Enter your Email Address to subscribe to our newsletters
बान्दा, १२ अगस्तमासः (हि.स.)। उत्तरप्रदेशस्य बान्दाजनपदे बुधवासरे आयोजिते बान्दाकृषि-प्रौद्योगिक-विश्वविद्यालयस्य १२ तमे दीक्षान्तसमारोहे २५० विद्यार्थिभ्यः उपाधयः प्रदत्ताः, यदा १८ मेधाविनः स्वर्ण-रजत-कांस्यपदकैः सम्मानिताः। बीएससी कृषिविषयस्य छात्रा अनुष्कासिंहः कुलाधिपति-स्वर्णपदकेन सम्मानिता। समारोहे बीएससी कृषिविषये १०५, उद्यानविषये ६२, वानिकीविषये १८, एमएससी कृषिविषये २१, उद्यानविषये ११, वानिकीविषये ५, बीएससी (ऑनर्स) गृहविज्ञाने २ तथा पीएचडी कृषिविषये १९, उद्यानविषये ७ उपाधयः प्रदत्ताः।
बुधवासरे आयोजितस्य समारोहोस्य प्रारम्भः शोभायात्रायाः आगमनेन राष्ट्रगीतस्य च गायनेन अभवत्। कुलपतिः प्रो. एस.वी.एस. राजूः विश्वविद्यालयस्य वार्षिकोपलब्धीनां प्रतिवेदनं प्रस्तुतवान्। सः अवदत् यत् विश्वविद्यालयस्य ११० स्नातक-परास्नातकविद्यार्थिनः रोजगारं प्राप्तवन्तः, यदा १८ विद्यार्थिनः देशस्य विभिन्नेषु उच्चशिक्षणसंस्थानेषु प्रवेशं प्राप्तवन्तः। आईआईआरएफ् २०२५-२६ इत्यस्मिन् विश्वविद्यालयाय देशे ३९ तमं स्थानं प्राप्तम्। अनुसन्धानक्षेत्रे १९.६९ कोटिरूप्यकाणां १४ परियोजनाः प्राप्ताः तथा नव पेटेण्ट्-अधिकाराः एकः प्रतिलिप्यधिकारश्च प्राप्तः। बुन्देलखण्डे शुष्ककृषेः प्रोत्साहनाय हैदराबादस्थितेन आईसीआरआईसैट्-संस्थानेन सह अनुसन्धानसन्ध्यापि कृतः।
सः अग्रे अवदत् यत् कृषिप्रसारक्षेत्रे प्रायः त्रिसहस्रहेक्टेयर-क्षेत्रे दलहनी-तिलहनीसस्यानां प्रदर्शनानि स्थापितानि। कृषिविज्ञानकेन्द्राणां ५५७ प्रशिक्षण-कार्यक्रमेषु १२,५३३ कृषकाः प्रशिक्षिताः। बीजहब-परियोजनायाः अन्तर्गतं ७४१.७९ कुन्तल-परिमितस्य बीजस्य उत्पादनं कृत्वा ७७.१८ लक्षरूप्यकाणां आयः अर्जिता। विश्वविद्यालये ४० कोटिरूप्यकाणां व्ययेन प्रेक्षागृहस्य निर्माणकार्यमपि प्रगतिपथे अस्ति।
पदकविजेतृषु कुलाधिपति-स्वर्णपदकं अनुष्कासिंह: इत्यस्यै प्राप्तम्। कुलपति-स्वर्णपदकं निर्भयसिंहेन, दीपलजोशिना, शिवान्या, मुस्कानगुप्तया, साक्षीपटेलेन रत्नेशसिंहेन च प्राप्तम्। कुलपति-रजतपदकं दिव्यांशिगुप्तायै, अर्पितमौर्याय, हर्षदीपरस्तोगिनः, ख्यातिसिंहायै, ऋद्धिधिमा-शुक्लायै उज्ज्वलशर्मणे च प्राप्तम्। कांस्यपदकं प्रणवमिश्रेण, प्राञ्जलिगुप्तया, सङ्गमतिवारिणा, ओशिकाजैनेन निहालकुमारगुप्तेन च प्राप्तम्। एतदतिरिक्तं ५० मेधावीविद्यार्थिभ्यः मेरिट्-प्रमाणपत्राणि प्रदत्तानि।
