—पुलिस आयुक्तः एवं जिलाधिकारी च उदग्रविमानेन धाम्नि पुष्पवृष्टिः

वाराणसी,17 अगस्तमासः (हि.स.)।श्रावणमासस्य तृतीयसोमवासरे उत्तरप्रदेशस्य धार्मिकनगरी काश्यां श्रद्धायाः शिवभक्तेश्च अद्भुतं दृश्यं दृष्टिगोचरम् अभवत्। श्रीकाशीविश्वनाथधामे दर्शनपूजनाय समागतानां शिवभक्तानां कांवड़धारिणां च उपरि जनपदप्रशासनस्य पक्षतः हेलिकॉप्टरयानेन गुलाबपुष्पदलानां पुष्पवर्षा कृता। आकाशात् पतन्तीनां पुष्पदलानां अधः च गुञ्जमानस्य ‘हर हर महादेव’ इति जयघोषस्य कारणेन सम्पूर्णं वातावरणं भक्तिमयं जातम्।

श्रावणमासस्य तृतीयसोमवासरस्य अवसरे काशीविश्वनाथमन्दिरे, काश्याः कोतवालस्य कालभैरवमन्दिरे तथा अन्येषु प्रमुखशिवालयेषु भगवतः दर्शनाय बहुसंख्याकाः श्रद्धालवः कांवड़धारिणश्च समागताः। जनपदप्रशासनस्य पक्षतः शिवभक्तानां स्वागताय तेषाम् उत्साहवर्धनाय च हेलिकॉप्टरयानेन गुलाबपुष्पदलानां वर्षा कृता। यदा हेलिकॉप्टरयानं श्रद्धालूनाम् उपरि उड्डीयमानं पुष्पवर्षणम् आरब्धवान्, तदा भक्तेषु उत्साहस्य लहरिः प्रसृता। श्रद्धालवः हस्तौ ऊर्ध्वं कृत्वा ‘हर हर महादेव’, ‘बोल बम’ इति जयघोषैः सह अस्य दृश्यस्य स्वागतं कृतवन्तः।

अस्मिन् समये पुलिसायुक्तः मोहितअग्रवालः जिलाधिकारी सत्येन्द्रकुमारश्च हेलिकॉप्टरयानेन शिवभक्तानाम् उपरि पुष्पवर्षां कृतवन्तौ। आकाशात् पतन्तीनां गुलाबपुष्पदलानां मध्ये श्रद्धालूनाम् उत्साहः दर्शनीयः आसीत्।

श्रावणमासे काश्यां बाबा विश्वनाथस्य दर्शनाय देशस्य विभिन्नेभ्यः भागेभ्यः श्रद्धालवः आगच्छन्ति। विशेषतः सोमवासरे कांवड़धारिणां शिवभक्तानां च संख्या बहुधा वर्धते। अतः जनपदप्रशासनस्य पक्षतः सुरक्षायै, यातायातव्यवस्थायै, दर्शनव्यवस्थायै श्रद्धालूनां सुविधायै च विशेषाः व्यवस्थाः कृताः सन्ति।

तृतीयसोमवासरे काश्याः प्रमुखेषु शिवालयेषु प्रातःकालादेव भक्तानां दीर्घाः पङ्क्तयः दृष्टिगोचराः अभवन्। कांवड़धारिणः गङ्गाजलं नीत्वा बाबायाः जलाभिषेकाय मन्दिराणां दिशि गच्छन्तः दृश्यन्ते स्म। सर्वत्र भगवद्वर्णः, हस्तेषु कांवड़ाः जिह्वासु च ‘बोल बम’ इति उद्घोषः श्रूयते स्म। हेलिकॉप्टरयानेन कृता पुष्पवर्षा अस्य धार्मिकवातावरणस्य भव्यतां अधिकां कृतवती।

श्रद्धालवः एतत् काशीविश्वनाथस्य नगरे जनपदप्रशासनस्य पक्षतः कृतं विशेषस्वागतम् इति कथितवन्तः। काश्यां श्रावणमासे शिवभक्तेः एषः उत्सवः केवलं धार्मिकश्रद्धायां सीमितः न भवति, अपितु सम्पूर्णं नगरं विशिष्टया आध्यात्मिकशक्त्या पूरयति।

Hindusthan Samachar / Dheeraj Maithani