कोलकाता, १६ अगस्तमासः (हि.स.)। पश्चिमबङ्गे केन्द्रसर्वकारस्य महत्त्वाका-ङ्क्षिण्याः स्वास्थ्यबीमा-योजनायाः आयुष्मान-भारत-प्रधानमन्त्री-जन-आरोग्य-योजना इत्यस्याः कार्यान्वयनस्य औपचारिकः शुभारम्भः रविवासरे कोलकाता-नगरस्य नेताजी-इन्डोर-स्टेडियमतः अभवत्। अस्मिन् अवसरे केन्द्रीयस्वास्थ्य-परिवारकल्याण-रसायन-उर्वरक-मन्त्री जगतप्रकाशनड्डा मुख्यातिथिरूपेण उपस्थितः आसीत्, यदा पश्चिमबङ्गस्य मुख्यमन्त्री शुभेन्दु-अधिकारी कार्यक्रमस्य अध्यक्षतां कृतवान्। पश्चिमबङ्गस्य कृते स्वास्थ्यक्षेत्रे एतत् महत्त्वपूर्णं परिवर्तनम् इति मन्यते।

केन्द्रसर्वकारस्य अनुसारं राज्यं सम्प्रति आयुष्मान-भारत-पीएम-जेएवाई इत्यस्य कार्यान्वयनं कुर्वत्सु देशस्य ३६तमं राज्यं केन्द्रशासितप्रदेशं वा अभवत्। योजनायाः अन्तर्गतं पात्रपरिवारेभ्यः प्रतिवर्षं पञ्चलक्षरुप्यकाणि यावत् स्वास्थ्य-सुरक्षाकवचं प्रदास्यते, येन गम्भीररोगेषु चिकित्सालये प्रवेशस्य च स्थितौ परिवारेषु जायमानः आर्थिकभारः न्यूनीकर्तुं शक्यते।

कार्यक्रमात् पूर्वं मुख्यमन्त्री शुभेन्दुअधिकारी उक्तवान् आसीत् यत् राज्ये पूर्वमेव स्वास्थ्यसाथी-योजनायाः अन्तर्गतं ये बहुसंख्यकाः लाभार्थिनः सन्ति, तेषाम् आयुष्मान-भारत-योजनायाः परिधौ समावेशः करिष्यते। तेन एतदपि सूचितं यत् आयुष्मान-भारत-योजनायै नामाङ्कनस्य प्रक्रिया प्रारब्धा अस्ति तथा चरणबद्धरूपेण लाभार्थिभ्यः पत्रकाणि प्रदास्यन्ते।

राज्यसर्वकारस्य अनुसारम् अनेन पश्चिमबङ्गस्य ते जनाः अपि लाभं प्राप्तुं शक्नुवन्ति, ये रोजगारस्य, शिक्षायाः अथवा अन्येषां कारणानां वशात् राज्यात् बहिः निवसन्ति। अनेन अन्येषु राज्येषु चिकित्सां कुर्वतां योग्यलाभार्थिनां कृते स्वास्थ्य-सेवानां प्राप्तिः अपि सुगमा भविष्यति।

मुख्यमन्त्री शुभेन्दुअधिकारी पूर्वं केन्द्रसर्वकारेण सह सम्पन्नायां वार्तायां पश्चिमबङ्गस्य स्वास्थ्यक्षेत्रस्य सुदृढी-करणाय प्रायः त्रिसहस्रकोटि-रुप्यकाणां केन्द्रीयसहायतायाः सूचना दत्तवान् आसीत्। अस्मिन् राष्ट्रियस्वास्थ्य-मिशनस्य आयुष्मान-भारत-सम्बद्धानां च मदानां कृते निर्धारिता राशिः अन्तर्भवति।

सर्वकारस्य दावानुसारम् अनेन राज्यस्य सार्वजनिकस्वास्थ्यसंरचनायाः सुदृढीकरणे, चिकित्सालयानां क्षमतायाः वर्धने, स्वास्थ्यसेवानां सुधारणे च सहायता भविष्यति।

नेताजी-इन्डोर-स्टेडियम इत्यत्र आयोजितस्य कार्यक्रमस्य राजनैतिक-प्रशासनिकयोः उभयोः स्तरयोः विशेषं महत्त्वं दृश्यते। पश्चिमबङ्गे नूतन-सर्वकारस्य गठनानन्तरं केन्द्रस्य राज्यस्य च मध्ये स्वास्थ्यक्षेत्रे सहयोगं वर्धयितुं दिशि एतत् महत्त्वपूर्णं चरणम् इति मन्यते।

आयुष्मान-भारत-पीएम-जेएवाई-योजनायाः पश्चिमबङ्गे कार्यान्वयनेन सह सम्प्रति पात्रपरिवारेभ्यः नगदरहित-स्वास्थ्योपचारस्य सुविधा प्रदातुं प्रक्रिया अग्रे वर्धिष्यते। योजनायाः अन्तर्गतं सूचीबद्धेषु सर्वकारीयेषु निजीसु च चिकित्सालयेषु पात्रलाभार्थिनः निर्धा-रितानां स्वास्थ्यसेवानां लाभं प्राप्तुं शक्नुवन्ति। अर्थात् पश्चिमबङ्गे स्वास्थ्यसुरक्षाक्षेत्रे अद्य नूतनस्य अध्यायस्य प्रारम्भः अभवत्, यस्य प्रत्यक्षलाभः राज्यस्य पात्रपरिवारैः प्राप्स्यते।

Hindusthan Samachar / Divya Ranjan