बेंगलूरु:, १८ अगस्तमासः (हि.स.)। कर्नाटकस्य उपमुख्यमन्त्री डी.के. शिवकुमारः उक्तवान् यत् संघीयव्यवस्थायां कस्यापि राज्यस्य अन्यस्य राज्यस्य प्रशासनिककार्येषु हस्तक्षेपः न करणीयः। सः उक्तवान् यत् प्रत्येकं राज्यं स्वस्य विधिव्यवस्थया सुरक्षया च सम्बद्धानां समस्यानां समक्षं कर्तुं समर्थम् अस्ति।

बेंगलूरुनगरे मङ्गलवासरे पत्रकारैः सह वार्तालापस्य समये शिवकुमारः चामराज-नगरस्य कावेरीवन्यजीविक्षेत्रस्य हनूर-गोलीकाण्डस्य प्रकरणे सीबीआई-अन्वेषणस्य याचनां प्रति तमिलनाडु-राज्यस्य पूर्वमुख्यमन्त्रिणः ओ. पन्नीर-सेल्वमस्य वक्तव्यस्य प्रतिक्रियां दत्तवान्। सः उक्तवान् यत् प्रत्येकं राज्यस्य स्वकीयाः विधिव्यवस्थासम्बद्धाः समस्याः भवन्ति तथा कर्नाटकं जानाति यत् स्वराज्यस्य सुरक्षां कथं सुनिश्चितं कर्तव्यम्।

शिवकुमारः उक्तवान्— “ते स्वकार्यं कुर्वन्तु, वयं च स्वकार्यं करिष्यामः।” सः स्पष्टं कृतवान् यत् सः तमिलनाडुराज्यस्य प्रशासनिककार्येषु हस्तक्षेपं कर्तुम् न इच्छति। तथैव कर्नाटकस्य विषयेषु अपि अन्यराज्यैः हस्तक्षेपः न करणीयः। सः उक्तवान् यत् राज्यस्य गरिमायाः पवित्रतायाश्च रक्षणं कर्नाटकसर्वकारस्य दायित्वम् अस्ति।

हनूर-प्रकरणस्य अन्वेषणं प्रति तमिलनाडोः मुख्यमन्त्रिणः एम.के. स्टालिनस्य वक्तव्यस्य विषये पृष्टे शिवकुमारः टिप्पणीं कर्तुं निराकृतवान्। सः उक्तवान् यत् एषा सामान्यचर्चा अस्ति तथा उभयराज्याभ्यां स्वस्वकार्येषु ध्यानं दातव्यम्।

Hindusthan Samachar / Divya Ranjan