मुम्बई, १३ अगस्तमासः। बॉलिवुड्-जगतः सुप्रसिद्धायाः अभिनेत्री-श्रीदेव्याः स्मृतयः अद्यापि तस्याः प्रशंसकानां हृदयेषु सजगाः सन्ति। १३ अगस्तमासे तस्याः जयन्त्याः अवसरे प्रियङ्का चोपडा अभिनेत्रीम् विशेषरूपेण श्रद्धाञ्जलिं समर्पितवती। प्रियङ्कया स्वस्य इन्स्टाग्राम-कथायां श्रीदेव्याः अग्रिम-जीवनीग्रन्थस्य ‘एम्प्रेस-द डेफिनिटिव् बायोग्राफी ऑफ श्रीदेवी’ इत्यस्य आवरणस्य प्रथमं दर्शनं प्रकाशितम्। सा श्रीदेव्यै जन्मदिनस्य शुभकामनाः प्रदाय लिखितवती यत् सा सर्वदा स्मर्यते। प्रियङ्कायाः एषा प्रस्तुतिः बोनी कपूरः अपि पुनः प्रकाशितवान्।

‘एम्प्रेस’ इति श्रीदेव्याः जीवनस्य तथा तस्याः चलचित्रयात्रायाः आधारेण रचितः जीवनीग्रन्थः अस्ति, यस्य लेखनं धीरज यू. कुमारः कुर्वन् अस्ति। अस्य पुस्तकस्य घोषणा २०२३ तमे वर्षे वेस्टलैण्ड् बुक्स इत्यनेन कृता आसीत्। अस्मिन् जीवनीग्रन्थे श्रीदेव्याः बाल्यकालः, चलचित्रजगति तस्याः यात्रा तथा निजीजीवनसम्बद्धाः विविधाः पक्षाः समाविष्टाः भविष्यन्ति इति कथितम् अस्ति। विशेषतः १९८०-१९९० दशकयोः भारतीयचलचित्रक्षेत्रे श्रीदेव्याः प्रभावः तथा तस्याः अभूतपूर्वा लोकप्रियता अपि अनेन प्रकाशिता भवितुं शक्नोति।

श्रीदेवी बालकलाकाररूपेण स्वस्य अभिनयजीवनस्य आरम्भं कृतवती तथा अनन्तरं हिन्दीचलचित्रजगतः सर्वाधिक-लोकप्रियासु अभिनेत्रीषु परिगणिता अभवत्। स्वस्य अभिनय-प्रतिभया विविधैः चरित्रैः च सा दर्शकानां मध्ये विशिष्टं स्थानं निर्मितवती। २४ फरवरीमासे २०१८ तमे वर्षे दुबईनगरे ५४ वर्षीयायाः तस्याः निधनम् अभवत्, तथापि तस्याः धरोहरः अद्यापि अक्षुण्णः अस्ति। अतः ‘एम्प्रेस’ इत्यस्य माध्यमेन प्रशंसकानां कृते तस्याः जीवनं तथा अद्भुतां चलचित्रयात्रां समीपतः ज्ञातुं अवसरः प्राप्स्यते।

Hindusthan Samachar / Divya Ranjan