नवदिल्ली, १२ अगस्तमासः (हि.स.)। देशं विकसितभारतं कर्तुं सङ्कल्पेन आयोजितायां त्रिरङ्गायात्रायां केन्द्रीयसंस्कृतिपर्यटनमन्त्री गजेन्द्रसिंह-शेखावतः युवकेभ्यः देशवासिभ्यश्च राष्ट्रनिर्माणे एकतया योगदानं दातुम् आह्वानं कृतवान्। सः अवदत् यत् त्रिरङ्गः भारतस्य विविधतां एकतासूत्रेण बद्धं कुर्वन् प्रतीकः अस्ति तथा च तम् साक्षिणं कृत्वा प्रत्येकं नागरिकः देशं विकसितं कर्तुं स्वात्मानं समर्पयेत्।

शेखावतः अवदत् यत् स्वातन्त्र्यस्य शतवर्षपूर्तौ देशः तान् अमरहुतात्मनः यथार्थां श्रद्धाञ्जलिं दातुम् इच्छति, येषां स्वातन्त्र्यार्थं जीवनं बलिदानं कृतम्। सः अवदत् यत् स्वातन्त्र्यसेनानीनां बलिदानं प्रति सम्मानं प्रकटयितुं सर्वाधिकं सार्थकः उपायः एष एव अस्ति यत् देशवासिनः भारतं विकसितराष्ट्रं कर्तुं सङ्कल्पं कुर्युः तथा च तदर्थं मिलित्वा कार्यं कुर्युः।

सः अवदत् यत् त्रिरङ्गायात्रा केवलं राष्ट्रध्वजेन सह आयोज्यमानः कार्यक्रमः नास्ति, अपितु देशस्य एकतायाः, राष्ट्रीयगौरवस्य नागरिकदायित्वस्य च सन्देशं प्रदातुम् अभियानम् अस्ति। यात्रायाः माध्यमेन जनान् स्वातन्त्र्यसङ्ग्रामस्य मूल्यानां राष्ट्रनिर्माणस्य दायित्वेन च सह सम्बद्धं कर्तुं प्रयत्नः क्रियते।

शेखावतः अस्य वर्षस्य आयोजनं विशेषं वर्णयित्वा अवदत् यत् ‘वन्दे मातरम्’ इत्यस्य पञ्चाशदधिकैकशततमं वर्षपूर्तेः अवसरम् अपि देशः आचरति। स्वातन्त्र्यसङ्ग्रामस्य समये ‘वन्दे मातरम्’ इति गीतं जनानां मनसि राष्ट्रभक्तेः स्वातन्त्र्यार्थं सङ्घर्षस्य च प्रेरणाम् अजनयत्। अतः त्रिरङ्गायात्रया सह ‘वन्दे मातरम्’ इत्यस्य पञ्चाशदधिकैक-शततमवर्षपूर्तेः स्मरणं नववंशं स्वातन्त्र्यसङ्ग्रामस्य मूल्यैः सह सम्बद्धुं महत्त्वपूर्णम् अवसरम् अस्ति। २०२६ तमे वर्षे राष्ट्रीयकार्यक्रमेषु ‘वन्दे मातरम्’ इत्यस्य

पञ्चाशदधिकैकशततमवर्षपूर्तिः विशेषरूपेण रेखाङ्किता क्रियते।

महत्त्वपूर्णं यत् त्रिरङ्गयात्रा स्वातन्त्र्य-दिवसस्य अवसरे देशभक्तेः राष्ट्रियैकतायाश्च संवर्धनाय आयोज्यमानः राष्ट्रव्यापी कार्यक्रमः अस्ति। एषा मुख्यतया ‘हर घर तिरङ्गा’ इति अभियानस्य अन्तर्गतं अगस्तमासस्य ९ दिनाङ्कात् १५ दिनाङ्कपर्यन्तं देशस्य विभिन्नेषु भागेषु आयोज्यते। संस्कृतिमन्त्रालयः अस्य कार्यक्रमस्य नोडलमन्त्रालयरूपेण कार्यं करोति तथा च राज्यैः, केन्द्रशासितप्रदेशैः, शिक्षणसंस्थाभिः सामाजिकसङ्गठनैश्च सह मिलित्वा व्यापकजनसहभागितां सुनिश्चितं करोति।

Hindusthan Samachar / Divya Ranjan