मुम्बई, १७ अगस्तमासः (हि.स.)। केन्द्रीयमन्त्री नितिनगडकरी सोमवासरे पुणेनगरे अवदत् यत्, “राजनैतिकक्षेत्रे सामाजिकविषयेषु च चिन्तनस्य न्यूनता चिन्तनस्य विविधतायाः अपेक्षया अधिकतरा वर्धमाना अस्ति, एतत् चिन्ताजनकम् अस्ति। यदि वयं कस्यचित् मतस्य सहमताः न भवामः, तथापि तस्य सम्मानं कुर्मः। किन्तु विचारधारायाः सिद्धान्तानां च स्थाने परिस्थित्यानुसारं स्वमतपरिवर्तनस्य प्रवृत्तिः तीव्रतरा भवति। ‘न वामपन्थः न दक्षिणपन्थः, वयं अवसरवादिनः’ इति प्रवृत्तिः वर्धमाना अस्ति। एतादृशे समये समर्पिताः सिद्धान्तनिष्ठाः जनाः समाजाय प्रकाशस्तम्भाः भवन्ति।”

पुणे-जर्नलिस्ट्स-फाउण्डेशन तथा पुणे-श्रमिक-जर्नलिस्ट्स-एसोसिएशन इत्यनयोः वरिष्ठपत्रकारः एस. के. कुलकर्णी पत्रकारिताक्षेत्रे तस्य योगदानाय केन्द्रीयमन्त्रिणा नितिनगडकरिणा सोमवासरे सम्मानितः। अस्मिन् अवसरे महापौरः मञ्जुषानागपुरे, पुणे-जर्नलिस्ट्स-फाउण्डेशन इत्यस्य अध्यक्षः राजेन्द्रपाटिलः, जर्नलिस्ट्स-एसोसिएशन इत्यस्य अध्यक्षः उमेशशेलके, प्रतिष्ठानस्य कार्याधिकारी पाण्डुरङ्गसाण्डभोरः अन्ये च जनाः उपस्थिताः आसन्।

नितिनगडकरी अवदत् यत्, “विजयस्य श्रेयं बहवः जनाः गृह्णन्ति, किन्तु पराजयस्य दोषः एकस्य जनस्य उपरि आरोपयितुं न शक्यते। यदा सफलता प्राप्यते तदा सर्वं सम्यक् प्रतीयते। समाजे उदयमानस्य सूर्यस्य अभिवादनस्य परम्परा अस्ति। किन्तु संक्षिप्तमार्गेण प्राप्ता सफलता दीर्घकालं न तिष्ठति। इतिहासे अपि तस्याः उल्लेखः न भवति। कदाचित् अस्माकं कार्यस्य आलोचना भवति, कदाचित् प्रशंसा। किन्तु अस्माकं कर्तव्यं यत् यत् अस्माकं हृदयम् इच्छति तत् एव वयं सत्यतापूर्वकं कुर्याम।”

सः अवदत् यत् पत्रकारिता समाजं प्रति ज्ञानप्रसारणस्य एकं माध्यमम् अस्ति। पत्रकारैः समाजे परिवर्तनं आनेतुं कार्यं करणीयम्। परिस्थितयः परिवर्तिताः, प्रौद्योगिकी आगता, सञ्चारमाध्यमानां स्वरूपम् अपि परिवर्तितम्; तथापि समाजं किञ्चित् बोधयितुं जनसामान्यं शिक्षितुं च दृढसंकल्पः पत्रकारितायां स्थातव्यः। अस्य कृते एस. के. कुलकर्णी-सदृशानां वरिष्ठजनानां मार्गदर्शनम् अत्यन्तम् आवश्यकम् अस्ति।

शुभकामनानां प्रत्युत्तरं ददन् एस. के. कुलकर्णी परिवर्तमानायाः पत्रकारितायाः विषये स्वमतं प्रकटितवान्। सः अवदत् यत् समयेन सह पत्रकारिता परिवर्तिता अस्ति। पूर्वं वार्ताप्राप्त्यर्थं महत् संघर्षं कर्तव्यम् आसीत्। भोपाल-विषवाति-दुर्घटनायाः अनन्तरं सः तत्र गतवान् आसीत्। कश्चिदपि यथार्थां सूचनां दातुं न इच्छति स्म। तदा सः एकेन सहकारिणा सह श्मशानभूमिं गतवान् तथा तत्रतः सूचनां प्राप्तुं प्रयत्नं कृतवान्। तस्मिन् समये तेन ज्ञातं यत् २५०० नागरिकाः मृताः आसन् तथा तेन तस्याः वार्तायाः प्रतिवेदनं कृतम्। अनन्तरं सर्वकारेण अपि एतत् सङ्ख्यात्मकं तथ्यं स्वीकृतम्।

सः अवदत् यत् अद्यतने काले मुद्रितमाध्यमानि तदैव सुरक्षितानि स्थास्यन्ति यदा विभिन्नाः प्रयोगाः विभिन्नाश्च नीतयः स्वीक्रियन्ते। नवीनतायाः अन्वेषणानन्तरमेव कार्यशैली निर्मीयते तथा वार्तायाः विश्वसनीयता सुरक्षिताः भवति। वार्तायां पत्रकारस्य विशिष्टा छविः भवितव्या।

उमेशशेलकेन परिचयात्मकं भाषणं प्रस्तुतम्, हीरासर्वाडे इत्यनेन कार्यक्रमस्य सञ्चालनं कृतम्। राजेन्द्रपाटिलेन धन्यवादप्रस्तावः प्रस्तुतः।

Hindusthan Samachar / Divya Ranjan