेशनं करिष्यन्ति। ततः प्रथमचरणे नागरिकेभ्यः प्राप्तानां सुझावानाम् आधारेण देशस्य सामयिकेषु, बहुआयामिषु नीतिसम्बद्धेषु च विषयेषु गहनचर्चा क्रियते।

शाहेन कार्यक्रमस्य सञ्चालनस्य चत्वारः प्रमुखाः कारणानि निर्दिष्टानि सन्ति। प्रथमं कारणं नागरिकाणां, सर्वकारस्य मन्त्रिणां, व्यवस्थापिकायाः सांसदानां तथा सङ्गठनस्य केन्द्रीयसमित्याः मध्ये समन्वयं सुदृढं कृत्वा नागरिकाणां विषयान् प्रभावीरूपेण सम्बोधयितुं सामूहिकरणनीतेः निर्धारणम् अस्ति।

द्वितीयम् उद्देश्यम् मन्त्रिणः सामान्यनागरिकाणां प्रति प्रत्यक्षरूपेण उत्तरदायिनः कर्तुम् अस्ति। तृतीयस्य उद्देश्यस्य अन्तर्गतं नागरिकाणां वास्तविकसमस्यानां अवगमनं कृत्वा राष्ट्रियनीतेः विधिनिर्माणस्य च सम्बन्धे दलस्य दृष्टिकोणः निर्धारितः करिष्यते।

चतुर्थम् उद्देश्यम् नागरिकाणां, दलस्य सङ्गठनात्मकस्तरस्य, संसदीयदलस्य तथा सर्वकारे विद्यमानानां प्रतिनिधीनां मध्ये प्रभावीरीत्या सूचनायाः कार्ययोजनायाश्च आदानप्रदानं सुनिश्चितं कर्तुम् अस्ति।

---------------

Hindusthan Samachar / Dheeraj Maithani