तिरुवारूर:, १७ अगस्तमासः (हि.स.)। केन्द्रीयशिक्षामन्त्रालयस्य अधीनं सञ्चालितस्य तमिलनाडु-केन्द्रीय-विश्वविद्यालयस्य एकादशः दीक्षान्त-समारोहः सोमवासरे विश्व-विद्यालय-परिसरस्य बहुउद्देश्यीय-सभागारे आयोजितः। समारोहस्य अध्यक्षता विश्वविद्यालयस्य कुलाधिपतिना पद्म-नाभनेन कृता। भारतस्य उपराष्ट्रपतिः सी.पी. राधाकृष्णन् मुख्यातिथिरूपेण समारोहे भागं गृहीत्वा उत्कृष्टप्रदर्शनं कृतवद्भ्यः विद्यार्थिभ्यः स्वर्णपदकानि उपाधिपत्राणि च प्रदत्तवान्।

समारोहम् सम्बोधयन् उपराष्ट्रपतिः सी.पी. राधाकृष्णन् उक्तवान् यत् तमिलनाडु-केन्द्रीयविश्वविद्यालयस्य एकादशे दीक्षान्त-समारोहे विद्यार्थिषु उपस्थितः भूत्वा तं महती प्रसन्नता भवति। तेन उक्तं यत् अयं दिवसः विश्वविद्यालयस्य इतिहासे अविस्मरणीयं मीलशिलारूपं स्थानं धारयति।

तेन उक्तं यत् वर्तमानसमये शिक्षायाः मूल्याङ्कनं केवलं परीक्षायां प्राप्ताङ्कानां अथवा उपाधेः आधारेण कर्तुं न शक्यते। शिक्षायाः वास्तविकं मूल्यं व्यक्तेः स्वतन्त्रतया चिन्तनस्य क्षमता, मिलित्वा कार्यं कर्तुं योग्यता तथा जीवनपर्यन्तं शिक्षितुं इच्छा इत्यादिभिः निर्धारितं भवति।

उपराष्ट्रपतिना तमिलनाडु-केन्द्रीय-विश्वविद्यालयस्य बहुविषयकशिक्षायाः, अनुसन्धानस्य तथा अनुसन्धानाधारित-अध्यापनस्य विशेषमहत्त्वं दत्तवतः विश्वविद्यालयस्य प्रशंसा कृता। तेन उक्तं यत् परिवर्तनशीले काले विद्यार्थिभिः विभिन्नविषयाणां बोधं विकसनेन सह अनुसन्धानं नवाचारं च प्रति अपि ध्यानं दातव्यम्।

तेन दीक्षान्तसमारोहे उपाधिं प्राप्तवद्भ्यः सर्वेभ्यः विद्यार्थिभ्यः शुभकामनाः प्रदत्ताः। उपराष्ट्रपतिः उक्तवान् यत् विद्यार्थिनां एषा उपलब्धिः केवलं तेषां व्यक्तिगतसफलता नास्ति, अपि तु तेषां मातापित्रोः अपि उपलब्धिः अस्ति, यैः तेषां भविष्याय कल्याणाय च निरन्तरं परिश्रमः कृतः तथा तेषां सफलजीवनस्य कामना कृता।

सी.पी. राधाकृष्णनेन विद्यार्थिभ्यः उक्तं यत् उपाधिप्राप्तेः अनन्तरमपि शिक्षणं कदापि न विरमणीयम्। तेन जीवनपर्यन्तं ज्ञानार्जनं कर्तुं तथा परिवर्तमानपरिस्थितीनाम् अनुरूपं स्वं विकसितुं च विद्यार्थिनः आहूताः।

ततः पूर्वं उपराष्ट्रपतिः चेन्नईतः तिरु-चिरापल्लि-अन्ताराष्ट्रिय-विमान-स्थानकं प्राप्तवान्। विमानस्थानके तमिलनाडुराज्यस्य राज्यपालः राजेन्द्र-विश्वनाथ-आर्लेकरः, राज्यस्य उच्चशिक्षा-मन्त्री पे. विश्वनाथन् तथा अन्ये वरिष्ठाः अधिकारिणः तस्य स्वागतं कृतवन्तः। अस्मिन् अवसरे शिक्षासूचनाविभागस्य मन्त्री राजमोहनः उपराष्ट्रपतये एकं पुस्तकमपि उपाहरत्।

विमानस्थानकात् उपराष्ट्रपतिः हेलि-कॉप्टरयानेन तिरुवारूरं प्रति प्रस्थितवान्। तेन सह राज्यपालः राजेन्द्रविश्वनाथ-आर्लेकरः तथा मन्त्री पे. विश्वनाथन् अपि गतवन्तौ। तिरुवारूरे स्थिते केन्द्रीयविश्वविद्यालयस्य परिसरे निर्मितं अस्थायी-हेलिकॉप्टर-अवतरण-स्थलं प्राप्य उपराष्ट्रपतिः स्थलमार्गेण दीक्षान्त-समारोहस्थलं प्राप्तवान्।

तिरुवारूरस्य समीपे नीलकुडि-स्थिते विश्वविद्यालयपरिसरे आयोजिते दीक्षान्त-समारोहे उपराष्ट्रपतिः उत्कृष्ट-प्रदर्शनं कृतवद्भ्यः विद्यार्थिभ्यः स्वर्ण-पदकानि उपाधिपत्राणि च प्रदत्तवान्। ततः सः विद्यार्थिभ्यः सम्बोधनं कृत्वा तेषां उज्ज्वलभविष्याय शुभकामनाः प्रदत्तवान्।

उपराष्ट्रपतेः यात्रां दृष्ट्वा तिरुचिरापल्लितः तिरुवारूरपर्यन्तं तस्य कार्यक्रमसम्बद्धेषु क्षेत्रेषु व्यापकाः सुरक्षाव्यवस्थाः कृताः आसन्। स्थानीयप्रशासनेन आरक्षक-अधिकारिभिश्च कार्यक्रमस्य सुचारुरूपेण सम्पन्नतायै आवश्यकाः व्यवस्थाः कृताः आसन्।

Hindusthan Samachar / Divya Ranjan