चेन्नई, ११ अगस्तमासः (हि.स.)। तमिलनाडुविधानसभायां मङ्गलवासरे चिकित्साशिक्षापाठ्यक्रमेषु प्रवेशाय राष्ट्रियपात्रतासहप्रवेशपरीक्षाप्रणालीं समाप्तुं याचनां कुर्वन् प्रस्तावः सर्वसम्मत्या पारितः। स्वास्थ्य-परिवार-कल्याणमन्त्री डॉ. अरुणराजः सदने प्रस्तावं प्रस्तुत्य केन्द्रसर्वकारात् नीट्-परीक्षाप्रणालीं समाप्तुं तथा द्वादशकक्षायां प्राप्ताङ्कानाम् आधारेण चिकित्साशिक्षा-पाठ्यक्रमेषु प्रवेशं दातुम् आग्रहं कृतवान्।

विधानसभायाः सभा मङ्गलवासरे प्रातः सार्धनववादने प्रारब्धा। प्रस्तावं प्रस्तुत्य मन्त्रिणा उक्तं यत् नीट्-प्रश्नपत्रस्य लीक्-प्रकरणैः अन्यैः कथितानियमितताभिश्च छात्राणां अस्यां परीक्षाप्रणाल्यां विश्वासः समाप्तप्रायः अस्ति। तेन उक्तं यत् नीट्-परीक्षायाः कारणेन तमिलमाध्यमेन अध्ययनं कुर्वतां ग्रामीणक्षेत्रेषु निवसतां च छात्राणां चिकित्साशिक्षां प्राप्तुं अवसराः प्रभाविताः भवन्ति।

मन्त्रिणा उक्तं यत् द्वादशवर्षीयस्य विद्यालयीयशिक्षणस्य प्रदर्शनम् उपेक्ष्य एकदिवसीयप्रवेशपरीक्षायाः आधारेण उच्चशिक्षायाः निर्णयः करणं समीचीनं नास्ति। तस्य अनुसारं नीट्-परीक्षया निजीप्रशिक्षणसंस्थानानां विस्तारः प्रोत्साहितः अस्ति, येन छात्रेषु तेषां परिवारेषु च आर्थिकभारः वर्धितः।

तेन उक्तं यत् तमिलनाडुविधानसभया नीट्-परीक्षातः अपवर्जनस्य याचनां कृत्वा वर्षे २०२१ तमे विधेयकं पारितं कृतम् आसीत्, किन्तु अद्यावधि तस्य अनुमोदनं न प्राप्तम्। मन्त्रिणा नीट्-परीक्षां सामाजिक-न्यायस्य छात्रहितस्य च विरुद्धम् इति वर्णयित्वा सर्वेभ्यः सदस्येभ्यः प्रस्तावस्य समर्थनं कर्तुम् आग्रहः कृतः।

विभिन्नदलानां सदस्यैः विचाराः प्रस्तुताः

प्रस्तावे चर्चायाः समये विभिन्नदलानां विधानसभासदस्यैः नीट्-परीक्षया सम्बद्धेषु विषयेषु स्वविचाराः प्रस्तुताः। सदस्यैः परीक्षायां कथितानियमिततानां, छात्रेषु जायमानस्य मानसिकस्य आर्थिकस्य च दबावस्य तथा नीट्-परीक्षया सम्बद्धानां छात्रात्महत्याप्रकरणाणां विषयः अपि उत्थापितः।

वादविवादस्य अनन्तरं विधानसभाध्यक्षः जे. सी. डी. प्रभाकरः सदस्येभ्यः प्रस्तावस्य समर्थनं विरोधं च कर्तुं मतदानस्य आह्वानं कृतवान्। मतदानस्य अनन्तरं तेन घोषितं यत् नीट्-परीक्षाप्रणालीं समाप्तुं याचनां कुर्वन् प्रस्तावः सर्वसम्मत्या पारितः अस्ति।

किन्तु प्रस्तावस्य मतदानात् पूर्वं नीलगिरिजनपदस्य ऊटी-विधानसभा-क्षेत्रस्य भाजपाविधायकः भोजराजनः सदनात् बहिर्गतः।

एफसीआरए-संशोधनविधेयकस्य विरुद्धमपि प्रस्तावः

विधानसभायां ततः परं विदेशी-अंशदान-विनियमन-संशोधन-विधेयकं-२०२६ तस्य वर्तमानस्वरूपे प्रत्याहर्तुं केन्द्रसर्वकारम् आग्रहं कुर्वन् पृथक् प्रस्तावः प्रस्तुतः करणीयः अस्ति। अयं प्रस्तावः विद्यालयशिक्षामन्त्रिणा राजमोहन इत्यनेन प्रस्तुतः करिष्यते इति कथितम् अस्ति।

तमिलनाडुविधानसभायाः वर्तमानसत्रं अगस्तमासस्य पञ्चमदिनाङ्कात् प्रचलति। अगस्तमासस्य पञ्चमदिनाङ्के वित्तवर्षस्य २०२६-२७ तमस्य बजट् प्रस्तुतम् आसीत्। परदिने कृषिवित्तविवरणं प्रस्तुतम्। अगस्तमासस्य सप्तमदिनाङ्के दिवङ्गतानां पूर्वविधायकानां, चलचित्र-क्षेत्रस्य व्यक्तिनां तथा अन्येषां जनानां निधनस्य विषये शोकप्रस्तावः पठितः तथा वित्तविवरण-विषये चर्चा प्रारब्धा।

सत्रस्य अवधौ विपक्षस्य सत्तारूढदलस्य च सदस्येषु विभिन्नेषु विषयेषु तीव्रा चर्चाऽपि अभवत्। अस्यैव क्रमे राज्येभ्यः वित्तीय-विनियोजनसम्बद्धः एकः प्रस्तावः अपि सदने प्रस्तुतः, यः सर्वसम्मत्या पारितः।

Hindusthan Samachar / Divya Ranjan