पटना, १५ अगस्तमासः (हि.स.)। बिहार-राज्ये असीतितमस्य स्वातन्त्र्यदिवसस्य मुख्यसमारोहः शनिवासरे राजधानीस्थे ऐतिहासिके गान्धी-प्रांगणे आयोजितः। प्रदेशस्य मुख्यमन्त्री सम्राट् चौधरी ध्वजारोहणं कृत्वा राज्यवासिनः सम्बोधितवान् तथा विकसितस्य समृद्धस्य च बिहारस्य निर्माणस्य सङ्कल्पं प्रस्तुतवान्। तेन शिक्षा, रोजगारः, निवेशः, महिलासुरक्षा विद्यार्थिनां समस्यासमाधानं च इत्यादिषु अनेकाः महत्त्वपूर्णाः घोषणाः कृताः।

मुख्यमन्त्रिणा स्वीयसम्बोधने उक्तं यत् राज्ये शिक्षायाः गुणवत्तायां सुधारं कर्तुं उच्चस्तरीयसमितिः गठिता भविष्यति। तेन उक्तं यत् सर्वकारस्य लक्ष्यं युवभ्यः बृहत्प्रमाणेन रोजगारस्य अवसरान् सृजितुम् अस्ति तथा २०३० तमवर्षात् पूर्वं बिहार-राज्ये एककोटिजनभ्यः सर्व-कारीयसेवां रोजगारं च प्रदातुं प्रयासः करिष्यते।

सम्राट् चौधरिणा उक्तं यत् बिहार-राज्ये पूर्वमपि बृहत्प्रमाणेन सर्वकारीयसेवा रोजगारश्च उपलब्धौ कृतौ। तेन पूर्वमुख्यमन्त्रिणः नीतीश-कुमारस्य कार्यकालस्य उल्लेखं कृत्वा उक्तं यत् २०२५ तमवर्षपर्यन्तं राज्ये १० तः १२ लक्षपर्यन्तं सर्वकारीयसेवाः तथा प्रायः ५० लक्षं रोजगारावसराः उपलब्धाः कृताः।

मुख्यमन्त्रिणा उक्तं यत् अधुना सर्वकारः युवभ्यः अस्मादपि बृहत्तरं लक्ष्यं स्वीकृत्य अग्रे गच्छति। २०३० तमवर्षात् पूर्वं एककोटिजनभ्यः सर्वकारीयसेवां रोजगारं च प्रदातुं दिशि कार्यं करिष्यते। तेन उक्तं यत् बिहारस्य अग्रिमवंशस्य युवान: एव राज्यं प्रगतिपथे नेष्यन्ति तथा तेभ्यः पर्याप्तावसरान् उपलब्धान् कर्तुं सर्वकारस्य दायित्वम् अस्ति।

१७ अगस्तमासात् ‘विद्यार्थी-सहयोग-पटलम्’ प्रारप्स्यते

मुख्यमन्त्रिणा घोषितं यत् १७ अगस्तमासात् सम्पूर्णे बिहार-राज्ये ‘विद्यार्थी-सहयोग-पटलं’ प्रारप्स्यते। अस्य माध्यमेन विद्यार्थी स्वीयशिक्षायाः, शिक्षणसंस्थानस्य, छात्रावासस्य कोचिङ्ग-संस्थानस्य च सम्बद्धाः समस्याः साक्षात् सर्वकारं प्रति निवेदयितुं शक्नुवन्ति। तेन उक्तं यत् पोर्टले पञ्जीकृतानां शिकायतानां निवारणाय ३० दिवसानां समयसीमा निर्धारितेति। अनेन विद्यार्थिभ्यः स्वसमस्यानां समाधानाय विभिन्नानां सर्वकारीयकार्यालयानां परिभ्रमणस्य आवश्यकता न भविष्यति।

सम्राट् चौधरिणा उक्तं यत् बहुधा विद्यार्थिषु एषा चिन्ता भवति यत् तेषां समस्यां श्रोतुं कोऽपि नास्ति। अस्याः समस्यायाः निवारणाय सर्वकारेण सुव्यवस्थितां सूचनानिवारणव्यवस्थां निर्मितम् अस्ति। यदि कस्यचित् विद्यार्थिनः संस्थानसम्बद्धा, छात्रावाससम्बद्धा वा कोचिङ्गसम्बद्धा समस्या अस्ति, तर्हि सः विद्यार्थी-सहयोग-पटले स्वीयां सूचनां पञ्जीकर्तुं शक्नोति।

