देहरादूनम्, 14 अगस्तमासः (हि.स.)।उत्तराखण्डस्य चमोलीजनपदस्य मायापुर पीपलकोटीक्षेत्रे टीएचडीसी संस्थायाः निर्माणाधीनायां सुरङ्गायां मृत्तिकाद्रव्यं जलं च प्रविष्टेन दुर्घटनया अद्यावधि सप्त जनानां मृत्युः अभवत्। शेषान् जनान् बहिः निष्कासयितुं साहाय्यरक्षणाभियानं प्रचलति। मुख्यमन्त्री पुष्करसिंहधामी शुक्रवासरे अत्यन्तप्रतिकूले वृष्टिवातावरणे पीपलकोटीं प्राप्तवान्।

जनपदप्रशासनस्य अनुसारं विष्णुगाड पीपलकोटी जलविद्युत्परियोजनायाः टीआरटी सुरङ्गायां गुरुवासरे सायंकाले भूधसनेन प्रायः १.५० किलोमीटरपरिमिते भागे मृत्तिका जलं च प्रविष्टम्। सुरङ्गायाः सम्पूर्णदीर्घता प्रायः त्रिकिलोमीटरपरिमिता अस्ति। दुर्घटनायाः अनन्तरं सुरङ्गायां २२ जनाः फंसिताः इति सूचना प्राप्ता आसीत्।

जनपदाधिकारी गौरवकुमारः रात्रिं यावत् घटनास्थले उपस्थितः सन् रक्षणाभियानस्य निरीक्षणं कृतवान्। प्रशासनस्य अनुसारं शेषजनान् सुरक्षितरूपेण बहिः निष्कासयितुं प्रयत्नाः प्रचलन्ति। रक्षणाभियाने साहाय्यं कर्तुं सुरङ्गस्य अन्तः प्रविष्टाः षड् रक्षाकर्मचारिणः अपि सुरक्षिताः सन्ति। जनपदप्रशासनस्य अनुसारं घायितानां जनानां उपचारः गोपेश्वरस्य जनपदचिकित्सालये क्रियमाणः अस्ति।

एनडीआरएफ, एसडीआरएफ, आईटीबीपी, आरक्षीबलम् अन्याः च तान्त्रिकविशेषज्ञदलानि रक्षणाभियाने संलग्नानि सन्ति। सुरङ्गस्य अन्तः मृत्तिका जलं च विद्यमानत्वात् रक्षणदलस्य सम्मुखे कठिनपरिस्थितयः सन्ति। जनपदाधिकारिणा अधिकारिभ्यः रक्षणदलेभ्यश्च सर्वेषां उपलब्धानां संसाधनानां तान्त्रिकसहायतायाश्च उपयोगं कृत्वा फंसितान् जनान् शीघ्रातिशीघ्रं सुरक्षितरूपेण बहिः निष्कासयितुं निर्देशाः प्रदत्ताः सन्ति। प्रशासनम् उक्तवान् यत् अभियानं सर्वोच्चप्राथमिकतया प्रचलति।

मुख्यमन्त्री पुष्करसिंहधामी शुक्रवासरे अत्यन्तप्रतिकूले वृष्टिवातावरणे पीपलकोटीं प्राप्तवान्। प्रतिकूलेन वातावरणेन हेलिकॉप्टरस्य अवतरणमपि कठिनपरिस्थितौ अभवत्।

मुख्यमन्त्री अत्र टीएचडीसी संस्थायाः निर्माणाधीनायां सुरङ्गायां फंसितानां श्रमिकाणां सुरक्षितरूपेण बहिः निष्कासनाय सञ्चाल्यमानस्य साहाय्यरक्षणाभियानस्य स्थलीयनिरीक्षणं करिष्यति। तेन उक्तं यत् सुरङ्गायां फंसितस्य प्रत्येकस्य श्रमिकस्य सुरक्षितरूपेण बहिः निष्कासनं राज्यसर्वकारस्य सर्वोच्चप्राथमिकता अस्ति। अस्य कृते सर्वाः सम्बद्धाः संस्थाः समन्वयेन युद्धस्तरेण साहाय्यरक्षणाभियाने संलग्नाः सन्ति।

दुर्घटनायां मृतानां सूचीमध्ये प्रदीपसिंहपवारः ३१, मुकेशः, दुर्लभशर्मा, विजयः २८, जितेन्द्रकुमारः, लोकेश्वरः भुवनेश्वरश्च इत्येतेषां नामानि सन्ति। प्रदीपसिंहपवारः टिहरीजनपदस्य चम्बाक्षेत्रस्य गेवालग्रामस्य निवासी आसीत्। मुकेशः चमोलीजनपदस्य उर्गमस्य निवासी इति कथ्यते। दुर्लभशर्मा बिहारस्य निवासी आसीत्, यदा तु विजयः जितेन्द्रकुमारश्च झारखण्डस्य निवासी आस्ताम्। लोकेश्वरस्य भुवनेश्वरस्य च सम्बन्धे विस्तृतसूचना संगृह्यते।

गोपेश्वरस्य जनपदचिकित्सालये चिकित्सार्थं प्रवेशितानां कर्मचारिणां सूचीमध्ये सुनीलदीवानः २० छत्तीसगढस्य, हाबिलगुड़ियाः २७, निस्तारभिगराः २४, विनोदरावनाः ४६, दीनाबैगराः २६ तथा खेलारामबिसराः २२ झारखण्डस्य निवासी इति कथिताः सन्ति। छबेरसिंहः ४५ पंजाबस्य, तिलकराजः ४८ हिमाचलप्रदेशस्य, चन्दनकुमारः ३९, अवधेशः, नन्दलालः रोहितपाण्डेयः २० च बिहारस्य तथा पेनसिंहः ३३ छत्तीसगढस्य निवासी अस्ति। रोहितपाण्डेयः श्रीनगरं प्रति प्रेषितः अस्ति। सूच्यां गोविन्दः चिकित्सालयात् मुक्तः इति कथितम्, किन्तु तस्य अन्यविवरणस्य सूचना संगृह्यते।

Hindusthan Samachar / Dheeraj Maithani