नव दिल्ली, 15 अगस्तमासः (हि.स.)।

केन्द्रसर्वकारेण लघुकरदातॄणां कृते ‘विदेशीयसम्पत्तिप्रकटीकरणयोजना २०२६’ (फास्ट-डी.एस.) इति योजना प्रारब्धा अस्ति। एषा योजना अगस्तमासस्य १६ दिनाङ्कात् प्रारभ्य दिसम्बरमासस्य ३१ दिनाङ्कपर्यन्तं २०२६ तमवर्षे प्रवर्तिष्यते। अस्याः योजनायाः अन्तर्गतं एककोटिरूप्यकाणां पर्यन्तस्य अघोषितविदेशीयायस्य अथवा पञ्चकोटिरूप्यकाणां पर्यन्तं सम्पत्तेः प्रकटीकरणं कर्तुं शक्यते।

आयकरविभागेन शनिवासरे प्रकाशिते निवेदने उक्तं यत् केन्द्रीयप्रत्यक्षकरमण्डलेन (सी.बी.डी.टी.) लघुकरदातृणां कृते ‘विदेशीयसम्पत्तेः स्वैच्छिकघोषणायोजनायाः (फास्ट-डी.एस.) नियमाः, २०२६’ इति अधिसूचिताः सन्ति। अस्याः योजनायाः अन्तर्गतं घोषणाः दिसम्बरमासस्य ३१ दिनाङ्कपर्यन्तं प्रस्तोतुं शक्यन्ते। योजनानुसारं करदातृभिः त्रिंशत्प्रतिशतरूपेण करं तथा तावत्समानराशेः अतिरिक्तशुल्कमपि दातव्यं भविष्यति।

केन्द्रीयप्रत्यक्षकरमण्डलेन योजनायाः नियमान् अधिसूचयता उक्तं यत् पात्राः करदातारः अघोषितानां विदेशीयसम्पत्तीनाम्, अघोषितस्य विदेशीयायस्य अथवा तादृशानां विदेशीयसम्पत्तीनां घोषणां कर्तुं शक्नुवन्ति, याः सम्बन्धितविवरणेषु पूर्वं घोषिताः न आसन्। एतदर्थं निर्धारितकरस्य शुल्कस्य वा भुगतानं करणीयम्। लघुकरदातृषु छात्राः, युवाव्यावसायिकाः, प्राविधिककर्मचारिणः, अनिवासिभारतीयाः च अन्तर्भवन्ति।

सी.बी.डी.टी. इत्यनुसारं एषा योजना अगस्तमासस्य १६ दिनाङ्कात् प्रभावी भविष्यति तथा अस्याः अन्तर्गतं ऑनलाइनघोषणाः दिसम्बरमासस्य ३१ दिनाङ्कपर्यन्तं प्रस्तोतुं शक्यन्ते। घोषणीयानां सम्पत्तीनां यथोचितबाजारमूल्यं मार्चमासस्य ३१ दिनाङ्कस्य २०२६ तमवर्षस्य स्थित्यनुसारं निर्धारितं भविष्यति। योजनायाः अन्तर्गतं अगस्तमासस्य १६ दिनाङ्कात् निर्धारितदिवसस्य दिसम्बरमासस्य ३१ दिनाङ्कपर्यन्तं ऑनलाइनमाध्यमेन ‘प्रपत्रम् १’ इत्यस्य द्वारा स्वसम्पत्तेः प्रकटीकरणं कर्तुं शक्यते।

योजनायाः अन्तर्गतं घोषणा प्रस्तोतुं द्वे प्रमुखे श्रेण्यौ निर्धारिते स्तः। प्रथमश्रेण्यां भारतस्य बहिः स्थिताः ताः अघोषितसम्पत्तयः अथवा सः अघोषितविदेशीयायः अन्तर्भवति, यस्य करः पूर्वं न दत्तः। अस्मिन् प्रसङ्गे अघोषितसम्पत्तेः कुलमूल्यं एककोटिरूप्यकाणाम् अधिकं न भवितव्यम्।

द्वितीयश्रेण्यां भारतस्य बहिः स्थिताः ताः सम्पत्तयः अन्तर्भवन्ति, यासां कृते पूर्वमेव करः प्रदत्तः अस्ति अथवा याः करदातुः अनिवासिभारतीयस्य स्थितिकाले अर्जिताः आसन्, किन्तु आयकरविवरणस्य सम्बन्धितस्तम्भे तासां घोषणा न कृता आसीत्। एतादृशीनां घोषणानां कृते पञ्चकोटिरूप्यकाणां मौद्रिकसीमा निर्धारितास्ति तथा अस्याः कृते एकलक्षरूप्यकाणां शुल्कं देयम् अस्ति।

उल्लेखनीयं यत् छात्राणां, युवाव्यावसायिकानां, प्रौद्योगिकीक्षेत्रे कार्यरतकर्मचारिणां तथा विदेशेषु स्थानान्तरितानां अनिवासिभारतीयानां सदृशानां लघुकरदातॄणां कृते विदेशीयसम्पत्तेः स्वैच्छिकघोषणायाः एषा योजना वित्तीयवर्षस्य २०२६-२७ तमस्य केन्द्रीयराजस्वे घोषिताऽभवत्।

---------------

Hindusthan Samachar / Dheeraj Maithani