Enter your Email Address to subscribe to our newsletters
नव दिल्ली, 15 अगस्तमासः (हि.स.)।स्वास्थ्यानुसन्धानविभागेन (डी.एच.आर.) भारतीयायुर्विज्ञानानुसन्धानपरिषदया (आई.सी.एम.आर.) च आई.सी.एम.आर. मुख्यालये असीतमं स्वातन्त्र्यदिवसः आचरितः। अस्मिन् अवसरे चिकित्सकैः चिकित्सानुसन्धानस्य, नवाचारस्य, स्वास्थ्यप्रौद्योगिकीनां च उन्नयनाय तथा विकसितभारतस्य निर्माणे योगदानप्रदानाय सङ्कल्पः कृतः।
स्वास्थ्यानुसन्धानविभागस्य सचिवेन तथा भारतीयायुर्विज्ञानानुसन्धानपरिषदः महानिदेशकेन डॉ. राजीवबहलेन अत्र आई.सी.एम.आर. मुख्यालयस्य वी. रामालिङ्गस्वामीभवने राष्ट्रध्वजः आरोपितः। अस्मिन् अवसरे स्वास्थ्यानुसन्धानविभागस्य संयुक्तसचिवा ऋचा खोड़ा, वरिष्ठोपमहानिदेशकः (प्रशासनम्) विवेककुमारदक्षः इत्यादयः विभागस्य वरिष्ठाधिकारिणः, वैज्ञानिकाः, अनुसन्धानकर्तारः, कर्मचारिणश्च उपस्थिताः आसन्।
अस्मिन् अवसरे डॉ. बहलः अवदत् यत् राष्ट्रस्य विकासे स्वास्थ्यव्यवस्थायाः सुदृढीकरणे च स्वास्थ्यानुसन्धानस्य नवाचारस्य च महत्त्वपूर्णा भूमिका अस्ति। भारतीयायुर्विज्ञानानुसन्धानपरिषदि क्रियमाणं कार्यं केवलं वृत्तिः नास्ति, अपितु राष्ट्रनिर्माणे योगदानम् अस्ति।
सः अवदत् यत् चिकित्सानुसन्धानस्य, नवाचारस्य, स्वास्थ्यप्रौद्योगिकीनां च माध्यमेन भारतीयायुर्विज्ञानानुसन्धानपरिषद् विकसितभारतस्य निर्माणे योगदानं प्रददाति। चिकित्सानुसन्धानस्य नवाचारस्य च क्षेत्रे भारतं वैश्विकनेतृत्वकर्तारं कर्तुं दिशि एषा संस्था निरन्तरं कार्यं करोति।
डॉ. बहलेन वैज्ञानिकश्रेष्ठतायाः, नवाचारस्य, स्वदेशीयस्वास्थ्यप्रौद्योगिकीनां विकासस्य च सुदृढस्य आत्मनिर्भरस्य च स्वास्थ्यव्यवस्थायै आवश्यकत्वं प्रतिपादितम्। सः भारतीयायुर्विज्ञानानुसन्धानपरिषदः सम्बद्धान् वैज्ञानिकान् कर्मचारिणश्च तादृशानां प्रौद्योगिकीनां समाधानानां च विकासाय आहूतवान्, येन देशे स्वास्थ्यसेवानां प्राप्यता सुधरेत् तथा परिवर्तमानानां स्वास्थ्यसम्बद्धानां आवश्यकतानां पूर्तिः भवेत्।
सः अवदत् यत् स्वास्थ्यक्षेत्रे आत्मनिर्भरत्वस्य प्राप्तये स्वदेशीयप्रौद्योगिकीनां विकासः आवश्यकः अस्ति। चिकित्सानुसन्धानस्य नवाचारस्य च माध्यमेन देशं भविष्यस्य स्वास्थ्यसम्बद्धाभ्यः चुनौतीभ्यः सज्जीकर्तुं दिशि निरन्तरं कार्यं करणीयम्।
स्वातन्त्र्यदिवससमारोहस्य अन्तर्गतं पुरस्कारवितरणकार्यक्रमस्य आयोजनमपि कृतम्। अस्मिन् कार्यक्रमे अस्य मासस्य प्रारम्भे आयोजितानां निबन्धलेखनस्य प्रश्नोत्तरीप्रतियोगितायाश्च विजेतृभ्यः पुरस्काराः प्रदत्ताः। एतासां प्रतियोगितानां उद्देश्यं स्वास्थ्यानुसन्धानविभागस्य भारतीयायुर्विज्ञानानुसन्धानपरिषदः च अधिकारिषु कर्मचारिषु च सृजनशीलतायाः, ज्ञानस्य, सक्रियसहभागितायाः, संस्थागतक्रियाकलापेषु च संलग्नतायाः संवर्धनम् आसीत्।
---------------
Hindusthan Samachar / Dheeraj Maithani