जांजगीर-चांपा, 17 अगस्तमासः (हि.स.)।

जनपदस्य नवागढपुलिसस्थानकक्षेत्रे महन्तग्रामे स्थिते प्रसिद्धे मां चण्डीदाईमन्दिरे सोमवासरे श्रद्धायाः आस्थायाः उत्साहस्य च वातावरणं दृष्टिगोचरम् अभवत्। मन्दिरात् चोरितस्य मां चण्डीदाईदेव्याः रजतमुकुटस्य सुवर्णाभरणानां च पुनःप्राप्तेः अनन्तरं विधिवत् शुद्धीकरणं कारितम् तथा सम्पूर्णधार्मिकविधिविधानपूर्वकं देव्याः पुनः भव्यं शृङ्गारं कृतम्। अस्मिन्नवसरे भरमबाबामन्दिरात् मां चण्डीदाईमन्दिरं यावत् पुलिसवाद्यवृन्दस्य सहायतया भव्यशोभायात्रा आयोजिता।

कतिपयदिनपूर्वं महन्तग्रामस्य मां चण्डीदाईमन्दिरात् देव्याः मस्तके सुशोभितं रजतमुकुटं सुवर्णाभरणानि च चोरितानि अभवन्। घटनायाः अनन्तरं जांजगीरचाम्पापुलिसेन प्रकरणं गम्भीरतया स्वीकृत्य शीघ्रं कार्यवाही कृता तथा आरोपिणः निगृहीताः, चोरितसामग्री च पुनः प्राप्ता। पुलिसस्य अस्याः कार्यवाह्याः कारणेन ग्रामवासिनां श्रद्धालूनां च मनसि सुरक्षां प्रति विश्वासः सुदृढः अभवत्।

पुलिसाधीक्षकस्य विजयकुमारपाण्डेयस्य नेतृत्वे पुनःप्राप्तं मुकुटम् आभरणानि च न्यायालयात् सुपुर्दनामापत्रस्य माध्यमेन प्राप्तानि। तदनन्तरं मन्दिरे विधिवत् शुद्धीकरणं कारितम् तथा धार्मिकपरम्परानुसारं मां चण्डीदाईदेव्याः पुनः शृङ्गारः कृतः। अस्मिन् समये चाम्पायाः उपपुलिसाधीक्षकः लौकेशबंसलः, अजाकस्य उपपुलिसाधीक्षकः सतरूपातारमः, नवागढपुलिसस्थानकस्य प्रभारी मणिकान्तपाण्डेयः, गणमान्यनागरिकः देवेशसिंहः, पत्रकाराः तथा बहुसंख्याकाः ग्रामवासिनः श्रद्धालवश्च उपस्थिताः आसन्।

मां चण्डीदाईदेव्याः पुनःशृङ्गारात् पूर्वं भरमबाबामन्दिरात् मां चण्डीदाईमन्दिरं यावत् भव्यशोभायात्रा आयोजिता। पुलिसवाद्यवृन्दस्य मधुरध्वनीनां मध्ये श्रद्धालवः ग्रामवासिनश्च उत्साहेन शोभायात्रायां सम्मिलिताः अभवन्। मार्गस्य उभयतः मां चण्डीदाईदेव्याः जयघोषैः वातावरणं भक्तिमयं जातम्। पुलिसाधिकारिणां, जनप्रतिनिधीनां, गणमान्यनागरिकाणां, पत्रकाराणां ग्रामवासिनां च उपस्थित्या आयोजनं विशेषमहत्त्वपूर्णम् अभवत्।

मन्दिरे चौर्यघटनायाः अनन्तरं ग्रामवासिनां श्रद्धालूनां च मध्ये चिन्तायाः वातावरणम् आसीत्। पुलिसेन आरोपिणां निग्रहणं चोरितमुकुटस्य आभरणानां च पुनःप्राप्तिश्च कृता अनन्तरं जनानां मध्ये राहत् दृष्टिगोचरीभूता। अधुना देव्याः पुनःशृङ्गारेण सह मन्दिरे श्रद्धालूनाम् आस्था उत्साहश्च पुनरागतोऽस्ति।

अस्यैव कार्यक्रमस्य समये जांजगीरचाम्पापुलिसेन सामुदायिकपुलिसव्यवस्थां सुदृढां कर्तुं दिशि महत्त्वपूर्णः प्रयासः अपि कृतः। महन्तग्रामस्य सक्रियाः महिलाः संयोज्य महिला-कमाण्डो-दलस्य गठनं कृतम्। एतत् दलं ग्रामीणक्षेत्रे महिलानां बालकानां च सुरक्षायै, अपराधानां प्रति जागरूकतायाः वर्धनाय तथा पुलिसस्य सामान्यनागरिकाणां च मध्ये उत्तमसमन्वयस्थापनाय सहयोगं करिष्यति।

जांजगीरचाम्पापुलिसस्य अनेन प्रयासेन ग्रामीणमहिलानां सामुदायिकसहभागितायाः प्रोत्साहनं भविष्यति तथा ग्रामे सुरक्षायाः जागरूकतायाश्च वातावरणं सुदृढं भविष्यतीति अपेक्षा अस्ति। मां चण्डीदाईमन्दिरे चौर्यघटनायाः अनन्तरं पुलिसस्य कार्यवाही, चोरिताभरणानां पुनःप्राप्तिः पुनःशृङ्गारस्य आयोजनं च पुलिसस्य ग्रामवासिनां च मध्ये विश्वासं अधिकं सुदृढं कृतवन्तः।

---------------

Hindusthan Samachar / Dheeraj Maithani