पुरुलिया, १७ अगस्तमासः (हि.स.)। पश्चिमबङ्गालस्य मुख्यमन्त्री शुभेन्दुअधिकारी अवदत् यत् राज्यसर्वकारस्य प्राथमिकता तीव्रगत्या औद्योगिकीकरणस्य प्रोत्साहनं, स्थानीयस्तरे रोजगारस्य अवसराणां सृजनं तथा कार्यान्वेषणाय अन्यराज्येषु गच्छतां श्रमिकाणां पलायनस्य निवारणम् अस्ति। सः अवदत् यत् नवीनाभिः औद्योगिकपरियोजनाभिः राज्यस्य युवभ्यः रोजगारस्य अवसराः वर्धिष्यन्ते तथा स्थानीय-अर्थव्यवस्थायाः सुदृढीकरणं भविष्यति।

मुख्यमन्त्रिणा सोमवासरे पुरुलियामण्डलस्य रघुनाथपुरस्य दुर्मुटग्रामे अमित-मेटलिक्स-संस्थया चतुःसहस्रकोटिरुप्यकाणां व्ययेन निर्मीयमाणस्य एकीकृत-लौह-उद्योगसंयन्त्रस्य आधारशिला स्थापिता। १४८ एकरपरिमिते क्षेत्रे स्थापितया अनया परियोजनया प्रायः १० सहस्रं जनानां प्रत्यक्षं परोक्षं च रोजगारं प्राप्तुं सम्भावना अस्ति। मुख्यमन्त्री अवदत् यत् अमित-मेटलिक्स-संस्थायाः निर्माणीम् एकवर्षस्य अन्तः पूर्णरूपेण कार्यरतं भविष्यति।

सः अवदत् यत् मेजियायां सद्यः प्रारब्धया पञ्चदशसहस्रकोटिरुप्यकाणां श्याम-स्टील-परियोजनया अपि प्रायः १० सहस्रं जनानां रोजगारः भविष्यति। उभे परियोजने पुरुलियायाः समीपवर्तिक्षेत्राणां च युवभ्यः रोजगारस्य नवीनमार्गान् उद्घाटयिष्यतः। स्थानीयानां अकुशलानां च श्रमिकाणाम् अपि एताभ्यः परियोजनाभ्यः रोजगारस्य अवसराः प्राप्स्यन्ते।

मुख्यमन्त्री अवदत् यत् राज्ये औद्योगिकविस्तारस्य क्रमः निरन्तरं प्रचलति। अधुना एव लक्स-संस्थायाः षट्शतकोटिरुप्यकाणां विस्तारपरियोजनायाः आधारशिला स्थापिता अस्ति। तदतिरिक्तं हावड़ा इत्यत्र देशस्य बृहत्तमं दधिनिर्माणसंयन्त्रम् अपि विकसितं क्रियते। सः अवदत् यत् राज्यस्य आर्थिकविकासं गतिशीलं कर्तुं शीघ्रमेव नवीननिवेशभूमिनीतिः प्रकाशिताः भविष्यति।

प्रशासनिकव्यवस्थायाः विषये मुख्यमन्त्रिणा जनपदाधिकारिभ्यः सिक्तायाः वर्धमानमूल्यं नियन्त्रितुं निर्देशः प्रदत्तः। सः अवदत् यत् सर्वेषां वालुकाखननघट्टानां सञ्चालनं पूर्णतया वैधानिकनियमानुसारं भवेत्। अवैधगतिविधिषु कठोरकार्यवाही करिष्यते।

मुख्यमन्त्रिणा पुरुलियायां पर्यटनविकासे अपि बलं दत्तम्। सः अवदत् यत् मण्डले प्रस्ताविताभिः पर्यटनपरियोजनाभिः स्थानीय-अर्थव्यवस्थायाः विकासे नवीनगतिः भविष्यति तथा रोजगारस्य अवसराः वर्धिष्यन्ते।

सः मईमासे ९ दिनाङ्के २०२७ तमे वर्षे स्वसर्वकारस्य कार्यकालस्य प्रथमवर्षं पूर्णं भविष्यतीति उल्लेखं कुर्वन् जनतां सर्वकारस्य कार्यस्य मूल्याङ्कनं कर्तुं कथितवान्। सः अवदत् यत् यदि जनता तस्य सर्वकारस्य कार्यप्रदर्शनाय दशसु नवभ्यः न्यूनान् अङ्कान् ददाति, तर्हि सः हस्तौ बद्ध्वा सार्वजनिकरूपेण क्षमां याचिष्यति।

भ्रष्टाचारस्य विरुद्धं कठोरं विचारं स्वीकुर्वन् मुख्यमन्त्रिणा अधिकारिभ्यः राजनैतिकदलेभ्यश्च सञ्चेतना प्रदत्ता। सः जामबनी-खण्डविकासाधिकारिणः तथा आसनसोले द्वयोः मोटरयाननिरीक्षकयोः रूप्यकग्रहणस्य आरोपेण कृतेषु गृहीतेषु उल्लेखं कृतवान्।

मुख्यमन्त्रिणा जनान् प्रति आह्वानं कृतं यत् परियोजनायाः अथवा कस्यचित् समूहस्य नाम्ना यदि बलात् धनसंग्रहस्य याचना क्रियते, तर्हि तस्य सूचना प्रत्यक्षं तस्मै ददतु। सः अवदत् यत् एतादृशीषु सूचनासु तत्कालं कार्यवाही करिष्यते।

मुख्यमन्त्रिणा क्षेत्रीयसम्पर्कयोजनायाः अन्तर्गतं पुरुलियायां नागरिकविमानपत्तनस्य स्थापनायाः प्रस्तावः अपि प्रस्तुतः।

Hindusthan Samachar / Divya Ranjan