राष्ट्रीयबजरङ्गदलस्य राष्ट्रीयाध्यक्षेन मनोजसिंहेन त्रिरङ्ग-यात्रायाः शुभारम्भः कृतः

मुरादाबादः, १६ अगस्तमासः (हि.स.)। राष्ट्रीयबजरङ्गदलस्य तत्त्वावधाने रविवासरे सायंकाले मुरादाबाद-महानगरे भव्यायाः त्रिरङ्ग-द्विचक्रिकायात्रायाः आयोजनं कृतम्। कार्यक्रमस्य मुख्यातिथिः राष्ट्रीयबजरङ्गदलस्य राष्ट्रियाध्यक्षः मनोजसिंहः उक्तवान् यत् स्वातन्त्र्यदिवसः केवलं त्रिरङ्गध्वजस्य आरोहणस्य दिवसः नास्ति, अपि तु राष्ट्रं समाजं च प्रति स्वकर्तव्येषु सङ्कल्पं कर्तुं अवसरः अस्ति।

सः कार्यकर्तॄन् आहूतवान् यत् प्रत्येकस्मिन् ग्रामे प्रत्येकस्यां च बस्त्यां हनुमानचालीसा-केन्द्राणि स्थापनीयानि, येन हिन्दूसमाजे संस्कारः, एकता, धार्मिकजागरूकता च वर्धयितुं शक्येत।

यात्रा सायं षड्वादने लाजपतनगरात् प्रारब्धा तथा प्रस्तावितमार्गैः नगरस्य विभिन्नेषु क्षेत्रेषु निर्गता। यात्रायां बहुसंख्याकाः युवानः, कार्यकर्तारः हिन्दूसमाजस्य जनाश्च हस्तेषु त्रिरङ्गध्वजं गृहीत्वा राष्ट्रभक्तिपूर्णैः घोषैः सह सहभागितां कृतवन्तः।

राष्ट्रीयबजरङ्गदलस्य प्रदेशाध्यक्षः रोहनसक्सेनः उक्तवान् यत् १५ अगस्तस्य एषा त्रिरङ्ग-द्विचक्रिकायात्रा केवलं यात्रा नास्ति, अपि तु राष्ट्रभक्तेः हिन्दूसमाजस्य एकतायाश्च सन्देशं प्रदातुम् अभियानम् अस्ति। अद्य सहस्रशः कार्यकर्तारः युवानश्च त्रिरङ्गध्वजं गृहीत्वा एतं सङ्कल्पं कृतवन्तः यत् राष्ट्रहिताय, समाजहिताय, सनातनसंस्कृतेः सम्मानाय च वयं सदैव तत्पराः भविष्यामः।

त्रिरङ्ग-द्विचक्रिकायात्रायां गौरवराघवः, गौरवसैनी, शरद्रस्तोगी, विजयशर्मा, इशाङ्कभारद्वाजः, अभिषेकश्रीवास्तवः, जतिनप्रजापतिः, सुशान्तगुप्तः, सुनीलवर्मा, किशनसिंहः, रोहितगौतमः, अतुलः, किशनः, राकेशः, भानुप्रतापसिंहः इत्यादयः उपस्थिताः आसन्।

/ अंशु गुप्ता