- होटलव्यवसायिनां सभायां स्वच्छतायाः वेंडिंग-क्षेत्रस्य च विषये चर्चा

- अपशिष्टविभाजनाय प्रत्येकं कक्षे द्वे कूटकपात्रे स्थापयन्तु - जयेन्द्रः

अयोध्या, १७ अगस्तमासः (हि.स.)। नगरनिगमस्य होटलसञ्चालकैः व्यापारिभिः च सह आयोजितायां सभायां महापौरः महन्तगिरीशपतित्रिपाठी उक्तवान् यत् रामललादर्शनार्थम् अयोध्याम् आगच्छन्तः श्रद्धालवः अस्माकम् अतिथयः सन्ति। अतिथिसत्कारस्य भावनया तेषां स्वागतं करणीयम्। सः उक्तवान् यत् अन्येषां धार्मिकनगराणां तुलनायाम् अयोध्या पर्याप्तं स्वच्छा अस्ति तथा अत्र जलापूर्तिव्यवस्था अपि पूर्वापेक्षया उत्तमा अभवत्। यातायातसम्बद्धाभिः व्यापारिभिः प्रस्तुतान् विचारान् अपि समाधानं प्रति नेतुं प्रयत्नः क्रियते।

महापौरः अवदत् यत् यातायातव्यवस्थां सुगमां कर्तुं मानस-भवनतः कञ्चन-भवनस्य दिशि च द्वयोः वैकल्पिकमार्गयोः विकासस्य योजनायां कार्यं प्रचलति। सः होम-स्टे-सञ्चालकान् होटल-सञ्चालकान् च आग्रहं कृतवान् यत् ग्राहकाणां कक्षेषु रामायणं प्रतिं तथा पूजनार्थम् आसनं च उपलब्धं कारयन्तु। सः अवदत् यत् श्रद्धालवः अयोध्यां पर्यटनार्थं न, अपितु आध्यात्मिकशक्तेः प्राप्त्यर्थम् आगच्छन्ति। अतः अत्रतः प्रत्यावर्तमानसमये तेषां मनसि अयोध्यायाः दिव्यता आध्यात्मिकता च अनुभवेताम्।

नगरायुक्तः जयेंद्रकुमारः होटलसञ्चालकेभ्यः उक्तवान् यत् प्रत्येकं कक्षे द्वे कूटकपात्रे स्थापयन्तु। नीलवर्णे कूटकपात्रे शुष्कं कूटकं, हरीतवर्णे च आर्द्रं कूटकं स्थापयितुं व्यवस्था भवेत्। होटलतः एव स्वच्छतायाः सन्देशः श्रद्धालून् प्रति प्रेषयितुं शक्यते। सः अवदत् यत् गृहे गृहे कूटकस्य पृथक्करणस्य संस्कृतेः विकासेन नगरनिगमाय महती सुविधा भविष्यति। सभायाः सञ्चालनम् अपरनगरायुक्तः भारतभार्गवः कृतवान्।

नगरनिगमस्य जनसम्पर्काधिकारी मुकेशकुमारपाण्डेयः अवदत् यत् अस्मिन् अवसरे वसिष्ठ-प्रतिष्ठानेन होटलसञ्चालकेभ्यः रामायणस्य प्रतयः प्रदत्ताः। तदनन्तरं स्वच्छतानियमावल्याः प्रतयः पत्रिकाः च वितरिताः। स्वच्छतासम्बद्धाः समस्याः समाधानं न प्राप्नुयुः चेत् ७३१११६५८०४ इति दूरभाषसङ्ख्यायां सूचना दातुं आह्वानं कृतम्।

सभायां होटलसञ्चालकेन अनिल-अग्रवालेन फतेहगञ्जतः चतुष्पथपर्यन्तं मार्गस्य मरम्मतस्य विषयः उत्थापितः। व्यापारिभ्यः महापौरः नाका तथा सिविललाइन्स इव फतेहगञ्ज-उपरिसेतोः अधः वेंडिंग-क्षेत्रस्य विकासस्य आश्वासनं दत्तवान्।

अस्मिन् अवसरे उपसभापतिः सन्तोषसिंहः, पूर्वोपसभापतिः जयनारायणसिंहः ‘रिंकू’, होटलव्यवसायिनः भागीरथपचौरीवाला, अरुण-अग्रवालः, प्रभञ्जनानन्दः, दीपकः, श्रीनिवासशास्त्री, अभियन्ता रवितिवारी च उपस्थिताः आसन्। तेषां अतिरिक्तं बहवः होटल-होम-स्टे-सञ्चालकाः अपि सभायाम् उपस्थिताः आसन्।

Hindusthan Samachar / Divya Ranjan