मुख्यमन्त्रिणा इन्दौरस्य कमला-नेहरू-जन्तुशालाया: १४-डी-सिनेमा-प्रेक्षागृहस्य आभासी-जङ्गल-सफारी इत्यस्य च अपि लोकार्पणं कृतम्

भोपालम्, १६ अगस्तमासः (हि.स.)। मध्यप्रदेशस्य इन्दौरनगरे मुख्यमन्त्री डॉ. मोहन यादवः रविवासरे देशस्य प्रथमस्य आभासी-प्राणिसङ्ग्रहालयस्य लोकार्पणं कृतवान्। तेन इन्दौर-प्राणिसङ्ग्रहालये स्थापितस्य सार्धचतुःकोटिरुप्यकाणां व्ययेन सार्वजनिक-निजी-सहभागिता-प्रारूपेण निर्मितस्य १४-डी-सिनेमा-प्रेक्षागृहस्य आभासी-जङ्गल-सफारी इत्यस्य च अपि लोकार्पणं कृतम्।

अस्मिन् अवसरे मुख्यमन्त्री डॉ. यादवः उक्तवान् यत् इन्दौरनगरे यत्किमपि क्रियते, तत् सर्वश्रेष्ठरूपेण क्रियते। इन्दौरनगरे निरन्तरं नवाचारस्य विकासस्य च क्षेत्रे नूतनाः आयामाः स्थापिताः भवन्ति। सः उक्तवान् यत् आभासी-जङ्गल-सफारी सामान्य-जनानाम् आकर्षणस्य केन्द्रं भविष्यति। अनेन जनानां वनस्य वन्यजीवानां च आभासी-अनुभवः प्राप्स्यते। तेन उक्तं यत् अस्याः सुविधायाः माध्यमेन नगरनिगमाय आयः अपि प्राप्स्यते।

मुख्यमन्त्रिणा सर्वेषां मन्त्रिणां विद्यालयीयबालकानां च सह १४-डी-सिनेमा-प्रेक्षागृहे उपविश्य चलचित्रस्य आनन्दः अनुभूतः। चलचित्रं दृष्ट्वा तेन उक्तं यत् उभे चलचित्रे दृष्ट्वा तेन अद्भुतः आनन्दः अनुभूतः। तेन आभासी-जङ्गल-सफारी इत्यस्य अपि अवलोकनं कृतम् तथा सफारी-व्यवस्थायाः तकनीकी-विशेषतानां च विषये सूचना प्राप्ता।

मुख्यमन्त्रिणा दूरनियन्त्रकं निपीड्य फव्वारा इत्यस्य शुभारम्भः कृतः। तेन जलजीवालये विद्यमानानां वर्णवर्णानां मत्स्यानाम् अपि अवलोकनं कृतम्। जन्तुशालाया: विकसितानां नवीन-सुविधानां प्रशंसां कुर्वन् तेन उक्तं यत् एताभिः सुविधाभिः नगरवासिभ्यः, बालकेभ्यः, पर्यटकेभ्यश्च मनोरञ्जनेन सह वन्यजीवानां प्रकृतेश्च नूतन-तकनीकी-माध्यमेन अवबोधनस्य अवसरः प्राप्स्यते।

कार्यक्रमे नगरीयप्रशासन-आवास-मन्त्री कैलाशविजयवर्गीयः, जलसंसाधन-मन्त्री तुलसीरामसिलावटः, सांसदः शंकर-लालवानी, महापौरः पुष्यमित्रभार्गवः, विधायकाः महेन्द्रहार्दिया, मधुवर्मा, सावनसोनकरः, सुमितमिश्रः, गौरवरणदिवे, एमआईसी-सदस्यः नन्दकिशोरपाहाडिया इत्यादयः अन्ये जनप्रतिनिधयः अधिकारिणश्च उपस्थिताः आसन्।

Hindusthan Samachar / Divya Ranjan