पञ्चलक्षकोटिरूप्यकाणां निवेशस्य लक्ष्यं

मुख्यमन्त्रिणा उक्तं यत् राज्ये औद्योगिकानाम् आर्थिकक्रियाकलापानां च प्रोत्साहनाय पञ्चलक्षकोटिरूप्यकाणां निवेशस्य लक्ष्यं निर्धारितम् अस्ति। निवेशस्य वर्धनेन राज्ये नवीनाः उद्योगाः स्थापिताः भविष्यन्ति तथा युवभ्यः रोजगारस्य नवीनाः अवसराः सृज्यन्ते। तेन उक्तं यत् राज्ये निवेशम् आकर्षयितुं निरन्तरं प्रयासाः क्रियन्ते तथा विकासस्य गतिं अधिकं तीव्रां कर्तुं सर्वकारः कार्यं करोति।

महिलासुरक्षा सर्वकारस्य सर्वोच्च-प्राथमिकता

सम्राट् चौधरिणा उक्तं यत् महिलानां सुरक्षा सर्वकारस्य सर्वोच्चप्राथमिकतासु अन्तर्भवति। तेन सूचितं यत् बिहार-पुलिस-विभागे ३२,४०० महिला-आरक्षक-कर्मिणः नियुक्ताः सन्ति, या संख्या देशे सर्वाधिकाऽस्ति। मुख्यमन्त्रिणा उक्तं यत् महिलासुरक्षया सह समाजस्य सर्वेषां वर्गाणां सुरक्षायै विकासाय च सर्वकारः प्रतिबद्धः अस्ति।

‘सहयोग-शिविरेण’ सूचनिनां समाधानम्

मुख्यमन्त्रिणा उक्तं यत् पूर्वमुख्यमन्त्रिणः नीतीश-कुमारस्य ‘न्यायेन सह विकासः’ इति सङ्कल्पम् अग्रे नयता सर्वकारेण जनसमस्यानां समाधानाय बहवः पदक्षेपाः स्वीकृताः। प्रत्येकमासस्य द्वितीये मङ्गलवासरे ‘सहयोग-शिविरम्’ आयोज्य जनानां सूचनानां समाधानस्य नवीनः प्रयोगः प्रारब्धः। तेन सूचितं यत् सहयोग-शिविरे अद्यावधि ६.४६ लक्षाधिकानि आवेदनानि प्राप्तानि, तेषु प्रायः ९५ प्रतिशतानाम् आवेदनानां निवारणं कृतम् अस्ति।

समृद्धस्य विकसितस्य च बिहारस्य सङ्कल्पः

स्वातन्त्र्यदिवससमारोहे मुख्यमन्त्रिणा उक्तं यत् स्वातन्त्र्यस्य अयं गौरवपूर्णः अवसरः तेषां वीरस्वातन्त्र्यसेनानिनां त्यागं, तपस्यां बलिदानं च स्मर्तुं अवसरः अस्ति, येषां सङ्घर्षेण देशः स्वातन्त्र्यं प्राप्तवान्। तेन उक्तं यत् प्रधानमन्त्रिणः नरेन्द्र-मोदिनः नेतृत्वेन मार्गदर्शनेन च बिहाराय प्राप्यमाणानां सहयोगस्य संसाधनानां च सदुपयोगं कृत्वा समृद्धबिहारस्य निर्माणस्य सङ्कल्पः पूर्णः करिष्यते। विकासयात्रायां समाजस्य प्रत्येकं वर्गस्य सहभागितां सुनिश्चित्य राज्यं नवीनानि उन्नतिशिखराणि प्रति नेतुम् सर्वकारस्य लक्ष्यं वर्तते।

मुख्यमन्त्रिणा उक्तं यत् राज्ये ‘द्विचक्र-इञ्जिन’-सर्वकारः विकासस्य विभिन्नेषु क्षेत्रेषु कार्यं करोति। रोजगारस्य, शिक्षायाः, निवेशस्य, महिलासुरक्षायाः जनसमस्यानां समाधानस्य च विषये विशेषं ध्यानं दत्त्वा बिहारं विकसितम् आत्मनिर्भरं च राज्यं कर्तुं प्रयासाः निरन्तरं प्रचलन्ति।

Hindusthan Samachar / Divya Ranjan