नैनीतालम्, 18 अगस्तमासः (हि.स.)।

नगरस्य ऑल् सेण्ट्स् महाविद्यालयस्य चतस्रः प्रतिभावत्यः छात्राः स्वकीयया उत्कृष्टक्रीडाप्रतिभया प्रदर्शनस्य च आधारेण राष्ट्रियस्तरीयासु विविधासु प्रतियोगितासु उत्तराखण्डस्य प्रतिनिधित्वं कर्तुं चयनिताः सन्ति। छात्राणाम् एतेन उपलब्ध्या विद्यालये सह सम्पूर्णे नैनीताले अपि हर्षस्य वातावरणं वर्तते।

प्राप्तसूचनानुसारं विद्यालयस्य जैना रहमान् तथा नन्दानी बिष्ट् इत्येतयोः चयनं उत्तराखण्डक्षेत्रस्य प्रतिनिधित्वेन विद्यालयीय राष्ट्रिय बालिका बास्केटबॉल् प्रतियोगितायै कृतम् अस्ति। अस्याः प्रतियोगितायाः आयोजनं ग्रेटरनोएडास्थिते सेण्ट् जोसेफ् विद्यालये भविष्यति। अपरतः नन्दानी बेलवाल् तथा नव्या सिंह् इत्येतयोः चयनं अगस्तमासस्य अष्टादशदिनाङ्कात् त्रयोविंशतिदिनाङ्कपर्यन्तं भुवनेश्वरे आयोज्यमानायां द्विपञ्चाशत्तमायां कनिष्ठ राष्ट्रियतरणप्रतियोगितायां उत्तराखण्डस्य दलाय कृतम् अस्ति।

विद्यालयस्य प्रधानाचार्या रिचर्ड्, क्रीडाविभागाध्यक्षः गोपाल बिष्ट् तथा शिक्षकशिक्षिकाः च चतसृभ्यः छात्राभ्यः अभिनन्दनानि ज्ञापयित्वा तासां उज्ज्वलभविष्यस्य कामनां कृतवन्तः। ते उक्तवन्तः यत् तासां सफलता सम्पूर्णस्य नगरस्य कृते गौरवस्य विषयः अस्ति। तासां परिश्रमः, अनुशासनं क्रीडायां समर्पणं च आधारं कृत्वा प्राप्ता एषा उपलब्धिः अन्येषाम् विद्यार्थिनाम् अपि प्रेरणादायिनी भविष्यति।

Hindusthan Samachar / Dheeraj Maithani