Enter your Email Address to subscribe to our newsletters
चेन्नईः, 11 अगस्तमासः (हि.स.)। तमिलनाडुराज्ये मादकद्रव्याणां विरुद्धं जागरूकतां कार्यवाहीं च तीव्रतरं कर्तुं मङ्गलवासरे चेन्नैनगरस्य स्टेट्-कॉलेज्-सभागारे ‘नशामुक्ततमिलनाडु’ इति अभियानस्य शुभारम्भः कृतः। मुख्यमन्त्रिणः विजयस्य उपस्थितौ आयोजिते कार्यक्रमे बहुसंख्यया विद्यालयीयाः महाविद्यालयीयाश्च छात्राः सहभागितां कृतवन्तः। कार्यक्रमस्य प्रारम्भः ‘तमिळ् ताय् वाळ्त्तु’ इति प्रार्थनागीतेन अभवत्।
कार्यक्रमे मुख्यमन्त्री विजयः छात्रेभ्यः मादकद्रव्येभ्यः दूरं स्थातुं तथा मादकद्रव्याणां विरुद्धं जागरूकतां प्रसारयितुं शपथं कारितवान्। छात्रैः शपथं गृह्णद्भिः उक्तं यत्, “अहं मादकद्रव्यसेवनस्य व्यसनस्य शिकारः न भविष्यामि।” ते च मादकद्रव्याणां उन्मूलने स्वसम्पूर्णं योगदानं दातुं सङ्कल्पं कृतवन्तः।
मुख्यमन्त्रिणः विजयस्य कार्यक्रमस्थले आगमने पुलिसविभागस्य पक्षतः तस्मै सम्मानसलामी प्रदत्ता। ततः मुख्यमन्त्री मञ्चमुपगत्य तमिलनाडुराज्यस्य विद्यालयेषु महाविद्यालयेषु च मादकद्रव्यतम्बाकूरहितपरिसरस्य जागरूकताभियानस्य शुभारम्भं कृतवान्।
‘नशामुक्ततमिलनाडु’ इत्यभियानस्य अन्तर्गतं राज्यस्य विभिन्नेषु भागेषु जप्तानां मादकद्रव्याणां विनाशनस्य राज्यव्यापी कार्यवाही अपि आयोजिता। एषा कार्यवाही मुख्यमन्त्रिणः विजयस्य उपस्थितौ दूरदृश्यसम्पर्कमाध्यमेन सम्पन्ना। अस्मिन् क्रमे मुख्यमन्त्री चेङ्गलपट्टु, तिरुनेलवेली, कोयम्बत्तूर् तथा तञ्जावूर् क्षेत्रेषु जप्तानां मादकद्रव्याणां विनाशनकार्यवाहीं दृश्यश्राव्यमाध्यमेन दृष्टवान्।
कार्यक्रमे मादकद्रव्यसेवनेन उत्पद्यमानानां सामाजिकानां स्वास्थ्यसम्बद्धानां च दुष्प्रभावाणां विषये युवकेषु जागरूकतां जनयितुं विशेषः बलः प्रदत्तः। अस्य अभियानस्य उद्देश्यम् विद्यालयेषु महाविद्यालयेषु च मादकद्रव्यतम्बाकूसेवनस्य विरुद्धं व्यापकजागरूकतां जनयित्वा युवानः व्यसनात् दूरं स्थापयितुम् अस्ति।
कार्यक्रमस्य अवधौ मद्यनिषेधविभागे उत्कृष्टं कार्यं कृतवद्भ्यः पुलिसकर्मिभ्यः मुख्यमन्त्रिणा विजयेन पुरस्काराः प्रदत्ताः तथा ते सम्मानिताः। मादकद्रव्याणां विरुद्धे सञ्चालिते अभियाने सक्रियभूमिकां निर्वहद्भिः पुलिसकर्मिभिः कृतस्य योगदानस्य प्रशंसा कृता।
अपि च मादकद्रव्यविरोधिक्लबानां माध्यमेन जागरूकताकार्यक्रमेषु उत्कृष्टं प्रदर्शनं कृतवद्भ्यः विद्यालयीयछात्रेभ्यः महाविद्यालयीयछात्रेभ्यश्च मुख्यमन्त्रिणा पुरस्काराः प्रदत्ताः।
मुख्यमन्त्री विजयः अस्मिन् अवसरे छात्रान् मादकद्रव्येभ्यः दूरं स्थातुं तथा स्वपरितः विद्यमानान् जनान् अपि मादकद्रव्यसेवनस्य दुष्प्रभावाणां विषये जागरूकान् कर्तुम् आहूतवान्। कार्यक्रमे राज्यस्य सर्वेषु भागेषु मादकद्रव्याणां विरुद्धं जागरूकताभियानस्य व्यापकस्तरे प्रसारणाय युवानां सहभागितां सुनिश्चितुं च विशेषः बलः प्रदत्तः।----------
Hindusthan Samachar / Dheeraj Maithani