काठमांडूः, 13 अगस्तमासः (हि.स.)।

नेपालस्य प्रधानमन्त्री बालेन्द्रशाहाय तुर्कियेदेशस्य पक्षतः औपचारिकं निमन्त्रणं प्राप्तम् अस्ति। एतत् निमन्त्रणं द्विपक्षीययात्रायै न, अपितु जलवायुपरिवर्तनसम्बद्धे एकत्रिंशत्तमे संयुक्तराष्ट्रजलवायुसम्मेलने भागं ग्रहीतुं प्रदत्तम् अस्ति।

प्रधानमन्त्रिणः शाहस्य विदेशयात्रायै प्राप्तमिदं द्वितीयम् औपचारिकं निमन्त्रणम् अस्ति। एतत्पूर्वम् भारतस्य प्रधानमन्त्री नरेन्द्रमोदी अपि तं भारतयात्रायै आमन्त्रितवान् आसीत्। भारतस्य निमन्त्रणस्य प्रत्युत्तरे नेपालस्य विदेशमन्त्रालयेन प्रधानमन्त्री शाहस्य पक्षतः उक्तं यत् सः उपयुक्तसमये भारतस्य यात्रां करिष्यति। तथापि तुर्कियेदेशस्य राष्ट्रपतेः निमन्त्रणस्य प्रत्युत्तरं नेपालस्य पक्षतः अद्यापि न प्रेषितम् अस्ति।

तुर्कियेदेशः अस्मिन् वर्षे नवम्बरमासस्य नवमदिनाङ्कतः विंशतिदिनाङ्कपर्यन्तं संयुक्तराष्ट्रजलवायुसम्मेलनस्य आयोजनं करिष्यति। राष्ट्रियसभायाः विकासस्य, आर्थिकविषयाणां सुशासनस्य च समितेः उपवेशने विदेशमन्त्रालयस्य संयुक्तराष्ट्रप्रभागस्य प्रमुखः सहसचिवः कृष्णप्रसादढकालः एतस्य विषये सूचनां दत्तवान्।

ढकालेन समितेः उपवेशने उक्तं यत् तुर्कियेदेशस्य राष्ट्रपतेः पक्षतः प्राप्तं निमन्त्रणं प्रधानमन्त्रीमन्त्रिपरिषद्कार्यालयाय प्रेषितम् अस्ति। तथापि प्रधानमन्त्री सम्मेलनस्य उपवेशने भागं ग्रहीष्यति वा न वा इति विषये अद्यापि निर्णयः न जातः।

प्रधानमन्त्री शाहः सितम्बरअक्टोबरमासयोः आयोज्यमाने संयुक्तराष्ट्रमहासभायाः एकाशीतितमे सत्रे अपि भागं न ग्रहीष्यति। तस्य स्थाने विदेशमन्त्री शिशिरखनालः प्रेषयितुं सज्जता क्रियते।

जलवायुपरिवर्तनस्य दृष्ट्या संवेदनशीलं पर्वतीयदेशं नेपालं प्रति विशेषमहत्त्वं प्रदर्शयन् तुर्कियेदेशेन एतत् निमन्त्रणं प्रदत्तम् अस्ति। नेपालः अन्तर्राष्ट्रिय-मञ्चेषु विशेषरूपेण तेषां पर्वतीयदेशानां विषयान् निरन्तरं प्रस्तौति, येषु जलवायुपरिवर्तनस्य कारणेन हिमनदाः तीव्रगत्या द्रवन्ति। नेपालः जलवायुपरिवर्तनस्य विषये ‘सगरमाथासंवादः’ इत्यादीनाम् अन्ताराष्ट्रियकार्यक्रमाणाम् आयोजनमपि कृतवान् अस्ति।

---------------

Hindusthan Samachar / Dheeraj Maithani