किशनगंजः, 16 अगस्तमासः (हि.स.)। सन्तशिरोमणिः गुरुरविदासमहाराजस्य षड्शततमजन्मजयन्तीवर्षस्य उपलक्ष्ये भारतीयजनतापक्षस्य ओरतः किशनगञ्जे ‘समरसतासङ्कल्पाभियानस्य’ शुभारम्भः कृतः। धर्मगञ्जस्थिते भाजपायाः जिलाकार्यालये आयोजिते कार्यक्रमे बिहारसर्वकारस्य राजस्वभूमिसुधारमन्त्री डाॅ. दिलीपकुमारजायसवालः मुख्यरूपेण सम्मिलितः। अस्मिन् अवसरे गुरुरविदासस्य जन्मस्थल्याः आनीतया पवित्रमृत्तिकया पूर्णानां कलशानां मण्डलस्तरीयपदाधिकारिभ्यः वितरणं कृतम्।

भाजपाकार्यालयं प्राप्ते मन्त्रिणः डाॅ. जायसवालस्य पक्षस्य नेतृभिः कार्यकर्तृभिश्च स्वागतं कृतम्। ततः सः जनपदस्य सर्वेभ्यः मण्डलाध्यक्षेभ्यः, महामन्त्रिभ्यः तथा मण्डलटोलीसदस्येभ्यः पवित्रमृत्तिकापूर्णान् कलशान् समर्पितवान्। कार्यक्रमे सन्तरविदासस्य जीवनस्य, सङ्घर्षस्य, सामाजिकसमरसतायाः मानवकल्याणस्य च सन्देशानां विषये चर्चा कृता।

पत्रकारैः सह वार्तालापे मन्त्री डाॅ. जायसवालः अवदत् यत् जन्मस्थल्याः आनीता पवित्रमृत्तिका ग्रामं ग्रामं प्रति प्रापयिष्यते। भाजपायाः नेतारः कार्यकर्तारश्च विभिन्नेषु ग्रामेषु टोलेषु च गत्वा एतां मृत्तिकां स्थानीयमन्दिरेषु नीत्वा तेषां मन्दिराणां जन्मस्थल्याः पवित्रमृत्तिकया स्पर्शं कारयिष्यन्ति। सः अवदत् यत् सन्तरविदासस्य विचारान् सामाजिकसमरसतायाः सन्देशं च प्रत्येकस्मिन् गृहे प्रापयितुम् अभियानस्य प्रमुखम् उद्देश्यम् अस्ति।

ज्ञातं यत् एतदभियानं गुरुरविदासस्य षड्शततमजन्मजयन्तीवर्षस्य अवसरे २९ जुलाई २०२६ तः २० फरवरी २०२७ पर्यन्तं सञ्चाल्यते। कार्यक्रमे बिहारराज्यस्य अल्पसंख्यकायोगस्य उपाध्यक्षः लखविन्दरसिंहलख्खा इत्यादयः शिशिरकुमारदासः, गोपालमोहनसिंहः, सञ्जयपासवानः, जयकिशनप्रसादः, राकेशगुप्तः, श्यामलदासः, अमरशर्मा, सुबोधमहेश्वरी, सञ्जयोपाध्यायः, सोनीदेवी, लखवीरकौरः, दुर्गास्वर्णकारः च सहिताः शताधिकाः कार्यकर्तारः उपस्थिताः आसन्।

Hindusthan Samachar / Dheeraj Maithani