औरैया, 11 अगस्तमासः (हि.स.)।

उत्तरप्रदेशसर्वकारस्य राष्ट्रियायुष्मिशनस्य अन्तर्गतं सञ्चालितस्य योगकल्याणकेन्द्रस्य राजकीयस्य होम्योपैथिकचिकित्सालयस्य च औरैयातः पक्षतः मङ्गलवासरे विभिन्नानां गतिविधीनाम् आयोजनं कृतम्। प्रथमसत्रे स्थानीयस्य तिलकक्रीडाङ्गणस्य परिसरे योगसाधकैः सह युवकानां युवतीनां च योगस्य व्यायामस्य च महत्त्वस्य विषये सूचना प्रदत्ता।

योगप्रशिक्षकेण योगेन्द्रकुमारमिश्रेण सूक्ष्मव्यायामेन सह वक्रासनस्य, भुजङ्गासनस्य मण्डूकासनस्य च अभ्यासः कारितः। तदतिरिक्तं युवा साधकेभ्यः मेढकचालस्य विधिः तस्य अभ्यासश्च कारितः।

योगप्रशिक्षकेण उक्तं यत् नियमितयोगं व्यायामं च जीवनशैल्याः अङ्गं कृत्वा मनुष्यः सहजतया स्वस्थः स्थातुं शक्नोति। योगः शरीरं स्वस्थं स्थापयितुं सहायकः भवति, तेन सह मानसिकैकाग्रतां कार्यक्षमतां च वर्धयितुमपि सहाय्यं करोति।

द्वितीयसत्रे योगकल्याणकेन्द्रे कुलं चतुर्विंशतिः रोगिणां स्वास्थ्यपरीक्षणं परामर्शश्च कृतः। तेषु एकोनविंशतिः नवीनाः पञ्च च पुरातनाः रोगिणः आसन्। एतेषु त्रयोदश पुरुषाः एकादश महिलाश्च आसन्। वर्षाकाले पाचनतन्त्रस्य प्रभावितत्वात् जनानां कण्ठे खरता, कासः, वक्षसि पीडा इत्यादयः अन्ये च स्वास्थ्यसम्बद्धाः समस्याः दृश्यन्ते।

अस्मिन् क्रमे रोगिभ्यः आहारविहारयोः सुधारं कर्तुं, दिनचर्यां व्यवस्थितां स्थापयितुं तथा ऋतुम् अनुरूपां जीवनशैलीं स्वीकर्तुं परामर्शः प्रदत्तः।

योगप्रशिक्षकः योगेन्द्रकुमारमिश्रः उक्तवान् यत् उत्तमस्वास्थ्याय सन्तुलिताहारः, नियमितदिनचर्या तथा योगः जीवनस्य अङ्गरूपेण स्वीकर्तव्याः। तेन उक्तं यत् स्वास्थ्यस्य प्रति जागरूकता जीवनचर्यायां च लघूनां लघूनां सुधाराणां समावेशः अनेकाभ्यः रोगेभ्यः रक्षणे सहायकः भवितुम् अर्हति।

---------------

Hindusthan Samachar / Dheeraj Maithani