नवदिल्ली, १२ अगस्तमासः (हि.स.)। केन्द्रीयगृहमन्त्रिणा अमितशाहेन संसदः छात्राणां विरोधप्रदर्शनसम्बद्धेषु सर्वेषु पक्षेषु चर्चायै सर्वकारः सिद्धः अस्ति तथा विपक्षाय चतुर्विंशतिः होराणां समयः प्रदत्तः इति उक्ते सति लोकसभायाः विपक्षनेता राहुलगान्धी अवदत् यत् विपक्षः गृहमन्त्रिणः भाषणं श्रोतुं न इच्छति। तस्याः याचनायाः मुख्यः विषयः केवलम् एतत् ज्ञातुम् अस्ति यत् दिल्ली इत्यत्र छात्रान् प्रति गुटिकाप्रयोगस्य बलप्रयोगस्य च आदेशः केन दत्तः।

राहुलगान्धी बुधवासरे संसद्भवनस्य परिसरे पत्रकारैः सह वार्तालापं कुर्वन् अवदत् यत् विपक्षः ज्ञातुम् इच्छति— छात्रेषु गुटिकाः केन प्रक्षिप्ताः, गुटिकाप्रयोगस्य आदेशः केन दत्तः, एकस्य छात्रस्य नेत्रयोः ज्योतिः कथं नष्टा अभवत्, एकस्य छात्रस्य कर्णे गुटिका केन प्रक्षिप्ता। छात्रान् प्रति दण्डप्रहारस्य तथा कथितरूपेण कीलकयुक्तदण्डानां प्रयोगस्य आदेशः केन दत्तः, इत्यस्य उत्तरं गृहमन्त्रिणा दातव्यम्।

सः अवदत् यत् दिल्ली-आरक्षकविभागः तथा आर.ए.सी. गृहमन्त्रालयस्य अधीनौ स्तः। गृहमन्त्री अमितशाहः छात्राणां विरुद्धं कार्यवाहीं कर्तुं आदेशं दत्तवान् वा न वा, इति सः स्पष्टं कुर्यात्। यदि शाहेन आदेशः दत्तः आसीत्, तर्हि तेन त्यागपत्रं दातव्यम्; यदि तस्य अस्याः घटनायाः विषये सूचना नासीत्, तर्हि अपि स्वदायित्वस्य कारणात् तेन त्यागपत्रं दातव्यम्।

राहुलगान्धी अवदत् यत् प्रश्नः अयं नास्ति यत् अमितशाहः संसदम् समागत्य किं भाषणं करिष्यति। विपक्षः छात्राणां विरुद्धं कृतकार्यवाही-विषये स्पष्टम् उत्तरम् इच्छति। विंशतिदिनानां यावत् गृहमन्त्री संसदः मध्ये अस्मिन् विषये समक्षं न आगतवान्, अधुना च सत्रस्य अन्तिमे चरणे चर्चायाः प्रस्तावः दीयते।

सः अवदत् यत् सर्वकारस्य पक्षतः कथ्यते यत् गृहमन्त्री सर्वेषां प्रश्नानाम् उत्तराणि दास्यति, किन्तु विपक्षः पूर्वमेव स्पष्टं कृतवान् यत् सः कस्य प्रश्नस्य उत्तरम् इच्छति। सः छात्राणां विरुद्धं कस्यापि प्रकारस्य हिंसायाः समर्थनं न करोति तथा अस्मिन् विषये सः सार्वजनिकरूपेण स्वमतं प्रकटयति।

अस्मात्पूर्वं केन्द्रीयगृहमन्त्री अमितशाहः बुधवासरे विपक्षेण संसदः कार्यवाही बाधिता इत्यारोपं कृत्वा अवदत् यत् छात्राणां विरोधप्रदर्शनसम्बद्धेषु सर्वेषु पक्षेषु चर्चां कर्तुं सर्वकारः सिद्धः अस्ति। शाहः अवदत् यत् विपक्षः बुधवासरे अपराह्णे त्रिवादनपर्यन्तं लोकसभाध्यक्षं प्रति चर्चार्थं पत्रं ददातु, ततः सर्वकारः अपराह्णे त्रिवादनात् परदिने त्रिवादनपर्यन्तं चर्चां संचालयितुं सिद्धः अस्ति। सः स्वयम् अपि सम्पूर्णचर्चाकाले सदने उपस्थितः भूत्वा सर्वेषां प्रश्नानाम् उत्तराणि दास्यति। वर्षाकालीनसत्रस्य प्रारम्भात् सः नियमितरूपेण संसदं आगच्छति, स्वकीयकक्षे च उपस्थितः भवति, किन्तु विपक्षः उभयोः सदनयोः कार्यवाहीं सञ्चालयितुं न ददाति इति सः उक्तवान्।

Hindusthan Samachar / Divya Ranjan