बिलासपुरम्, १४ अगस्तमासः (हि.स.)। मुख्यमन्त्री ठाकुरः सुखविन्द्रसिंहसुक्खुः शुक्रवासरे घुमारवीणविधानसभाक्षेत्रस्य निहारीस्थले वनमहोत्सवस्य शुभारम्भं कुर्वन् वनमित्राणां मासिकमानधनं १० सहस्ररूप्यकेभ्यः वर्धयित्वा १२ सहस्ररूप्यकाणि कर्तुं घोषणां कृतवान्। अस्मिन् अवसरे तेन सहजन इत्यस्य एकं पादपमपि रोपितम्। वनमहोत्सवस्य अन्तर्गतं प्रदेशे ७,००० हेक्टेयर-परिमितायां भूमौ ५० लक्षाधिकपादपानां रोपणस्य लक्ष्यं निर्धारितम् अस्ति।

दधोलस्थले आयोजिते समारोहे मुख्यमन्त्रिणा भराडी उपतहसील इत्यस्मै तहसील इत्यस्य स्तरं प्रदातुं घोषणा कृता। हटवाडस्य प्राथमिकस्वास्थ्यकेन्द्रे चिकित्सकयोः द्वे अतिरिक्ते पदे सृजितुं, तडौनपञ्चायते पशुचिकित्सालयं स्थापयितुं तथा राजकीयमहाविद्यालये घुमारवीं-स्थले एम.बी.ए., एम.सी.ए. तथा एम.टी.ए. इत्येतासां कक्षाणां प्रारम्भं कर्तुं च तेन घोषणा कृता। राजकीयमहाविद्यालये घण्डावली-स्थले बी.बी.ए. तथा बी.सी.ए. इत्येतासां कक्षाणामपि प्रारम्भः करिष्यते। १५ अगस्त-दिनाङ्कस्य स्वातन्त्र्यदिवस-कार्यक्रमाणां स्थाने १७ अगस्त-दिनाङ्के प्रदेशस्य सर्वेषु विद्यालयेषु अवकाशः भविष्यति इति तेन घोषितः।

मुख्यमन्त्रिणा उक्तं यत् वर्तमानसर्वकारः भ्रष्टाचारमुक्तव्यवस्थायै प्रतिबद्धः अस्ति तथा च भ्रष्टाचारे संलिप्ताः इति ज्ञाताः जनाः विरुद्धं विध्यनुसारं कठोरा कार्यवाही करिष्यते। भ्रष्टाचारमाध्यमेन अर्जिताः सम्पत्तयः अधिगृह्य निर्धनानां कल्याणाय उपयुज्यन्ते।

आपदः उल्लेखं कुर्वन् तेन उक्तं यत् प्रदेशे २३,००० अधिकानि गृहाणि क्षतिग्रस्तानि सन्ति। पूर्णतया क्षतिग्रस्तानां गृहाणां क्षतिपूर्तिः ७ लक्षरूप्यकेभ्यः वर्धयित्वा ८.५० लक्षरूप्यकाणि कृता अस्ति।

मुख्यमन्त्रिणा उक्तं यत् सर्वकारः प्रदेशस्य हिताय दृढतया संघर्षं करोति। वाइल्डफ्लावरहॉल-प्रकरणे प्राप्तेन विजयेन प्रदेशाय ४५० कोटिरूप्यकाणि प्राप्तानि सन्ति तथा च सम्पत्तेः प्रतिवर्षं प्रायः २० कोटिरूप्यकाणाम् आयः भवति। तेन उक्तं यत् भाखडाब्यास-प्रबन्धनमण्डलात् ७,२०० कोटिरूप्यकाणां बकायाबलमपि सर्वकारः दृढतया अग्रे नयति।

तेन उक्तं यत् कर्मचारिणां हिताय पुरातनपेंशनयोजनायाः पुनः स्थापनानन्तरं केन्द्रसर्वकारेण प्रदेशस्य १,६०० कोटिरूप्यकाणां वित्तीयसहायता स्थगिता अस्ति तथा च अधुना एकीकृतपेंशनयोजनां कार्यान्वयितुं बलं दीयते।

तकनीकीशिक्षामन्त्री राजेशधर्माणी उक्तवान् यत् मुख्यमन्त्री ठाकुरः सुखविन्द्रसिंहसुक्खुः दीर्घं राजनैतिकसंघर्षं कृतवान् तथा च एन.एस.यू.आई., युवककाङ्ग्रेसः तथा काङ्ग्रेस-सङ्गठने दीर्घकालं यावत् विविधाः उत्तरदायित्वपूर्णाः भूमिकाः निर्वुढवान्।

धर्माणिना उक्तं यत् प्रदेशसर्वकारेण मत्स्यजीविनां समस्यासमाधानाय अपि योजनाः प्रारब्धाः सन्ति तथा च विधवानां बालकानां शिक्षायाः सम्पूर्णं दायित्वं सर्वकारः वहति। प्रतिभाशालिभ्यः विद्यार्थिभ्यः एकप्रतिशतस्य ब्याजदरेण २० लक्षरूप्यकाणि यावत् ऋणं प्रदीयते। तेन उक्तं यत् कृषकेभ्यः न्यूनतमसमर्थनमूल्यं प्रदाय प्राकृतिककृषेः अपि प्रोत्साहनं दीयते।

Hindusthan Samachar / Divya Ranjan