Enter your Email Address to subscribe to our newsletters
नवदिल्ली, 16 अगस्तमासः (हि.स.)।
दिल्लीसर्वकारेण अद्यापि पिङ्क्-कार्डं निर्मातुं न शक्नुवतीनां महिलायात्रिणां कृते महती राहत् प्रदास्यन् दिल्लीपरिवहननिगमस्य बसयानेषु निःशुल्कयात्रायै कागदाधारितस्य पिङ्क्-टिकटस्य वर्तमानव्यवस्था ३१ अगस्तपर्यन्तं विस्तृता। अधुना १ सितम्बर २०२६ तः बसयानेषु निःशुल्कयात्रासुविधायाः लाभं प्राप्तुं ‘पिङ्क् सहेली स्मार्टकार्ड’ इति एनसीएमसी-कार्डम् अनिवार्यं भविष्यति। पूर्वं १५ अगस्तः पिङ्क्-टिकटव्यवस्थायाः अन्तिमतिथिः आसीत्।
दिल्लीसर्वकारेण एषः निर्णयः उत्सवकालं रक्षाबन्धनपर्व च दृष्ट्वा स्वीकृतः, येन उत्सवानां समये अधिकायां जनसम्मर्दावस्थायां महिलायात्रिणः विना कष्टं बसयानेषु यात्रां कर्तुं शक्नुयुः। अनिवार्यतायाः समयसीमायाः विस्तारणेन पात्रमहिलायात्रिण्यः स्वकीय ‘पिङ्क् सहेली स्मार्टकार्ड’ निर्मातुं अतिरिक्तसमयमपि प्राप्स्यन्ति।
परिवहनमन्त्री डाॅ. पङ्कजकुमारसिंहः रविवासरे विज्ञप्तिं प्रकाशयन् अवदत् यत् उत्सवकालः, विशेषतः रक्षाबन्धनपर्व, तादृशः समयः भवति यदा अस्माकं मातरः भगिन्यः पुत्र्यश्च स्वपरिवारजनैः सह मिलितुं यात्रां कुर्वन्ति। तासां सुविधां दृष्ट्वा सर्वकारेण वर्तमानव्यवस्थां ३१ अगस्तपर्यन्तं विस्तर्तुं निर्णयः कृतः।
नूतनव्यवस्थानुसारं पात्रमहिलायात्रिण्यः ३१ अगस्तपर्यन्तं कागदाधारितस्य ‘पिङ्क्-टिकट’ इत्यस्य उपयोगेन बसयानेषु निःशुल्कं यात्रां कर्तुं शक्नुवन्ति। १ सितम्बर २०२६ तः निःशुल्कयात्रासुविधा केवलं वैधेन ‘पिङ्क् सहेली स्मार्टकार्ड’ इत्यनेन एव उपलब्धा भविष्यति।
राजधानीदिल्लीनगरे अद्यावधि १८ लक्ष १३ सहस्र ८६६ ‘पिङ्क् सहेली स्मार्टकार्ड’ इति कार्डानि निर्गतानि सन्ति। परिवहनविभागेन सर्वेभ्यः डिपोप्रबन्धकेभ्यः, क्षेत्रीयप्रबन्धकेभ्यः, परिचालकेभ्यः प्रवर्तनकर्मचारिभ्यश्च निर्देशः प्रदत्तः यत् परिवर्तितसमयसीमायाः विषये व्यापकप्रचारप्रसारं सुनिश्चितं कुर्वन्तु तथा महिलायात्रिण्यः ३१ अगस्तात् पूर्वं स्वकीयस्मार्टकार्डनिर्माणाय प्रेरयन्तु। डिपोभवनेषु डीटीसी-बसयानेषु च उद्घोषणानां, सामाजिकमाध्यमानां, मुद्रितमाध्यमानां अन्येषां च माध्यमानां द्वारा जागरूकताभियानं चालयितव्यम्।
परिवहनमन्त्री सर्वाभ्यः पात्रमहिलायात्रिभ्यः आह्वानं कृतवान् यत् ३१ अगस्तात् पूर्वं स्वकीय ‘पिङ्क् सहेली स्मार्टकार्ड’ निर्मापयन्तु, येन १ सितम्बरतः विना कस्यापि बाधया बसयानेषु निःशुल्कयात्रासुविधायाः लाभं निरन्तरं प्राप्तुं शक्नुयुः।
---------------
Hindusthan Samachar / Dheeraj Maithani