शिमलानगरम्, १४ अगस्तमासः (हि.स.)। लोकभवने प्रथमवारं हरियालीतीज-महोत्सवस्य भव्यः कार्यक्रमः आयोजितः। लेडीगवर्नर बिन्दुगुप्तायाः प्रयत्नेन आयोजिते समारोहे भारतीय-संस्कृतेः, लोकपरम्पराणां, नारी-शक्तेः पर्यावरण-संरक्षणस्य च सुन्दरः समन्वयः दृष्टः। कार्यक्रमः ‘एकं भारतं श्रेष्ठं भारतम्’ इत्यस्य भावनानुरूपम् आयोजितः।

समारोहे महिला-कलाकारैः हरियालीतीज इत्यस्याः देशस्य समृद्धलोकपरम्पराणां च आधारेण सांस्कृतिकप्रस्तुतयः प्रदत्ताः। नागरिकसमाजेन सम्बद्धाः महिलाः अपि उत्साहपूर्वकं भागं गृहीतवत्यः। अस्मिन् अवसरे लोकभवनस्य दरबारसभागारः पारम्परिकेन उल्लासेन सांस्कृतिकरङ्गैश्च परिपूर्णः अभवत्।

राज्यपालः कविन्द्रगुप्तः समारोहे उपस्थितः भूत्वा महिलाभिः, कलाकारैः, अतिथिभिश्च सह संवादं कृतवान् तथा च प्रदेशवासिभ्यः हरियालीतीजापर्वणः शुभकामनाः अयच्छत्। तेन आयोजनस्य कृते लेडीगवर्नर-महोदयायाः प्रयत्नस्य प्रशंसा कुर्वता उक्तं यत् हरियालीतीज भारतीयसंस्कृतेः परम्पराणां च महत्त्वपूर्णं पर्व अस्ति, यत् प्रेम्णः, श्रद्धायाः, समर्पणस्य पारिवारिकमूल्यानां च सन्देशं ददाति।

राज्यपालेन उक्तं यत् एतादृशानि पर्वाणि सांस्कृतिकपरम्परां जीवन्तं स्थापयितुं नूतनवंशं स्वमूलैः सह संयोजयितुं च महत्त्वपूर्णं माध्यमं भवन्ति। तेन उक्तं यत् हिमाचलप्रदेशः देवसंस्कृतेः, लोक-परम्पराणां, मेलापकानाम् उत्सवानां च कृते प्रसिद्धः अस्ति तथा च अस्याः परम्परायाः संरक्षणस्य दायित्वं सर्वेषाम् अस्ति।

हरियालीतीज नारीशक्तेः प्रतीकरूपेण वर्णयन् तेन उक्तं यत् महिलाभ्यः समानावसराः स्वक्षमतायाः पूर्णोपयोगाय अनुकूलं वातावरणं च प्रदातुम् आवश्यकम् अस्ति। तेन पर्यावरणसंरक्षणे बलं दत्त्वा वनानां संरक्षणाय जलसंवर्धनाय च आह्वानं कृतम्।

अस्मिन् अवसरे राज्यपालेन लेडीगवर्नर इत्यनेन च ‘एकः वृक्षः मातुः नाम्नि’ इत्यभियानस्य अन्तर्गतं महिलाभ्यः अतिथिभ्यश्च पादपाः वितरिताः। ततः पादपारोपणमपि कृतम्। लेडीगवर्नर इत्यनेन आयोजनं सामाजिकसौहार्दस्य, नारीसशक्तीकरणस्य पर्यावरणसंरक्षणस्य च दिशि सार्थकः प्रयत्नः इति वर्णितम्।

Hindusthan Samachar / Divya Ranjan