Enter your Email Address to subscribe to our newsletters
खड़गपुरम्, १४ अगस्तमासः (हि.स.)। स्वातन्त्र्यदिवसस्य ‘हर घर तिरङ्गा’ इत्यभियानस्य च अन्तर्गतं दक्षिण-पूर्वरेलस्य खड़गपुरमण्डलेन शुक्रवासरे त्रिरङ्गद्विचक्रिकायान-शोभायात्रा आयोजिता। एतत् आयोजनं राष्ट्रीयगीतस्य ‘वन्दे मातरम्’ इत्यस्य १५०तम्याः जयन्त्याः तृतीयचरणस्य कार्यक्रमाणाम् अन्तर्गतं कृतः।
शोभायात्रा प्रातः अष्टवादने खड़गपुरस्य सेरसा-क्रीडाङ्गणात् प्रारब्धा खड़गपुररेल-स्थानके समाप्ता च। अस्यां रेलस्य अधिकारिभिः कर्मचारिभिश्च उत्साहपूर्वकं भागः गृहीतः। खड़गपुरस्य अपरमण्डल-रेलप्रबन्धकः सञ्जीव-कुमारसिंहः, वरिष्ठ-मण्डलसुरक्षायुक्तः प्रकाशकुमारपण्डा, रेलसुरक्षाबलस्य सैनिकाः तथा विभिन्नविभागानां कर्मचारिणः हस्तेषु त्रिरङ्गं धृत्वा शोभायात्रायां सम्मिलिताः। अस्यां देशभक्तेः, राष्ट्रियैकतायाः त्रिरङ्गस्य सम्मानस्य च सन्देशः प्रदत्तः।
खड़गपुरमण्डलेन विभाजनविभीषिका-स्मृतिदिवसस्य अवसरेऽपि विविधाः सांस्कृतिककार्यक्रमाः आयोजिताः। खड़गपुर-मेदिनीपुर-झाड़ग्रामादिषु अनेकेषु रेलस्थानकेषु मण्डलीय-सांस्कृतिकसङ्घस्य सदस्यैः सांस्कृतिक-प्रस्तुतयः प्रदत्ताः। कार्यक्रमाणां माध्यमेन विभाजनस्य पीडां तस्मिन् काले जनानां कृतानि बलिदानानि च स्मरन्तः शान्तेः, एकतायाः सौहार्दस्य च सन्देशः प्रदत्तः।
राष्ट्रियगीतस्य ‘वन्दे मातरम्’ इत्यस्य १५०तम्याः जयन्त्याः अवसरे खड़गपुर-मण्डलस्य विभिन्नेषु रेलस्थानकेषु वाद्यरूपेण ‘वन्दे मातरम्’ इति गीतं वाद्यते। रेलप्रशासनेन स्पष्टं कृतं यत् अनेन नियमितरेलघोषणासु किमपि प्रभावः न भविष्यति तथा च यात्रिभ्यः सम्बद्धाः महत्त्वपूर्णाः सूचनाः पूर्ववत् प्रसारिताः भविष्यन्ति।
स्वातन्त्र्यदिवसस्य अवसरे खड़गपुर-मण्डलस्य रेलस्थानकानि, स्थानक-परिसराः तथा मण्डलकार्यालयं त्रिरङ्गप्रकाशेन अलङ्कृतानि सन्ति। अनेन रेलपरिसरेषु उत्सवस्य वातावरणं निर्मितम् अस्ति।
हिन्दुस्थान समाचार / Divya Ranjan