-स्वतंत्रतादिवसे नागपुरस्थिते संघ-मुख्यालये उत्तोलितः त्रिवर्णध्वजः

नागपुरम्, 15 अगस्तमासः (हि.स.)। राष्ट्रियस्वयंसेवकसंघस्य सरसङ्घचालकः डॉ. मोहनभागवतः अद्य स्वातन्त्र्यदिवसस्य अवसरे अत्र स्थिते सङ्घमुख्यालये तिरङ्गध्वजम् आरोहितवान्। अस्मिन् अवसरे सः स्वातन्त्र्यसेनानीनां त्यागं बलिदानं च स्मरन् देशस्य स्वातन्त्र्यस्य संरक्षणस्य दायित्वं प्रत्येकस्य नागरिकस्य अस्ति इति उक्तवान्।

डॉ. भागवतः उक्तवान् यत् स्वातन्त्र्यदिवसः देशस्य कृते गौरवस्य हर्षस्य च अवसरः अस्ति। १८५७ तमवर्षस्य विद्रोहात् आरभ्य १९४७ तमे वर्षे स्वातन्त्र्यप्राप्तिपर्यन्तं प्रायः नवतिवर्षाणि देशवासिनः विभिन्नस्तरेषु सङ्घर्षं कृतवन्तः तथा च अनेके जनाः स्वजीवनं बलिदत्तवन्तः। सः उक्तवान् यत् स्वातन्त्र्यप्राप्तये कृतः अयं सङ्घर्षः बलिदानं च सर्वदा स्मर्तव्यम्। सरसङ्घचालकेन उक्तं यत् दीर्घसङ्घर्षस्य असङ्ख्यबलिदानानां च अनन्तरं प्राप्तस्य देशस्य स्वातन्त्र्यस्य संरक्षणं प्रत्येकस्य नागरिकस्य दायित्वम् अस्ति।

सः उक्तवान् यत् भारतः स्वतन्त्रः अभवत् तथा च तस्य स्वातन्त्र्यं स्थास्यति, किन्तु देशं सुदृढं सुरक्षितं सुखसम्पन्नं च कर्तुं दायित्वं अद्यापि पूर्णं न जातम्। भागवतः उक्तवान् यत् भारतस्य पुरतः अद्यापि अनेकानि आव्हानानि सन्ति। एतेषां आव्हानानां सम्मुखीकरणं कुर्वता देशेन स्वस्य मूलविचारैः सिद्धान्तैश्च सह सम्बद्धेनैव स्थातव्यम्। सः देशस्य एकतायै सुरक्षायै विकासाय च नागरिकेभ्यः उत्तरदायित्वपूर्वकं योगदानं दातुम् आह्वानं कृतवान्।

सरसङ्घचालकेन उक्तं यत् भारतं तादृशं राष्ट्रं भवेत् यत् विश्वे महत्त्वपूर्णां सकारात्मकां च भूमिकां निर्वहितुं शक्नुयात्। सः भारतं ‘विश्वगुरु’रूपेण प्रतिष्ठापयितुं दिशि अग्रे गन्तुं उक्तवान्। सः उक्तवान् यत् भारतस्य प्रगतिः केवलम् आर्थिकविकासे राष्ट्रियविकासे वा सीमिता न भवेत्। देशेन स्वसामर्थ्यस्य मूल्यानां च माध्यमेन सम्पूर्णमानवतेः कल्याणे योगदानं दातुं दिशि अग्रे गन्तव्यम्।

मोहनभागवतः देशवासिभ्यः स्वातन्त्र्यस्य महत्त्वं ज्ञातुं, स्वातन्त्र्यसेनानीनां बलिदानं स्मर्तुं तथा राष्ट्रस्य भविष्यं सुदृढं कर्तुं स्वदायित्वानां निर्वहणं कर्तुं च सन्देशं दत्तवान्।------------------------------

Hindusthan Samachar / Dheeraj Maithani