उज्जयिनी, १५ अगस्तमासः (हि.स.)। स्वातन्त्र्यदिवसस्य अवसरे मध्यप्रदेशस्य उज्जयिन्यां स्थिते विश्वप्रसिद्धे श्रीमहाकालेश्वरमन्दिरे शनिवासरे प्रातःकाले बाबा-महाकालस्य विशेषः त्रिरङ्ग-शृङ्गारः कृतः। भस्मारतेः समये भगवान् महाकालस्य मस्तके केसरिया-श्वेत-हरितवर्णैः त्रिरङ्ग-त्रिपुण्ड्रं विरचितम्। राष्ट्रभक्तेः वर्णैः विभूषितं बाबा-महाकालस्य दिव्यं स्वरूपं दृष्ट्वा श्रद्धालवः भावविह्वलाः अभवन्। भस्मारतेः समये सम्पूर्णं मन्दिरपरिसरं बाबा-महाकालस्य जयघोषैः प्रतिध्वनितम्।

भस्मारार्तिक्यर्थं शनिवासरे प्रातःकाले मन्दिरस्य कपाटानि उद्घाटितानि। कपाटोद्घाटनानन्तरं पण्डितैः पुजारीभिश्च गर्भगृहे विराजमानानां देवीदेवानां विधिवत् पूजनं कृतम्। ततः भगवान् महाकालस्य जलाभिषेकः कृतः। दुग्ध-दधि-घृत-शर्कराभिः फलरसैश्च निर्मितेन पञ्चामृतेन बाबा-महाकालस्य अभिषेकः पूजनं च कृतम्। प्रथमघण्टानादं कृत्वा भगवते महाकालाय हरिओमजलं समर्पितम् तथा मन्त्रपाठस्य मध्ये पूजाऽर्चना च कृता।

बाबा-महाकालाय त्रिरङ्ग-स्वरूपं त्रिपुण्ड्रं समर्पितम्। तेन सह भगवतः रजतमयः ॐकारः, बिल्वपत्रैः सुशोभितं मुकुटं, रुद्राक्षमाला च धारिता। मस्तके त्रिपुण्ड्रेण त्रिशूलेन च सह डमरु-शेषनागाभ्यां अलङ्कृतः रजतमयः मुकुटः सुशोभितः अभवत्। बाबा-महाकालः रजतमयया मुण्डमालया, रुद्राक्षमालाभिः सुगन्धितपुष्पैः निर्मिताभिश्च विविधवर्णाभिः मालाभिश्च विभूषितः। अस्मिन् विशेषे शृङ्गारे शिवभक्त्या सह राष्ट्रभक्तेः भावोऽपि स्पष्टतया दृश्यते स्म। तिरङ्गवर्णैः विभूषितस्य बाबा-महाकालस्य दर्शनार्थं श्रद्धालुषु विशेषः उत्साहः दृष्टः।

फल-मिष्टान्नयोः नैवेद्यम्

भस्मारत्याः प्रक्रियायां भगवान् गणेशः, माता पार्वती, भगवान् कार्त्तिकेयश्च पूजिताः। ततः बाबा-महाकालाय फलानि मिष्टान्नानि च नैवेद्यरूपेण समर्पितानि। कर्पूरारतेः अनन्तरं ज्योतिर्लिङ्गे विधि-विधानपूर्वकं भस्म समर्पितं नैवेद्यं च अर्पितम्। महा-निर्वाणी-अखाडस्य पक्षतः बाबा-महाकालाय भस्म समर्पितम्।

भस्मसमर्पणानन्तरं साकारस्वरूपस्य दर्शनम्

महाकालमन्दिरस्य परम्परानुसारं मान्यतानुसारं च भस्मसमर्पणानन्तरं भगवत: महाकालस्य साकारस्वरूपस्य दर्शनं भवति। भस्मारार्तिक्या: समये बहु-संख्यकाः श्रद्धालवः बाबा-महाकालस्य दर्शनं कृत्वा आशीर्वादं प्राप्तवन्तः। दर्शनस्य समये श्रद्धालवः नन्दीमहाराजस्य दर्शनं कृत्वा स्वाभीष्टकामनाः अपि समर्पितवन्तः।

सर्वत्र प्रतिध्वनितः ‘जय श्री महाकाल’ इति जयघोषः

स्वातन्त्र्यदिवसे बाबा-महाकालस्य त्रिरङ्ग-शृङ्गारेण भस्मारतेः आध्यात्मिके वातावरणे राष्ट्रभक्तेः भावः पूरितः। यदा श्रद्धालुभिः बाबा-महाकालस्य दिव्य-स्वरूपस्य दर्शनं कृतं, तदा मन्दिरपरिसरः ‘जय श्री महाकाल’ इति जयघोषैः प्रतिध्वनितः। शिवभक्तेः, श्रद्धायाः राष्ट्रभक्तेश्च अयं अद्भुतः सङ्गमः स्वातन्त्र्यदिवसस्य प्रभातं श्रद्धालूनां कृते अधिकमेव विशेषं कृतवान्।

Hindusthan Samachar / Divya Ranjan