Enter your Email Address to subscribe to our newsletters
रायपुरम्, 16 अगस्तमासः (हि.स.)।मुख्यमन्त्री विष्णुदेवसायः अद्य रविवासरे पूर्वप्रधानमन्त्रिणे भारतरत्नाय श्रद्धेयाय स्वर्गीयाय अटलबिहारीवाजपेयी-महाभागाय पुण्यतिथौ राजधानीरायपुरनगरे स्थिते मुख्यमन्त्रिनिवासपरिसरे तस्य प्रतिमायां पुष्पाञ्जलिं समर्प्य श्रद्धापूर्वकं नमनम् अकरोत्। मुख्यमन्त्रीसायः अटलबिहारीवाजपेयी-महाभागस्य विराटव्यक्तित्वं, राष्ट्रसेवां तथा छत्तीसगढनिर्माणे तस्य ऐतिहासिकं योगदानं स्मृतवान्। अस्मिन् अवसरे छत्तीसगढगृहनिर्माण-अधोसंरचनाविकासमण्डलस्य अध्यक्षः अनुरागसिंहदेवः अपि उपस्थितः आसीत्।
मुख्यमन्त्रीसायः अवदत् यत् श्रद्धेयः अटलबिहारीवाजपेयी छत्तीसगढस्य निर्माता प्रदेशवासिनां भावनानां सम्मानं कुर्वन् महान् राष्ट्रनायकः च आसीत्। छत्तीसगढराज्यस्य निर्माणं तस्य दूरदर्शिनः नेतृत्वस्य, दृढसङ्कल्पस्य संवेदनशीलचिन्तनस्य च परिणामः अस्ति। तेन अस्य अञ्चलस्य भौगोलिकविशेषताः, विकासस्य आवश्यकताः तथा पृथकराज्यस्य कृते वर्षेभ्यः प्रचलिता जनाकाङ्क्षा च सम्यग् अवगता, प्रधानमन्त्रिरूपेण च सा जनाकाङ्क्षा साकारिता। छत्तीसगढं पृथकराज्यरूपेण परिचयं प्रदत्तवान् तस्य ऐतिहासिकः निर्णयः प्रदेशस्य इतिहासे सदैव स्वर्णाक्षरैः अङ्कितः भविष्यति।
मुख्यमन्त्रीसायः अवदत् यत् अटलबिहारीवाजपेयी-महाभागस्य छत्तीसगढेन सह सम्बन्धः केवलं राजनीतिकः नासीत्, अपि तु गहनः आत्मीयः भावनात्मकश्च आसीत्। छत्तीसगढस्य अत्रत्यजनानां च प्रति तस्य हृदये विशेषः स्नेहः आसीत्। सायः अटलबिहारीवाजपेयी-महाभागेन सह स्वकीयाः स्मृतीः साझीकृत्य अवदत् यत् तस्मै स्वयं श्रद्धेयस्य अटलबिहारीवाजपेयी-महाभागस्य स्नेहः, आशीर्वादः मार्गदर्शनं च प्राप्तुं सौभाग्यम् अलभत। तेन सह सम्बद्धाः अनेकाः आत्मीयाः स्मृतयः अद्यापि तस्य मनसि जीवन्त्यः सन्ति। अटलबिहारीवाजपेयी-महाभागस्य स्नेहः तस्य मार्गदर्शनं च तस्य जीवनस्य अमूल्याः स्मृतयः सन्ति, याः तं जनसेवायाः पथि निरन्तरं प्रेरयन्ति।
---------------
Hindusthan Samachar / Dheeraj Maithani