Enter your Email Address to subscribe to our newsletters
नवदिल्ली, १४ अगस्तमासः (हि.स.)। उपराष्ट्रपतिः सी.पी. राधाकृष्णन् अगस्तमासस्य १६-१७ दिनाङ्कयोः तमिल-नाडुराज्यस्य द्विदिवसीययात्रां करिष्यति। अस्यां यात्रायां सः चेन्नई, चेंगलपट्टु, तिरुवरूर तथा तञ्जावूर इत्येतेषु स्थानेषु आयोजितेषु विविधेषु शैक्षणिकेषु, स्मृतिकार्यक्रमेषु साहित्यिकेषु च कार्यक्रमेषु भागं ग्रहीष्यति।
उपराष्ट्रपतिसचिवालयेन शुक्रवासरे सूचितं यत् उपराष्ट्रपतिः अगस्तमासस्य १६ दिनाङ्के चेंगलपट्टु-जनपदस्य कट्टन-कुलथुरस्थिते एस.आर.एम.-विज्ञान-प्रौद्योगिकी-संस्थाने आयोजिते २२ तमे दीक्षान्तसमारोहे सम्मिलिष्यति। ततः सः चेन्नईनगरस्य टी. नगरस्थिते वाणीमहले नागालैण्ड्, मणिपुर तथा पश्चिमबङ्गालस्य पूर्वराज्यपालस्य ला. गणेशन इत्यस्य प्रथमपुण्यतिथेः अवसरे आयोजिते कार्य-क्रमे भागं ग्रहीष्यति।
तस्मिन्नेव दिने सः चेन्नईनगरस्य डी.जी. वैष्णव-महाविद्यालयस्य सभागारे हिन्दू-मुन्नानी-सङ्घटनस्य संस्थापकस्य दिवङ्गतस्य के. रामगोपालनस्य विचाराणाम् लेखानां च आधारेण रचितस्य ‘इकोज़ ऑफ् ए नेशनलिस्ट माइण्ड’ इति पुस्तकस्य विमोचनकार्यक्रमे अपि भागं ग्रहीष्यति।
उपराष्ट्रपतिः अगस्तमासस्य १७ दिनाङ्के तिरुवरूरे तमिलनाडु-केन्द्रीयविश्व-विद्यालयस्य ११ तमे दीक्षान्तसमारोहे भागं ग्रहीष्यति। ततः सः तञ्जावूरे सास्त्रा-डीम्ड्-विश्वविद्यालयस्य रजतजयन्त्याः रूबिजयन्त्याश्च समापनसमारोहे भागं ग्रहीष्यति।
Hindusthan Samachar / Divya Ranjan