श्रावणमासे अयोध्याधाम्नि आगत: श्रद्धायाः तरंग:

अद्यावधि पञ्चत्रिंशल्लक्षाधिकाः श्रद्धालवः अयोध्याधामं प्राप्ताः

अयोध्या, १४ अगस्तमासः (हि.स.)। श्रावणमासे श्रीरामस्य पावननगरे अयोध्याधाम्नि श्रद्धायाः आस्थायाश्च अद्भुतः सङ्गमः दृश्यते। देशस्य विभिन्नेभ्यः राज्येभ्यः जनपदेभ्यश्च बहुसंख्यकाः श्रद्धालवः अयोध्यां प्राप्य श्रीरामललायाः दर्शन-पूजनं कुर्वन्ति। प्रमुखेषु मन्दिरेषु पूजार्चनां कृत्वा भगवत: शिवस्य मन्दिरेषु जलाभिषेकमपि कुर्वन्ति। श्रावणमासस्य अवधौ अद्यावधि पञ्चत्रिंशल्लक्षाधिकाः श्रद्धालवः अयोध्याधामं प्राप्य दर्शन-पूजनं कृतवन्तः।

अस्मिन् वर्षे श्रीरामललायाः दर्शनं कुर्वतां श्रद्धालूनां संख्यायामपि निरन्तरं वृद्धिः भवति। गतवर्षस्य तुलनायाम् अस्मिन् वर्षे दशप्रतिशतात् अधिकैः श्रद्धालुभिः श्रीरामललायाः दर्शनं कृतम्। प्रत्येकं शनिवासरे रविवासरे चापि एकलक्षाधिकाः श्रद्धालवः अयोध्याधामं प्राप्नुवन्ति।

श्रावणमासस्य प्रथमसोमवासरे प्रायः त्रिलक्षं श्रद्धालवः अयोध्यां प्राप्य दर्शन-पूजनं कृतवन्तः, यदा द्वितीयसोमवासरे श्रद्धालूनां संख्या वर्धित्वा प्रायः षट्लक्षपर्यन्तं प्राप्तवती। निरन्तरं वर्धमानां श्रद्धालूनां संख्यां दृष्ट्वा जनपदप्रशासनेन आरक्षक-प्रशासनेन च जनसमूह-प्रबन्धनस्य, सुरक्षायाः, यातायातस्य तथा श्रद्धालूनां सुविधानां विषये व्यापकस्तरे व्यवस्थाः सुनिश्चिताः क्रियन्ते।

जनसमूहप्रबन्धने यातायातव्यवस्थायां च विशेषं ध्यानम्

जनपदप्रशासनेन प्रमुखेषु मन्दिरेषु, घट्टेषु तथा जनसमूहयुक्तेषु क्षेत्रेषु निरन्तरं निरीक्षणं क्रियते। श्रद्धालूनां सुगमा-गमनाय यातायातव्यवस्थां सुव्यवस्थितां स्थापयितुं सह आवश्यकतानुसारं मार्गपरिवर्तनं, अवरोधकव्यवस्था तथा अन्याः आवश्यकव्यवस्थाः क्रियन्ते। जनसमूहस्य अधिकदबावयुक्तेषु क्षेत्रेषु अधिकारिणां पुलिसबलस्य च नियुक्तिं कृत्वा स्थितौ निरन्तरं दृष्टिः स्थाप्यते। अस्य कृते उच्चाधिकारिणः स्वयमपि रात्रौ मेलाक्षेत्रस्य भ्रमणं कृत्वा स्थितेः अवलोकनं कुर्वन्ति।

श्रद्धालूनां सुविधां दृष्ट्वा पेयजलस्य, चिकित्सायाः, स्वच्छतायाः, शौचालयस्य, प्रकाशस्य तथा अन्यासाम् आवश्यक-सुविधानां व्यवस्था कृता अस्ति। घट्टेषु प्रमुखेषु धार्मिकस्थलेषु च सुरक्षा-व्यवस्थामपि सुदृढां कृतवती अस्ति।

Hindusthan Samachar / Divya Ranjan