हल्द्वानी , 16 अगस्तमासः (हि.स.)।सैनिककल्याणमन्त्री गणेशजोशी अद्य हल्द्वानीनगरे कुमाऊँमण्डलस्य नवनिर्मितस्य उपनलकार्यालयभवनस्य उद्घाटनम् अकरोत्। प्रायः सार्धैककोटिरूप्यकाणां व्ययेन निर्मितेन अस्मिन् भवने पूर्वसैनिकेभ्यः, तेषाम् आश्रितेभ्यः तथा उपनलेन सम्बद्धेभ्यः कार्मकेभ्यः उत्तमाः सुविधाः उपलब्धाः भविष्यन्ति। अस्मिन् अवसरे सैनिककल्याणमन्त्री गणेशजोशी अवदत् यत् हल्द्वानी कुमाऊँमण्डलस्य प्रवेशद्वारम् अस्ति तथा च अत्र बहुसङ्ख्याकाः पूर्वसैनिकाः तेषां परिजनाश्च निवसन्ति। अतः उपनलस्य सुसज्जितं सुविधासम्पन्नं च कार्यालयम् आवश्यकम् आसीत्।

सः अवदत् यत् पूर्वं उपनलकार्यालयं लघुकक्षे सञ्चालितं भवति स्म, यस्य कारणेन पूर्वसैनिकानां अन्येषां जनानां च कठिनताः भवन्ति स्म। नूतनस्य भवनस्य निर्माणेन एतासां समस्यानाꣳ समाधानं भविष्यति।

सैनिककल्याणमन्त्री गणेशजोशी अवदत् यत् उपनलस्य माध्यमेन प्रदेशे सर्वत्र पूर्वसैनिकेभ्यः तेषाम् आश्रितेभ्यश्च रोजगारः प्रदीयते। अधुना विदेशेष्वपि रोजगारस्य अवसरान् उपलब्धान् कर्तुं दिशि प्रयासाः क्रियन्ते। सः अवदत् यत् विदेशेषु मानवशक्तेः पर्याप्ता आवश्यकता अस्ति तथा च अस्मिन् विषये वार्ता प्रचलति। आशा अस्ति यत् आगामीमासस्य अन्तः विदेशसेवासम्बद्धा प्रक्रिया प्रारप्स्यते। अस्याः सुविधायाः लाभः पूर्वसैनिकेभ्यः, तेषाम् आश्रितेभ्यः तथा अन्येभ्यः योग्येभ्यः युवभ्यश्च अपि भविष्यति।

सैनिककल्याणमन्त्री घोषितवान् यत् अग्निवीरेभ्यः अपि विदेशेषु रोजगारस्य अवसराः उपलब्धाः कारयिष्यन्ते। एतदर्थं प्रायः पञ्चाशत्प्रतिशतम् अग्निवीरान् उपनलस्य माध्यमेन विदेशेषु रोजगारैः सम्बद्धान् कर्तुं दिशि प्रयासाः क्रियन्ते।

अस्मिन् अवसरे मण्डीअध्यक्षः अनिलडब्बू, दर्जामन्त्री गम्भीरधामी, उपनलस्य प्रबन्धनिदेशकः ब्रिगेडियर् निवृत्तः जे.एन.एस.बिष्टः, कर्नल् गोविन्दसिंहः, कर्नल् आलोकपाण्डेयः, कर्नल् रमेशअधिकारी इत्यादयः अन्ये गणमान्याः जनाः उपस्थिताः आसन्।

Hindusthan Samachar / Dheeraj Maithani