गुवाहाटी, १५ अगस्तमासः (हि.स.)। देशस्य ८०तमस्य स्वातन्त्र्यदिवसस्य अवसरे असमस्य राज्यपालः लक्ष्मणप्रसादाचार्यः शनिवासरे लोकभवने राष्ट्रध्वजम् आरोहितवान्। अस्मिन् अवसरे लोकभवनस्य अधिकारिणः, कर्मचारिणः तेषां परिवारस्य सदस्याश्च उपस्थिताः आसन्। सीआरपीएफ्-सैनिकैः समारोहस्य अवसरे औपचारिकं सम्मानरक्षकदलस्य प्रदर्शनं कृतम्।

समारोहं सम्बोधयन् राज्यपालः आचार्यः असमस्य जनान् स्वातन्त्र्यदिवसस्य शुभकामनाः अयच्छत्। सः विशेषरूपेण युवानः आहूतवान् यत् ते स्वातन्त्र्यसेनानां बलिदानात् प्रेरणां प्राप्य राष्ट्रसेवायै समर्पिताः भवन्तु। सः अवदत् यत् स्वातन्त्र्यभावनायाः सच्चः सम्मानः सामूहिकप्रयत्नैः उत्तरदायिनागरिकतया च कर्तुं शक्यते। सः सर्वान् सुदृढस्य, आत्मनिर्भरस्य विकसितस्य च भारतस्य निर्माणे योगदानं दातुम् आहूतवान्।

राज्यपालः देशस्य स्वातन्त्र्यार्थम् असाधारणं बलिदानं कृतवद्भ्यः स्वातन्त्र्यसेनानिभ्यः श्रद्धाञ्जलिं समर्पयन् अवदत् यत् राष्ट्रस्य प्रगतिः तेषाम् असंख्यदेशभक्तानां त्यागस्य आधार-शिलायां स्थिता अस्ति, येषां स्वातन्त्र्यप्राप्त्यर्थं स्वसर्वस्वं समर्पितम्। तेषां साहसं, समर्पणम् आदर्शाश्च अद्यापि भाविवंशानां प्रेरणास्रोतांसि सन्ति।

अस्मिन् अवसरे राज्यपालः राष्ट्राय उत्कृष्टं योगदानं कृतवद्भ्यः सशस्त्रसेवानां पूर्वसैनिकेभ्यः सम्मानं प्रदत्तवान्। सम्मानितेषु सेनायाः नायबसूबेदारः दिलीपदुवरा (सेवानिवृत्तः), वायुसेनायाः जूनियरवारण्ट्-अधिकारी दिलीप-चन्द्रकलिता (सेवानिवृत्तः), असम-रिजिमेण्ट इत्यस्य सूबेदारः पुष्पालाल-भट्टाराई (सेवानिवृत्तः), सेनायाः नायकः अनुपमदासः (सेवानिवृत्तः) तथा सेनायाः हवलदारः मुक्तारायः (सेवानिवृत्तः) अन्तर्भूताः आसन्।

राज्यपालः पूर्वसैनिकानां राष्ट्रस्य प्रति सेवां तथा सेवानिवृत्तेः अनन्तरं सामाजिकेषु कल्याणकारीषु च कार्येषु तेषां सहभागितां प्रशंसितवान्। सः अवदत् यत् तेषां जीवनं अनुशासनस्य, सेवायाः निःस्वार्थभावनायाश्च उदाहरणम् अस्ति तथा ते समाजस्य प्रेरणास्रोतांसि सन्ति। सः सर्वेषां पूर्वसैनिकानां उत्तमस्वास्थ्यस्य दीर्घायुष्यस्य च कामनां कृत्वा युवानः राष्ट्रनिर्माणाय प्रेरयितुं निरन्तरं प्रयत्नं कर्तुम् आग्रहं कृतवान्।

समारोहस्य अवधौ आर्मीपब्लिकस्कूल, नारेंगी इत्यस्य छात्रैः ‘युवशक्तिः—पावर ऑफ यूथ’ इति विषये नृत्यनाटिका प्रस्तुता।

Hindusthan Samachar / Divya Ranjan