समारोहे त्रिभ्यः शिक्षकेभ्यः—प्रो. धर्मेन्द्रकुमाराय, डॉ. सी.एम. सिंहाय तथा डॉ. अरविन्दकुमारगुप्ताय—श्रेष्ठशिक्षक-पुरस्कारः प्रदत्तः। पञ्चग्रामाणां विद्यालयेषु विद्यार्थिनां मध्ये आयोजितानां कथाकथन-चित्रकला-भाषण-प्रति-योगितानां विजेतारः अपि पुरस्कृताः। कुलाधिपतेः प्रयत्नस्य अन्तर्गतं जनपदस्य १०० आङ्गनबाडीकेंद्रेभ्यः किट्-सामग्री वितरिता। उत्कृष्टकार्यं कुर्वत्यः आङ्गनबाडीकार्यकर्त्र्यः प्रशस्तिपत्रैः सम्मानिताः। समारोहे विश्वविद्यालयस्य शिक्षकाणां पुस्तकानां विमोचनम्, दीक्षोत्सवस्य लघुचलच्चित्रस्य प्रदर्शनं तथा विद्यालयीयबालकैः पर्यावरणगीतस्य, देशभक्तिगीतस्य लोकनृत्यस्य च प्रस्तुतयः अपि अभवन्।
समारोहोस्य मुख्यातिथिः डॉ. वी.वी. सदामतेः विद्यार्थिभ्यः आधुनिक-कृषितन्त्रज्ञानं प्रयोगशालातः क्षेत्रपर्यन्तं नेतुं तथा कृषकाणां समस्याः वैज्ञानिकसमाधानैः समाधानयितुं आह्वानं कृतवान्। सः अवदत् यत् कृषि-विश्वविद्यालयाः ज्ञानस्य, अनुसन्धानस्य, नवाचारस्य ग्रामीणपरिवर्तनस्य च महत्त्वपूर्णानि केन्द्राणि सन्ति।
विश्वविद्यालयस्य दीक्षान्तसमारोहे अध्यक्षतां कुर्वतः विश्वविद्यालयस्य कुलाधिपतेः आनन्दीबेनपटेलस्य विशेष-कार्याधिकारी सुधीर एम. बोबडे अवदत् यत् देशस्य कृषिप्रगतौ यूनां कृषिस्नातकानां महत्त्वपूर्णा भूमिका अस्ति। सः उपाधिप्राप्त-विद्यार्थिभ्यः स्वज्ञानस्य कौशलस्य च उपयोगं देशस्य कृषिव्यवस्थायाः कृषकाणां च प्रगत्यै कर्तुम् आह्वानं कृतवान्।
स्वसम्बोधने सः अवदत् यत् कृषिस्नातकाः लघुसीमान्तकृषकेभ्यः आधुनिककृषि-तन्त्रज्ञानं प्रापयितुं ज्ञानसेतोः भूमिकां निर्वोढुं शक्नुवन्ति। सः अवदत् यत् कृषेः विभिन्नेषु क्षेत्रेषु भारतः उल्लेखनीयां प्रगतिम् अधिगतवान्, यस्य श्रेयः देशस्य कोटिशः कृषकाणां वैज्ञानिकानां च प्रतिबद्धतायै दीयते। बोबडे बुन्देलखण्डस्य कृषिसम्बद्धानां समस्यानां उल्लेखं कुर्वन् युवानः शोधार्थिनः एताः समस्याः केवलं समस्यारूपेण न पश्यन्तु, अपितु नवाचारस्य अनुसन्धानस्य च व्यापकावसररूपेण पश्यन्तु इति आह्वानं कृतवान्।
Hindusthan Samachar / Divya Ranjan